←  1Kings (18/22)  →
1. Chun, iemani chen hnung, a kum thumnaa chun LALPA thu chu Elija kuomah a hung tlung a, "Fe la, Ahab hmaah va'n lang la, chu zoah ruo hung insurtir ka tih" tiin a hril a.
2. Chuongchun, Elija chu Ahab hmaah a va'n lang a.Samari rama chun tam chu a hrang hle a.
3. Ahab chun LALPA ti mi tak Obadia, a lal in enkoltua a hmang chu a ko a.
4. Jezebelin LALPA zawlneihai a rawt lai khomin Obadia hin zawlnei zakhat zet chu puk pahniah sawmnga ve vea thupin fak le dawn pein a chawm tawl a nih.
5. Ahab chun Obadia kuomah, "Ei ranhai that ngai loa ei sakorhai le sabengtunghai tlatna ding hna hring umna hmun a um tak duoiin a ram sunga tui hnar le vadung umna taphot fang rawh" a ta.
6. Chuongchun, an ram fang ding chu an insem a, Ahab chu amain a suok a, a fe nawna tieng chun Obadia chu a fe a.
7. Chuonga Obadia a fe lai chu Elija leh an intuok a. Obadia chun a la hriet a, a hmaa chun hnuoi sikin a bokkhup a, "Ka pu Elija kha i ni chie si maw?" a ta.
8. Ama chun, "Ni e. Fe la, i pu kuomah, 'Saw taka son Elija a um' tiin va hril rawh" a ta.
9. Obadia chun, "I siehlaw hi Ahab kuta thi dinga i hang pek el chu, iem ka thaw suol a um a?
10. LALPA i Pathien hringna salin ka hril hi, ka pu hin nangma zong dinga mi a tir nawna hnam le ram a um nawh. Tu hnam le ram khomin i um naw thu an hril pha leh an hmu zo naw takzet che thu inkham meuin a'n samtir zie a nih.
11. Tu hin, 'Elija chu hi taka hin a um' ti hril dingin i mi tir si hi.
12. Ka maksan pha che LALPA Thlarauin khaw tieng am a thuoi ding che ti ka hriet nawh. I um ti Ahab va hril lang, a hmu zo si naw che chun mi that a tih. I siehlaw hi tleirawl ka ni laia inthoka LALPA chawibiektu ka ni bok si a.
13. Jezebelin zawlneihai a rawt laia ka thilthaw kha ka pu hin i hriet naw a ni maw? Puk pahniah LALPA zawlnei zakhat, puk pakhatah sawmnga ve vein ka thup a, fak le dawnin ka chawm tawl a ni kha.
14. Amiruokchu, tu hin ka pu kuomah fe a, 'Elija hi taka hin a um' ti hril dingin i mi tir si hih. Mi that ngei ngei a tih" a ta.
15. Elija chun, "A rong ka bawl Iengkim LALPA hringna salin ka hril hi, voisun hin Ahab ka hmu ngei ngei ding a nih" a ta.
16. Chuongchun Obadia chu Ahab be dingin a fe a, a va hril a, Ahab chu Elija hmu dingin a hung a.
17. Elija a hmu chun, "Nanga pa hi i ni maw Israelhai sukbuoitu chu?" a ta.
18. Elija chun, "Israelhai ta dingin buoina ieng khom ka siem nawh. Nang le i pa in ni lem. LALPA thupekhai chu bansanin Baal in zui ta lem a.
19. Israel mihai po po chu Karmel tlanga mi hung hmu dingin ko khawm tawl rawh. Baala zawlnei zali le sawmnga ruol le Jezebel dawkana thlaithleng kil hlak Asera zawlnei zali ruol khom kha hung ko khawm vong rawh" a ta.
20. Chuongchun, Ahab chun Israel thlahai po po kuomah mi a tir a, zawlneihai le chun Karmel tlangah a ko khawm a.
21. Elija chun mipuihai chu a va hnai a, "Lungawp inkaiin ieng chen top am in um ding a na? LALPA hi Pathien a ni chun zui unla, Baal hi Pathien a ni chun zui ro" a ta. Mipui chun ieng khom an hril nawh.
22. Elija chun an kuomah, "Kei chauh hi LALPA zawlneihai laia la um sun chu ka ni ta a, Baal ruok chun zawlnei zali le sawmnga a nei.
23. Bawngchal pahni hung kei unla, anni chan dingin bawngchal pakhat thlang hai sien, chan nawi hai sien, thing chungah sie hai sien, mei ruok chu a hnuoiah sem loin. Kei khomin bawngchal dang chu buotsai ka ta, thing chungah sieng ka ta, sienkhom a hnuoiah mei sem loin.
24. Chu zoah in pathien hming lam unla, kei khomin ka LALPA hming chu lam ka ta, ei kona meia hung dontu taphot chu Pathien ni raw se" a ta. Mipui chun, "I hril chu a tha" an ta.
