←  1Kings (16/22)  →
1. Baasa chungthua LALPA thu chu Hanani naupa Jehu kuomah a hung tlung a:
2. "Pilvuta inthokin ka lak suok che a, ka mi Israelhai thuoituah ka sie che a, sienkhom Jeroboam lam hraw bok chu i hraw ve a, ka mi Israelhai chu thil suol i'n thawtir a, an suolnahai chun ka lungsenna i chok tho a.
3. Tu hin Baasa le a insung hi ka lem hmang tep a, Nebat naupa Jeroboam le a sunghai ang khan ka siem ve tawl ding a nih.
4. Baasa sungkuo laia mi khaw sunga thi ta phot chu an ruong uiin fang an ta, ram hnuoia thi taphot chu chungleng vatehaiin tlan an tih' a ta.
5. Baasa inlal sunga thil tlung danghai, a thilthawhai le thil hlen suokhai chu Israel lalhai chanchin inziekna lekhabuah a chuong.
6. Baasa chu a thlatuhai kuomah a chawl a, Tirza khuoah an phum a. A naupa Ela chun a lalna chu a hung hluo a.
7. Jeroboam ang bokin Baasa chun LALPA mithmuah suol tinreng thaw a, a thil suol thawhai chun LALPA a suklungsen a. Chun, Jeroboam sungkuohai a that vong bok leiin Baasa le a sunghai chungthuah LALPA thu chu zawlnei Hanani naupa Jehu hmangin a hung tlung a nih.
8. Juda lal Asa inlala inthoka kum sawmhni le kum ruknaa chun Baasa naupa Ela chu Tirza khuoah Israelhai lalin a hung um a, kum hni sung a'n lal a.
9. A thoktu laia pakhat, a tawlailir zatve chunga hotua a siem Zimri chun a phier ruk a. Chuong lai chun Ela chu Tirza khuoah a um a.
10. Tirzaa a lal in enkoltu Arza inah zu a lo inrui laiin, Juda lal Asa inlal kum sawmhni le kum saria chun Zimri chu a va lut a, a bei a, a that a, a lalna chu a hluo ta a.
11. Zimri chun lalthungpha a hluo charin Baasa sunghai po po chu a that vong a, a laichinhai le ruol thahai laia pasal taphot chu tu khom hla hrim a nei nawh.
12. Baasa sungkuo chungthua LALPA thu zawlnei Jehu hmanga a hril tah angin Zimri chun a that vong a.
13. Baasa le a naupa Ela chun milem hmang lo bea Israelhai khom an thuoi suol leiin LALPA Israelhai Pathien lungsenna an chok tho a nih.
14. Ela inlal sunga thil tlunghai le a thilthaw iengkim chu Israel lalhai inlal lai chanchin inziekna lekhabuah a chuong.
15. Juda lal Asa inlala inthoka kum sawmhni le kum saria chun Zimri chu Tirza khuoah ni sari sung a'n lal a. Chuong lai chun sipaihai chu Filistinhai khuo, Gibethon bula chun an inkul a.
16. Zimriin phier ruka lal a that thu an inkulna hmuna inthoka Israelhaiin an hriet chun chu ni la la chun an kawmandar Omri chu an riebuka chun Israel lal dingin an puong a.
17. Chuongchun, Omri le a kuoma um Israel mi po po chun Gibethon an suoksan a, Tirza an pan tung a, an inhuol a.
18. Khuo chu an lak ngei ding a nih ti Zimriin a hriet chun lal in kulbingah a tlan lut a, in chu a raw a, a kang hlum ta a.
19. LALPA mithmuah thil suol thaw a, a suol thaw lei le Jeroboam lampui a hraw ve leia Israelhai thil suol a'n thawtir leiin chuong ang chun a thi a nih.
20. Zimri inlal sunga thil tlung danghai le a thil phier ruk thuhai chu Israel lalhai inlal lai chanchin inziekna lekhabuah a chuong.
21. Chuongchun, Israel mipuihai chu pawl hniin an inthe a, a zatve chun Ginat naupa Tibni chu lala siem tumin an zui a, a zatvein Omri chu an zui a.
22. Sienkhom, Omri zuituhai chun Ginat naupa Tibni zuituhai chu an hne a, Tibni chu an that a, Omri chu a hung inlal a.
23. Juda lal Asa inlala inthoka kum sawmthum le kum khatnaa chun Omri chu Israelhai chunga chun a'n lal tan a, kum sawm le kum hnih a'n lal a, Tirza khuoa a'n lal sung chu kum ruk a nih.
24. Chun, Semer kuoma inthokin Samariaa tlang tangkaruo kilogram sawmsariin a'n chawk a, chu chu kulin a'n huon a, khawpui a siem a, a khaw hmingah a tlang neitu hmasa Semer hming chawiin Samaria a'n puttir a.
25. Omri chun LALPA mithmuin thil tha lo tak a thaw hlak a, a hmaa mihai po po nekin thil suol a thaw nasa bik a.
26. Nebat naupa Jeroboam thaw dan po po a lak a, Israelhai chu hmangna bo milem inbiektirin, an thil suol thaw chun LALPA Israelhai Pathien chu an suklungsen hle a.
27. Omri inlal sunga thil tlung danghai le a thilthaw le hlen suok hai chu Israel lalhai inlal lai chanchin inziekna lekhabuah a chuong.
28. Omri chu a thlatuhai kuomah a chawl a, Samaria-ah an phum a. A naupa Ahab chun a lalna chu a hung hluo a.
29. Juda lal Asa inlala inthoka kum sawmthum le kum rietnaah Omri naupa Ahab chu Israelhai chungah a hung inlal tan a, Samaria khuoa inthokin kum sawmhni le kum hni Israelhai lalah a um a.
30. Omri naupa Ahab chu a hmaa mihai po po nekin LALPA mihmuin thil fel lo tak a thaw hlak a.
31. Nebat naupa Jeroboam suolna ang thaw vetuhai chu iengma loa ngai ni awm takin Sidon lal Ethbaal naunu Jezebel chu nuhmeiah a nei a, Baal rong bawlsanin a biek ve el ta a.
32. Samari khuoah Baal in a bawl a, chu taka chun maicham a siem a.
33. Chun, pathiennu Asera lemhai chu a siem a, a hmaa Israelhai lal po po nek khomin LALPA, Israelhai Pathien lungsenna chu a cho suok nasa lem a nih.
34. Ahab inlal laiin Bethel mi Hiel chun Jeriko a bawl tha a. LALPAN Nuna naupa Josua hmanga a lo hril tah angin, a lungphum chu a nau lutir Abiram chanin a phum a, a kul kotkharhai chu a nau tlum tak Segub chanin a'n din bok a.
←  1Kings (16/22)  →