←  1Kings (17/22)  →
1. Gilead rama Tisbe khaw mi Elija chun Ahab kuomah, "LALPA, a rong ka bawl, Israelhai Pathien hringna salin ka hril, kum iemani zat chu ka thu loin daidaw tla naw ni a, ruo sur bok naw nih" a ta.
2. Chun, LALPA thu chu Elija kuomah a hung tlung a,
3. "Hi taka inthok hin suok la, khaw sak tieng pan la, Jordan sak tienga um Kerit varuoma chun inbi hmang rawh.
4. Chu vadung tui chu tlan i ta, a chawmtu ding che vaakhai khom thu ka pek tah" tiin.
5. Chuongchun, hrila a um ang tak chun a thaw a, Jordan sak tienga um Kerit varuoma chun a fe a, chu taka chun a um a.
6. Vaakhai chun zing le zan bei le sa an hung thak a, vadung tui chu a tlan a.
7. A ramah ruo a sur ta naw leiin iemani chen hnungah vadung tui chu a hung kang ta a.
8. Chun, LALPA thu chu a kuomah a hung tlung a,
9. "Tho la, Sidon rama Zarefat-ah fe la, chu taka chun um rawh. A chawmtu ding che hmeithai khom thu ka pek tah" tiin.
10. Chuongchun a tho a, Zarefat khuoa chun a fe a, kul kotkhar a va tlung chun hmeithai pakhat hin thing a lo fom a. Elija chun a ko a, a kuomah, "Ka dawn ding belin tui tlawmte mi hung lapek thei i ti?" a ta.
11. Tui la dinga a fe lai chun, "Bei tlawmte bek mi hung chawipek bok rawh aw" a ta.
12. Hmeithai chun, "LALPA i Pathien hringna salin ka hril, bei chu ka nei der naw a, ka nei ve sun chu bela beiphit vei khat le uma sahriek tlawmte chauh a nih. Chu chu kei le ka naupa fak dinga siem dingin thing ka hung fom vak a nih. Chu chu fang kan ta, thi chu kan hmabak a ni el tah" a ta.
13. Elija chun a kuomah, "Ti der naw rawh. Fe la, i ti ang tak chun va thaw rawh. Amiruokchu, beiphit le sahriek tlawmte i nei chun bei chikte mi siempek hmasa phot la, hung chawi rawh, chu zoah i naupa le in ta ding chu i siem ding a nih.
14. LALPA, Israelhai Pathien chun 'Hi rama LALPAN ruo a hung insurtir hma khat chun beiphit vei khat umna bel chu phai naw ni a, sahriek tlawmte siena um chu kang bok naw nih' a ti a nih" a ta.
15. Chuongchun a fe a, Elija hril ang tak chun a thaw a, ni tina ama le a sungkuo le Elija fak khop chu a um zing a.
16. Elijain LALPA thu a hril ang khan, beiphit siena bel chu a phai chuong naw a, sahriek um khom chu a kang chuong bok nawh.
17. Iemani chen hnunga chun in neitunu naupa chu a damnaw a, a natna chu a zuol deu deu a, a tawpah a thuok a tawp ta a.
18. Ama chun Elija kuomah, "Aw Pathien mi, nangin kei i mi khingna san ding iem a um a? Ka suolna mi'n hriet nontir ding le ka naupa mi thatpek dinga hung i lo ni maw?" a ta.
19. Elija chun, "I naupa kha mi hang pe ta" a ta, a pom lai chu a lak a, a umna pindan tieng chun a pom tung a, a khumah a'n zal a.
20. Chun, LALPA a ko a, "Aw, LALPA ka Pathien, ka chengna hmeithai chunga hin vangduoina intlungtirin a naupa hi ieng dinga i hung inthitir el am a na?" a ta.
21. Naupang chunga chun voi thum a bok a, tap pumin LALPA a ko a, "Aw LALPA, ka Pathien, lunginsiet takin hi naupang hringna hi hung pekir nawk hram rawh' a ta.
22. LALPA chun Elija hnina chu a lo ngaithlakpek a, naupang hringna chu amaah a hung kir nawk a, a hung har ta a.
23. Elija chun naupang chu a pom a, pindana inthok chun a tumpui a, a nu kuoma chun, "En ta, i naupa hi a hung dam nawk tah ie" a ta, a pek a.
24. Nuhmei chun Elija kuomah, "Tu zet hin chu Pathien mi i nizie le i baua LALPA thu i puong chu thutak a ni takzetzie ka hriet tah" a ta.
←  1Kings (17/22)  →