25. Elija chun Baal zawlneihai kuomah, "Bawngchal pakhat lem lem hi nangni puola ding thlang unla, buotsai unla, in tam bik em leiin nangnin tan hmasa ro. In pathien hming ko unla, sienkhom a hnuoiah mei sem naw ro" a ta.
26. Chuongchun an chanpuol bawngchal chu an lak a, an buotsai a. Chu zoah Baal hming chu zing tienga inthoka chawhnung tieng chen chun an ko an ko a. 'Aw Baal, mi hung don rawh" tiin an khek a. Sienkhom riva hrim hrim a um naw a, dontu tu khom an um nawh. Maicham an siem chu an lam huol an lam huol a.
27. Sunchanga chun Elija'n anni chu ti-elin, "Khek inring deu ro khai! In pathien chu a ni chie sia maw! A'n ngaituo vung vung amanih, a buoi amanih, a'n zin hmang amanih khom ni rawi naw nim. An naw leh a in a, kei tho a ngai khom ni ta bang a tih" a ta.
28. Chuongchun, an khek inring zuol sau a, an ching dan pangngaiin inthi pheng phungin kawlhnamin an inat a, feiin an insun pop a.
29. Nisa a hung inher a, zan tieng inthawi hun ding chenin thu insamin an insawi duol duol a, sienkhom donna riva hrim a um naw a, dontu an um naw a, uksaktu an um bok nawh.
30. Chu phing leh Elija chun mipuihai kuomah, "Mi hung hnai ro khai" a ta, mipui chun an va hnai a. LALPA maicham an sukchim ta hnung chu a siem tha a.
31. Chun, "I hming chu Israel ni tang a tih" tia LALPA thu lo dongtu Jakob naupahai hnam zat lung sawm le pahni Elija chun a lak a.
32. Chu lunghai chun LALPA maicham a siem a, maicham sir tuokin tui litar sawmpali vel inlengna ding a cho huol a.
33. Thing chu a hang rem fel a, bawngchal chu a chan nawi a, thing chunga chun a sie a. "Bel paliah tui sung sip unla, pumraw thilhlan le thing hi hung buok khum ro" a ta.
34. Chun, "Hung bur nawk ro" a ta, an bur khum nawk a. "A voi thumna dingin hung bur nawk ro" a ta, an bur khum nawk a.
35. Tui chu maicham vela chun a luong dum dum a, a khur cho huola chun a'n tling sip dul a.
36. Zan tieng inthawi huna chun Elijan maicham a va pan hnai a, "Aw LALPA, Abraham Pathien, Isak le Israel Pathien, voisun hin Israelhai Pathien i nizie le kei i siehlaw hin hieng thil po po hi nangma thupeka ka thaw a nih ti hung inhriettir tawl rawh.
37. Aw LALPA, mi hung don rawh. Hieng mipuihai hin nang LALPA hi Pathien i nizie hre a, an lungril inlamlet a, sima i kuom tieng an hung kir theina dingin aw LALPA, mi hung don ngei rawh" a ta.
38. Chuongchun, LALPA mei chu a hung tla a, pumraw thilhlan hai, thing hai, lung hai, le pilvuthai chu a kang hmang a, khur cho huola tui khom chu a hip kang ta vong a.
39. Mipuiin chuong thil po po an hmu chun an bokkhup a, "LALPA hi Pathien chu a lo nih, LALPA hi Pathien chu a lo nih" tiin an khek a.
40. Elija chun an kuomah, "Baal zawlneihai hi man unla, pakhat khom insuo naw ro" a ta. Chuongchun an man a, Kison ruomah an thuoi thlak a, an that tawl ta a.
41. Chun, Elijan Ahab kuomah, "Fe tung la, fain dawn ta rawh, ruopui vanawn sur ding ri a hung chu" a ta.
42. Ahab chu a fe a, fain a dawn a; Elija ruok chu Karmel tlang sipah a kai a, hnuoi sikin a kun a, a kap karah a lu a thun a.
43. A siehlaw kuoma chun, "Fe tung la, tuipui tieng hei thlir ta" a ta. A ti ang chun a hang kai a, a hei thlir vel a, "Ieng khom a um nawh" a ta. Chuong ang chun voi sari zet Elija chun, "Hang en nawk rawh" tiin a tir non a.
44. A voi sarinaa chun, "Tuipuia inthokin mihriem kuttum tiet sum a hung suok ka hmuh" a ta. Ama chun, "Ahab kuomah hang fe la, 'I tawlailir buotsai la, fe thla ta rawh, ruoin nang rawi a ti che' ti rawh" a ta.
45. Sawt naw tea chun van chu sumin a hung duk ta kul a, thli a hung inthok a, ruopui vanawn a hung sur a, Ahab chu a tawlailirah chuongin Jezreel khuo tieng a pan a.
46. LALPA thilthawtheina chu Elija chungah a um a, a zakuo fuol chu a kawngah zemin, Ahab hmaa chun Jezreel chenin a tlan khal a.
←  1Kings (18/22)  →