←  1Kings (2/22)  →
1. A thi a hung hnai chun Davidan a naupa Solomon kuomah thuro a sie a:
2. "Leilunga cheng po po khawsak dan angin ka fe ve hun a hung tlung tep ta a. Hrat takin um la, patling takin khawsa la,
3. LALPA i Pathienin lampui hraw ngei dinga a ruothai chu hraw la, i thilthaw iengkima le i fena taphotah i hmuingil theina dingin Mosie Dana chuong thupek le danhai chu vong tlat rawh.
4. Chuonga i khawsa chun LALPAN ka kuoma, 'Ka hmaah fimkhur taka i thlahai an khawsa a, lungril le thlaraua ringum taka ka lampui an hraw chun, Israelhai lalthungphaa inthung ding mi invai ngai naw ti nih' tia a lo tiem chu LALPAN vong zing a tih.
5. "Zeruia naupa Joab-in keima chunga le Israel sipaihai kawmandar, Nera naupa Abner le Jether naupa Amasa chunga a thaw danhai kha nang khomin i hriet a. Indo lai ang elin muongleiah anni chu a that a, ama kawngchun le kekokah an thisen a'n kaitir ta vong a nih.
6. I rem hriet dan ang peiin ama chu hung thaw la, amiruokchu a luah kel sam to rak khopin thlamuong takin thlan muolah inliemtir naw rawh.
7. "Gilead mi Barzila nauhai chunga ruok chu lunginsietna inlangtir la, i dawkana thlaithleng kiltuhai lai inthangtir rawh. I unaupa Absalom laka ka raltlan laia mi tan tlattu an nih.
8. "Chun, Bahurima inthoka hung Benjamin mi, Gera naupa Simei, Mahanaim-a ka fe tuma tongsie tinreng mi'n phurtu kha nangni lai hin a um a nih ti hre zing rawh. Jordana a mi hung hmuok tumin LALPA hmingin, 'Ka kawlhnam chun that naw ning chengah' tiin thu ka'n kham a.
9. Tu ruok hin chu, thiem changin insuo naw rawh. Pa var tak i ni leiin a chunga i thaw ding chu hre el i tih. A lu tuok chu thisen leh thlanah vui liem rawh" a ta.
10. Chun, Davida chu a thlatuhai kuomah a chawl a, Davida Khawpuia chun an phum a.
11. Israelhai chungah kum sawmli ro a rel a, Hebrona inthokin kum sari le Jerusalema inthokin kum sawmthum le kum thum.
12. Chuongchun, Solomon chu a pa Davida lalthungphaa chun a thung a, a lalna chu det taka suknghetin a hung um ta pei a.
13. Chun, Hagit naupa Adonija chu Solomon nu Bathseba kuomah a fe a, Bathseba chun, "A tha tienga hung am i ni?" a ta, ama chun, "A tha tienga hung ni e" a ta.
14. Ama bok chun, "I kuomah hril ding ka nei a nih" a ta, Bathseba chun "Hril ta la" a ta.
15. Ama chun, "I hriet tah angin ram hi ka ta a ni tah zet a, Israelhai po po khomin keima hi lal dinga an mi beisei zing ka ni a, sienkhom thil a hung inthlak thut a, ram chu ka unaupa kutah a um nawk ta a, LALPAN a pek a nih.
16. Tu hin thil pakhat chauh hni che ka nuom a, chu chu mi'n hlawsamtir lul naw rawh" a ta. Ama chun, "Hni ta la" a ta.
17. Adonija chun, "Lunginsiet takin Lal Solomon mi hnipek la, Sunam nunghak Abishag hi ka nuhmei dingin mi pe raw se. Nanga hni chu sel ngam naw nih" a ta.
18. Bathseba chun, "Ni e, lal kuomah hung hrilpek ka ti che" a ta.
19. Bathseba chu Adonija thil hni hrilpek dingin lal Solomon kuoma chun a fe a. Lal chun lo lawm lut dingin a ngir a, a hmaa chun a kun a, a lalthungpha chu a nu bulah a'n son hnaitir a, a thung a, a chang tieng chun a nu chu a'n thungtir a.
20. Ama chun lal kuomah, "Thil chikte hni ding che ka nei a, mi'n hlawsamtir lul naw rawh" a ta. Lal chun a kuomah, "Hni ta la, nu, hnawl naw top ka tih" a ta.
21. Ama chun, "Sunam nunghak Abishag hi i unaupa Adonija nuhmei dingin inneitir rawh" a ta.
22. Lal Solomon chun a nu kuomah, "Ieng dinga Sunam nunghak Abishag chu Adonija ta dinga i hnipek am an ta a? Chuong ang thil i hnipek ta rau rau si chun ram khom hi hnipek law law ta la, ka upa a ni hi teh- ama le thiempu Abiathar le Zeruia naupa Joab hai ta ding chen khomin tie!" a ta.
23. Chun, LALPA hming salin Solomon chu a'n kham a, "Hi a thil hni hi Adonijain a thipui naw chun Pathienin a law lawin mi law sien, chu neka nasa khom chun mi thaw raw se.
