←  1Kings (15/22)  →
1. Nebat naupa Jeroboam inlala inthoka kum sawm le kum rieta chun Abijak chu Judahai chunga lalah a hung um tan a.
2. Jerusalemah kum thum a'n lal a, a nu hming chu Maaka a na, Absalom naunu a nih.
3. A pa ang bokin thil suol a thaw ve a; a pu Davidan a lungril a pek zo angin a lungril chu LALPA a Pathien tieng a pek zo ve nawh.
4. Sienkhom Davida zarin LALPA a Pathien chun Jerusalema roreltu ding pein, ama hung thlaktu ding naupa a'n dinpek a, Jerusalem khuo a'n din nghet bok a.
5. Hit mi Uria chunga thil suol a thaw ti chauh naw chu Davida chun LALPA thupekhai a bawsiet ngai naw a, LALPA mithmuah thil tha a thaw hlak.
6. Abija dam sungin Rehoboam le Jeroboam chu an indo zing a.
7. Abija inlal sunga thil tlung danghai le a thilthawhai chu Juda lalhai inlal lai chanchin inziekna lekhabuah a chuong. Abija le Jeroboam chu an indo hlak a.
8. Chun, Abija chu a thlatuhai kuomah a chawl a, Davida khawpuia chun an phum a, a naupa Asa chun a lalna chu a hung hluo a.
9. Israelhai lal Jeroboam inlala inthoka kum sawmhninaah Asa chu Judahai lalah a hung um tan a.
10. Kum sawmli le kum khat Jerusalemah a'n lal a, a pi hming chu Maaka a na, Absalom naunu a nih.
11. Asa chun a pu Davida ang bokin LALPA mithmuah thil fel a thaw hlak a.
12. Pasal inzorhai chu a rama inthokin a hnot suok a, a pa le puhai milem siem po po chu a pei hmang vong bok a.
13. A pi Maaka chen khom pathiennu Asera lem tirdakum tak a'n siemtir leiin lalnu nu a ninaa inthokin a ban a, a thing milem insiemtirhai chu a phur thluk a, Kidron vadungah a raw a.
14. An hmun sanghai chu thiekpek naw sienkhom a dam sungin a lungril po po chu LALPA tieng a ngha tlat a.
15. A pain a lo inhlan tah le ama ngeiin a lo inhlan tah tangkaruo le rangkachak le thil danghai chu LALPA tempulah a lak lut a.
16. Juda lal Asa le Israel lal Baasa chu an inlal sung po an indo hlak a.
17. Israel lal Baasa chun Judahai a hang bei a, Judahai lal Asa rama inthoka tu khom hung luta an suok thei nawna dingin Rama khuo chu kulin an huontir a.
18. Chun, Asa chun LALPA tempula mi le ama lal ina mi tangkaruo le rangkachak um po po chu a lak suok a, a siehlawhai kutah a'n chawitir a, Damaska khuoa um Aram lal, Hezion naupa Tabrimon naupa Ben Hadad kuomah a tir a.
19. A kuoma chun, "I pa le ka pahai an indo hlak leiin nang le kei inkarah inremna thuthlung siem ei tih. En ta, tangkaruo le rangkachak thilpek khom ka hung thon hi. Israel lal Baasa hi ka rama inthoka a'n hnuk dokna ding chun ama le in inkara thuthlung i lo siem tah kha tu hin sut el rawh" tiin thu a thon a.
20. Ben Hadad chun Lal Asa thu chu a remti a, chuongchun Israel khuohai chu bei dingin a sipai kawmandarhai a tir a, Ijon khuo dam, Dan khuo dam, Abel Beth Maaka khuo dam, Kinneret biel po po le Naftalia ram po po chu an bei a.
21. Chu thu chu Baasa-in a hriet charin Rama khuo kula a'n huon lai chu a tawpsan a, Tirza tieng a kir nawk ta a.
22. Chu phing leh Lal Asa chun Judai ram po poah thu a thon vel a, Baasa-in Rama khuo inhuonna dinga thing le lung a hmanghai chu tu khom a awl um loin an thak ta mur mur a, chuonghai chu Lal Asa chun Mizpa khuo le Benjamin rama Geba khuo siemna dingin a hmang a.
23. Lal Asa inlal laia thil tlung danghai le a thilthawhai po po le a khaw siemhai chanchin chu Juda lalhai chanchin inziekna lekhabuah a chuong. Sienkhom a tar tieng chun a keah hri tha lo a hung invoi a.
24. Asa chu a thlatuhai kuomah a chawl a, Davida khawpuiah a thlatuhai lai an phum a. A naupa Jehosafat chun a lalna chu a hung hluo a.
25. Jereboam naupa Nadab chu Juda lal Asa inlal kum hninaah Israel lalin a hung um a, Israelhai chungah kum hnih a'n lal a.
26. LALPA mithmuah thil tha lo tak a thaw hlak a, a pa lam hraw chu a hraw ve a, Israelhai chu thil suol a'n thawtir ve a.
27. Chun, Isakar sungkuo laia mi Ahija naupa Baasa chun a phier ruk a, Nadab le Israelhai po poin Filistinhai khuo Gibethon an inhuol lai chun Nadab chu a that a.
28. Juda lal Asa inlal kum thumnaa Baasa-in Nadab a that chun a hmunah lalin a um nghal a.
29. Lal a hung ni charin Jeroboam sungkuo po po chu a that ram vong a. LALPAN a siehlaw Silo khaw mi Ahija hmanga a lo hril tah ang khan, Jeroboam sungkuoa mi a'n thuok thei taphot chu hla hrim a nei nawh.
30. Jeroboam thil suol thaw chun Israelhai chu a thuoi suol a, chu chun LALPA, Israelhai Pathien a suklungsen a nih.
31. Nadab inlal sunga thil tlung danghai le a thilthawhai po po chu Israel lalhai inlal lai chanchin inziekna lekhabuah a chuong.
32. Juda lal Asa le Israel lal Baasa chu an inlal sung po an indo a nih.
33. Judahai lal Asa inlala inthoka kum thumnaa chun Ahija naupa Baasa chu Tirza khuoah Israelhai chungah an lal tan a, kum sawmhni le kum li a'n lal a.
34. LALPA mithmuin thil tha lo tak a thaw hlak a, Jeroboam ang boka Israelhai chu suolna lampuia thuoitu le thil suol inthawtirtu a nih.
←  1Kings (15/22)  →