←  1Kings (13/22)  →
1. Maichama Jeroboamin inthawina inhlan dinga a ngir lai chun LALPA thuin Judai rama inthokin Bethela chun Pathien mi a hung a.
2. LALPA thuin maicham chu a'n riem khum a, "Aw maicham, maicham, LALPA chun, 'Ngai ta, Davida sungkuoa inthokin naupa a hming Josia hung pieng a ta, i chunga rimtui raw hlaktuhai le hmun sanga thiempuhai hi i chunga ngei hin inthawina dingin la hung hmang a ta, i chunga hin mihriem ruhai an la hung raw ding a nih' a tih" tiin.
3. Chun, chu ni vek chun inchikna a pek a: "Hi hi inchikna dinga LALPA thu puong chu a nih: maicham hi koi phok a ta, a chunga meivap hi inbaw vong a tih" a ta.
4. Pathien miin Bethela maicham a'n riem khum lai ri lal Jeroboamin a hriet chun "Man ro" a ta, maichama inthok chun kutin a hang ban a. Man tuma a banna ban chu a'n kon nghal a, a lak kir thei ta naw a.
5. Maicham chu a'n phel phok a, LALPA thua Pathien miin inchikna a pek ang khan, meivap chu an baw ta vong a.
6. Chun, lal chun Pathien mi kuomah, "Ka ban hi a hung that nawk theina dingin LALPA i Pathien kuomah tongtaiin mi hnipek rawh" a ta. Chuongchun, Pathien mi chun a hnipek a, lal kut chu a hmaa ang bokin a hung pangngai nawk ta a.
7. Lal chun Pathien mi kuomah, "Ka in tieng ka kuomah hung la, bu dam fa la, thilpek khom peng ka ti che" a ta.
8. Pathien mi chun lal kuomah, "I thil nei po po zatve mi pe ding ni la khom i inah hung naw ning. Hi hmuna hin bu fain tui dawn bok naw ning.
9. LALPA chun, 'Ieng khom fain i dawn ding a ni naw a, i hungna lampui hrawin i hung kir nawk ding a ni bok nawh' tiin thu a mi pek a nih" a ta.
10. Chuongchun, Bethela a hungna lampui chu hraw ta loin lam dangah a kir a.
11. Chun, Bethela chun zawlnei putar pakhat hi a um a, a nauhai chun chu nia Bethela Pathien mi thilthaw po po le lal kuoma a hril chu a kuomah an hril sawng a.
12. An pa chun, "Khaw tieng lam am a hraw a?" a ta, a nauhai chun Judai rama inthoka hung Pathien mi kirna tieng lam chu an kawkhmu a.
13. A nauhai kuoma chun, "Sabengtung mi buotsaipek ro" a ta, an buotsai a, sabengtung chunga chun a chuong a.
14. Pathien mi chu a hnot zui a, saisaw thing hnuoia a lo chawl lai chu a hnot phak a, a kuomah, "Judai rama inthoka hung Pathien mi chu i ni maw?" a ta, ama chun "Ni e" a ta.
15. Zawlnei chun, "Ka inah hung la, bu dam hung fa raw khai" a ta.
16. Pathien mi chun, "Kirin nang ka zui thei naw che a, hi hmuna hin fain ka dawn thei bok nawh.
17. LALPA thu chun, 'Chu taka chun bu fain tui i dawn ding a ni naw a, i va fena lam pangngaia chun i hung kir nawk ding a ni bok nawh' tia hril ka ni si a" a ta.
18. Zawlnei putar chun, "Nangma ang boka zawlnei ka ni ve hi. Vantirkoin ka kuomah 'Faa a dawn theina dingin i in tieng hung thuoi kir nawk rawh' tiin LALPA thu chu a mi hril a nih" tiin thukhel a hril a.
19. Chuongchun, Pathien mi chu a in tieng a kirpui a, a ina chun fain a dawn a.
20. Chuonga dawkan kila an thung lai chun a thuoi kirtu zawlnei putar kuoma chun LALPA thu a hung tlung a.
21. Judai rama inthoka hung Pathien mi kuoma chun inring takin, "LALPA thu a hung tlung a, 'LALPA thu chu i kal a, LALPA i Pathien thupek che chu i zawm naw a,
22. i hung kir nawk a, faa dawn der lo dinga a tina che hmuna ngei chun bu faa tui i dawn leiin, i ruong chu i thlatuhai zalna hmunah phum ni ve naw nih' tiin a hril a nih" a ta.
23. Chun, LALPA miin faa a dawn zo chun a hung thuoi kirtu zawlnei chun sabengtung a buotsaipek a.
24. A hang fe chu lam lakah sakeibaknei leh an intuok a, a lo se hlum a, a ruong chu lampuia chun a thalin a zal a, a ruong sir khing tieng chun sabengtung chu a ngir a, khing tieng panga chun sakeibaknei chu a ngir ve zing bok a.
25. Chun, chu lam hung hraw mi thenkhatin lampuia ruong zal le a bula sakeibaknei ngir zing an hmu thu chu zawlnei putar umna khuoa mihai chu an va hril a.
26. Lam laka va thuoi kirtu zawlneiin chu thu a lo hriet chun, "Pathien mi, LALPA thu awi nuom nawtu kha a ni chu. LALPA thuin a hril angin, LALPAN sakeibaknei kutah a pek a, a lo tham a, a se hlum a ni chu" a ta.
27. A nauhai kuoma chun, "Sabengtung mi buotsaipek ro" a ta, an buotsaipek a.
28. Chuongchun, a fe a, lam laia a thala ruong zal le a bula sakeibaknei le sabengtung ngir zing chu a va hmu a, sakeibaknei chun ruong chu a la fak naw a, sabengtung khom chu ieng khom a law bok nawh.
29. Chuongchun, zawlnei chun Pathien mi ruong chu a'n hlawm a, sabengtung chunga chun a hlang kai a, a kirpui a, zawlnei putar khuoa chun sun ding le vui dingin a lutpui a.
30. Chun, ruong chu ama thlanah a'n zaltir a, "A va poi ngei de aw, ka unaupa" tiin a ta a.
31. A vui hnung chun a nauhai kuomah, "Ka thi pha chu Pathien mi zalnaa hin mi hung phum ve un la, a ru bula hin ka ruhai hung inzaltir ve ro.
32. Pathien thua Bethela maicham le Samari ram khawpui hmun sanga in po pohai a'n riem khumna thu kha a hung tlung indik ngei ngei ding a ni si a" a ta.
33. Chuong thil po po hnunga khom chun Jeroboam chun a um dan suolhai chu a la bansan chuong naw a, hmun sanga thiempu dingin vantlang mi a nuom nuom a la ser hrang ta zing a.
34. Chu chu Jeroboam sungkuo suolna, an tlukna siemtu le khawvela inthoka sukbohmangtu chu a nih.
←  1Kings (13/22)  →