1Kings (19/22)  

1. Elija thilthaw po po le kawlhnama zawlneihai po po a'n thattir thu chu Ahab-in Jezebel kuomah a hril vong a
2. Jezebel chun Elija kuomah mi a tir a, "Khang i thathai laia pakhat ang bok khan zinga hin ka siem ve naw che chun pathienhaiin an law law mi law hai sien, chuong neka nasa hman chun mi thaw raw hai se" tiin thu a thon a.
3. Elija chun a ti leiin a hringna hum dingin a tlan ta nghal a. Judai rama Beersheba a tlung chun a siehlaw chu a maksan a,
4. ama ruok chu chu taka inthoka ni khat lam thlalerah a fe a. Hmunphi thing bul a tlung chun a buk hnuoiah a thung a, "LALPA ka tuor tawk tah. Ka hringna hi la el ta rawh. Ka thlatuhai nekin ka tha chuong bik bok si nawh" tiin thi nuomin a tongtai a.
5. Thing buk hnuoia chun a zal a, a in ta a. Inrang takin vantirkoin a hung not har a, "Tho la, fa rawh" a ta.
6. A hang ngha vel a, a lu thluona chun tuium le meilinga em hmin diem beiper a hmu a. Chuongchun a fak a, a zal a, a in nawk ta a.
7. Chun, LALPA vantirko chu a hung nawk a, "Tho la, fa rawh, i fena ding ban zo naw rawi i tih" a ta.
8. Chuongchun a tho a, fain a dawn a, a bu fak lei chun tha a hung nei a, Pathien tlang Horeb a tlung chenin ni sawmli le zan sawmli a fe a.
9. A tlung chun puk pakhat a hmu a, riek dingin a lut a. Chu taka chun Pathienin a biek a, "Elija, hi taka hin iem a na i thaw?" a ta.
10. Ama chun, "Iengkim LALPA Pathien ta dingin nasa takin thahnem ka ngai hlak a. Israelhaiin i thuthlung an hnawl a, i maichamhai an sukchim a, i zawlneihai chu kawlhnamin an that a. Kei chauh hi ka ni ta a, keikhom hi mi that an tum zing a nih" a ta.
11. LALPA chun a kuomah, "Puka inthok khan hung suok la, tlanga khin LALPA hmaah hang ngir rawh, LALPA chun a hung fe pel ding a nih" a ta. Chu zo chun thlipui na takin tlang chu a hung mut phel a, LALPA hmaa chun lungpuihai chu a mut koi pheng phung a, sienkhom thlia chun LALPA chu a um nawh. Thlipui a hrang zo chun simkhawlei a hung inhning dur dur a, sienkhom simkhawleia chun LALPA chu a um nawh.
12. Simkhawlei a hung inhning zo chun mei a hung suok puot puot a, sienkhom meia chun LALPA chu a um nawh. Mei a hung suok zo chun rawl dam diei a hung suok a.
13. Chu chu Elijan a hriet chun a korfuolin a hmai a hup a, a suok a, puk kota chun a ngir a. Rawl chun a kuomah, "Elija, hi taka hin ieng thawa um am i na?" a hung ti a.
14. Elija chun, "LALPA Iengkim Pathien ta dingin nasa takin thahnem ka ngai hlak a. Israelhaiin i thuthlung an hnawl a, i maichamhai an sukchim a, i zawlneihai chu kawlhnamin an that a. Kei chauh hi ka ni ta, kei khom hi mi that an tum zing a nih" a ta.
15. LALPA chun a kuomah, "I hungna lampui tieng khan kir nawk la, Damaska thlalerah fe rawh. I tlung pha leh Aram lal dingin Hazael chu hriek nal rawh.
16. Chun, Nimsi naupa Jehu chu Israel lalah hriek nal la, Abel Mohala inthoka hung Safat naupa Elisa chu zawlneia nangma thlaktu dingin hriek nal bok rawh.
17. Hazael kawlhnam pumpel taphot chu Jehu-in that a ta, Jehu kawlhnam pumpel taphot chu Elisa-in hung that a tih.
18. Chuong sa khom chun, Baal hmaa la kun ngai lo le Baal la fawp ve ngai lo mi sangsari ka ta dingin ka huol zing a nih" a ta.
19. Chuongchun, chu taka inthok chun a suok a, Safat naupa Elisa chu a va zong suok a. Bawngchal tuok sawmpahni sorin lo a lo kei a, ama ngeiin bawngchal tuok sawmpahni chu a khal a nih. Elija chu a kuomah a fe a, a silpuon a va'n haktir a.
20. Elisa chun a bawngchal sorhai chu a maksan a, Elija chu a zui a. "Ka nu le pa fawpin van thla zet ka ta, chu zoah hung zui ka ti che" a ta. Elija chun, "Va chibai rawh, ka khap reng reng che le'm" a ta.
21. Elisa chu a kir nawk a, a bawng sorhai chu a hung thuoi a, a that a, bawng sorna hmangruohai chun sa chu a suong a, mipuihai kuomah a sem a, an fak tlang a. Chu zoa chun a suok a, Elija chu a zui a, a rong a bawlpek a.

  1Kings (19/22)