← 1Kings (14/22) → |
1. | Chuong lai chun Jeroboam naupa Abhija chu a hung damnaw ta a. |
2. | Jeroboam chun a nuhmei kuomah, "Inthok la, Jeroboam nuhmei i nih ti an hriet thei nawna dingin inchei danglam la, Silo-ah fe rawh. Chu taka chun zawlnei Ahija a um a, ama chu hi mihai chunga lala ka la hung um ding thu mi hriltu kha a nih. |
3. | Bei tluon sawm le kek iemani zat le khuoizu bur khat chawi la, a kuomah va fe la, naupang um dan ding chu lo hril a ti che" a ta. |
4. | A hril angin Jeroboam nuhmei chun a thaw a, Silo-a Ahija inah a fe a. A upat leiin Ahija mit chu a'n thim ta a, khuo a hmu thei ta nawh. |
5. | Amiruokchu, LALPAN Ahija kuomah, "Jeroboam nuhmei chu a naupa damnaw chungthu indon ding chein a hung mek a, chu chu kha kha tiin i lo hril ding a nih. A hung pha chun mi dang ni awm takin hung insiem a tih" a ta. |
6. | Chun, Ahija chun kotkhara a hung pen lut lai ri a hriet charin, "Nang Jeroboam nuhmei, hung lut raw khai. Ieng dinga mi dang anga i'n siem am a na? Chanchin tha naw tak hril ding chea tir ka nih. |
7. | Kir nawk ta la, Jeroboam kuoma chun "LALPA, Israelhai Pathien chun hieng hin a tih: 'Mipuihai laia inthokin ka chawisang che a, ka mi Israelhai chungah hotuah ka siem che a, |
8. | Davida sungkuohai ram ka lakpek a, chu chu ka pek che a, sienkhom nang ruok chu ka siehlaw Davida angin i um ve nawh; ama ruok chun ka thupekhai a zawm a, ka mithmuah thil tha chauh thaw a tum a, a lungril po poin a mi zui hlak. |
9. | Nang ruok chun i hmaa mihai po po nekin thil suol i thaw nasa lem a, lungsen dinga mi cho phawkin, hnam dang pathienhai lem thirin i siem a, hnung tieng i mi nghatsan a. |
10. | Chuleiin, Jeroboam sungkuoah sietna hung intlungtir ka ta. Jeroboama inthoka nau pasal pieng taphot chu, bawia um amanih zalena um amani khom, sukram vong ka ta, miin ek tawng a raw fai vong hma khata a raw angin Jeroboama sungkuo chu raw fai vong ka tih. |
11. | Jeroboam sungkuoa mi, khawpuia thi taphot chu uiin fang an ta, ram hnuoia thi taphot chu chungleng vatehaiin tlan an tih. Chu chu LALPA thu a nih' tiin hril rawh. |
12. | "Chuongchun, tho la, i in tieng kir nawk el ta rawh. Khawpui sung i kein i sir charin naupang chu thing a tih. |
13. | Ama chu Israelhai po poin sun an ta, vui an tih, Jeroboam sungkuo lai ama chauh chu thlana phum hlaw ding um sun chu a nih. Jeroboam sungkuo lai hin ama chunga chauh hin thatna iemani LALPA Israelhai Pathien chun a hmu a nih. |
14. | "Voisun la la hin Jeroboam sungkuo sukbohmangtu ding LALPAN ama ta dingin Israelhai lal ding hung indin suok a tih. Voisun ngei hin tie! Tak tak maw? Ni e, tu ngei el hin tie! |
15. | LALPAN Israel chu vuong a ta, va kama phairuong ang elin inhning an tih. LALPA chu suklungsen a, pathiennu Aser lem thinghai siema an phun leiin, an puhai a lo pek tah, hi ram tha taka inthok hin Israelhai chu pot suok fai vong a ta, Eufretis Vadungpui rala chen la sukdar vong a tih. |
16. | Jeroboamin thil suol a thawhai lei le Israelhai khom thil suol a'n thawtir leiin, Israelhai chu nghatsan a tih" a ta. |
17. | Chuongchun, Jeroboam nuhmei chu a tho a, a suok a, Tirza khuo tieng a pan a, an sumphuk a tlung charin naupang chu a thi a. |
18. | LALPAN a siehlaw zawlnei Ahija hmanga a hril tah angin an phum a, Israelhai po poin an sun a. |
19. | Jeroboam inlal laia thil tlung dang hai, a ral bei thu dam le a rorel danhai chu Israel lalhai chanchin inziekna lekhabuah a chuong. |
20. | Kum sawmhni le kum hni sung ro a rel hnungin a thlatuhai kuomah a chawl a, a naupa Nadab chun a lalna chu a hung hluo a. |
21. | Solomon naupa Rehoboam chu Judai ramah lalin a um a, a hung inlal chun kum sawmli le kum khat mi a na, LALPAN a hming umna dinga Israel hnamhai khuo po po laia a thlang khawpui Jerusalema chun kum sawm le pasari a'n lal a, a nu hming chu Naami a na, Amon mi a nih. |
22. | Judahai chun LALPA mithmuah thil suol an thaw a, an thlatuhai po po khuma an suol lei chun a thikthu an chok tho a. |
23. | Hmun sang siemin, muol bawk insangna deu taphot le thingbuk inzar thatna taphotah lung ser le pathiennu Asera lem thinghai chu an phun a. |
24. | A ram sunga chun pasal inzorna buk dam siemin, Israel thlahai hmaa LALPAN a hnot suok tah hnamhai ang bokin thil tirdakum tinreng an thaw ve a. |
25. | Lal Rehoboam inlala inthoka kum nganaah Aigupta lal Sisak chun Jerusalem a hung run a. |
26. | LALPA tempula rosum le lal ina rosumhai chu a lak fai vong a, Solomon siem rangkachak phawhai po po khom a lak sa bok a. |
27. | Lal Rehoboam chun a aiin dar phaw a siem a, lal in kot vengtu kawmandarhai chu a'n koltir a. |
28. | LALPA tempulah lal a fe pha leh vengtuhai chun dar phaw chu an chawi a, an hung kir pha leh vengtuhai pindana a siena hmuna chun an thak kir nawk hlak a. |
29. | Rehoboam inlal sunga thil tlung danghai le a thilthaw po po chu Juda lalhai inlal lai chanchin ziekna lekhabuah a chuong. |
30. | Rehoboam le Jeroboam chu indo zing zinga khawsa an nih. |
31. | Chun, Rehoboam chu a thlatuhai kuoma chun a chawl a, Davida khawpuiah a thlatuhai lai an phum a. A nu hming chu Naama a na, Amon mi a nih. A naupa Abija chun a lalna chu a hung hluo a. |
← 1Kings (14/22) → |