24. Tu hin ka pa Davida lalthungpha nghet taka mi'n hluotirtu le a tiem tah anga kan sungkuo lal sungkuoa mi'n dinpektu LALPA hringna chu salin ka hril, Adonija chu voisun ngei ngei hin sukhlum ning a tih" tiin.
25. Chuongchun, lal Solomon chun Jehoiada naupa Benaia chu a tir a, ama chun Adonija chu a va bei a, a that a.
26. Thiempu Abiathar kuoma chun lalin, "Anathot khuoa i in le lo umna tieng kir dai rawh. Thi tlak i nia chu ka pa Davida hmaah LALPA Pathien Bawm i lo zawn tah hlak leiin le ka pa rinum tuorna po poah i lo tuor ve ta hlak leiin, tu hin chu la sukhlum nawng ka ti che" a ta.
27. Chuongchun, LALPAN Silo khuoa Eli sungkuo chungchang thu a hril kha a hung tlung kim a, Solomon chun Abiathar chu thiempu a ninaa inthokin a ban a.
28. Joab-in chu thu chu a lo hrietin, Absalom tieng thang naw sien khom Adonija phierpuitu a ni leiin, LALPA puon inah a tlan lut a, maicham ki a chel a.
29. LALPA puon inah tlan lut a, Joab-in maicham ki a chel thu chu Solomon an hril a. Solomon chun Jehoiada naupa Benaia chu a ko a, "Fe la, va sat hlum rawh" a ta.
30. Chuongchun, Benaia chu LALPA puon ina chun a lut a, Joab kuomah, "Lalin hung suok rawh a ti che a nih" a ta. Ama chun, "Suok lo e, hi taka hin thi el ka tih" a ta. Joab-in a lo don dan chu Benaia chun lal kuomah a ripawt a.
31. Lal chun Benaia chu thu a pek a, "A ti ang tak chun thaw rawh. Sat hlum la, phum hmang rawh, a san um der loa Joab-in thisen a'n suona maw laka inthoka kei le ka pa sunghai hi i sukfihlim theina dingin.
32. Ama neka fel lem le tha lem mi pahnih, Israelhai sipai hotu Nera naupa Abner le Judahai sipai hotu Jether naupa Amasa hai kha ka pa hriet loin a lo bei a, kawlhnamin a that a.
33. LALPAN an thisen maw chu Joab lu chunga le a thlahai lu chungah kumkhuoin inphurtir sien la, Davida le a thlahai, a sungkuohai le a lalthungpha chungah LALPA thlamuongna chu kumkhuoin um zing raw se" a ta.
34. Chuongchun, Jehoiada naupa Benaia chu a hang fe a, Joab chu a bei a, a that a, thlalera ama rama chun an phum a.
35. Chun, lal chun Joab hmunah Jehoiada naupa Benaia chu sipai kawmandarah a sie a; Abiathar hmunah Zadok chu thiempuah a sie bok a.
36. Chun, lalin Simei chu a'n kotir a, a kuomah, "Jerusalema hin i in ding bawl la, chu taka inthok chun khaw lai khom suok naw rawh.
37. I suok ni, Kidron vadung i kan ni la lain thi ngei ngei i tih ti hre rawh; i thisen maw chu nangma lu chunga ngei um a tih" a ta.
38. Simei chun lal kuomah, "A'n dik annawm; lalpa, ka puin a hril ang chun i siehlaw hin thaw pei a tih" a ta.
39. Simei chu Jerusalemah sawt fe a um a. Kum thum a hung invoi chun Simei suokhai laia pahni chu Gath khaw lal Maaka naupa Akis kuomah an tlan hmang a. Simei kuoma chun, "I suokhai chu Gath khuoah an um" ti an hung hril a.
40. Chu phing leh a sabengtung chungah a chuong a, a suokhai zong dingin Gath khuoa Akis kuoma chun a fe a, a suokhai chu Gath-a inthok chun a hung thuoi kir nawk a.
41. Simei chu Jerusalema inthokin Gath khuoah a fe a, a hung kir nawk tah ti thu chu Solomon an hril a.
42. Lal chun Simei chu a'n kotir a, a kuomah, "Jerusalem i suoksan ni, hmun danga i suok ni la lain i thi ngei ngei ding a nih tiin LALPA hming salin thu ka'n khamtir che a ni naw am a ni? Nang khomin ka kuomah, 'I hril hi a tha, zawm ngei ka tih' i ti kha.
43. Ieng leia LALPA kuoma i'n khamna chu zawm loa thu ka pek che chu i poisa naw am a na?
44. Ka pa Davida chunga ritlona i'n suo po po kha i lungrilah i la hriet vong a. Tuhin i suolna kha LALPAN a thungrul ding che a nih.
45. Lal Solomon ruok chu malsawmin um a ta, Davida lalthungpha chu LALPA hmaah kumkhuoin suknghet ning a tih" a ta.
46. Lal chun Jehoiada naupa Benaia chu thu a pek a, a suok a, Simei chu a bei a, a that ta a. Chuongchun, ram chu Solomon kutah suknghetin a um ta a.
←  1Kings (2/22)  →