←  1Kings (12/22)  →
1. Rehoboam chu Sekem khuoah a fe a, Israel mihai po po khom chu lala siem dingin chu taka chun an fe ve a.
2. Nebat naupa Jeroboam, lal Solomon leia Aigupta rama tlan hmang chun chu ri chu a lo hriet a, Aigupta rama inthokin a kir nawk a.
3. Israel mi pungkhawmhai po po chun Jeroboam chu an ko a, ama rawiin Rehoboam kuomah an fe a,
4. "I pa khan kan phur a sukrik taluo a, inrim taka a mi sorna le ringkol rik tak a min phurtir hi tuhin mi sukzangpek la, i rong bawl kan tih" an ta.
5. Rehoboam chun, "Kir nawk ta inla, ni thum hnungah hung nawk ro" a ta. Chuongchun, mipuihai chu an fe hmang ta a.
6. Lal Rehoboam chun a pa Solomon dam sung po poa a hnuoia sinthaw hlak upahai chu a rawn a, "Hieng mipuihai hi iengti anga don dingin am in ngai a?" a ta.
7. Anni chun, "Voisun hin an siehlawah um a, an rong bawl a, tha taka i don tawl phot chun kumkhuoin i siehlawah um an tih" an ta.
8. Sienkhom, upahai remruotpui chu Rehoboam chun pom loin, ama ruoltlakpui tlangval ruol, a bula khawsa hlakhai chu a rawn lem a.
9. An kuomah, "Iem in ngaidan ve chu? Mipuihaiin, 'I pa ringkol min phurtir hi mi sukzangpek deu rawh' an ti hi iengtin am ei don ding a na?" a ta.
10. A ruolchamhai chun, "Hieng mipuihai kuoma hin, 'I pa ringkol mi'n phurtir hi mi sukzangpek rawh' tia hung hriltuhai kuomah hieng hin hril rawh: 'Ka kutte hi ka pa kawng nekin a lien lem.
11. Ka pa khan phur rik tak a'n phurtir cheu a, kei chun in phur chu ka sukrik zuol ding a nih. Ka pa khan vuokna hruolin a hrik hlak cheu a, kei ruok chun khawmuol kaikuongin ka hrik ding cheu a nih' tiin hril rawh" an ta.
12. Lalin, "Ni thum hnungah hung nawk ro" a ti angin ni thum hnungah Jeroboam le mipuihai po po chu Rehoboam kuomah an hung nawk a.
13. Lal chun upahai thurawn a lak naw leiin mipuihai chu inrum takin a lo biek a.
14. Tlangvalhai remruotpui angin, "Ka pa khan in phur a lo sukrik a, kei chun ka sukrik zuol ding a nih. Ka pa khan vuokna hruolin a hrik hlak cheu a, kei ruok chun khawmuol kaikuongin ka hrik ding cheu a nih" a ta.
15. Chuong ang chun mipuihai thu chu lal chun a ngaithlak nuom nawh; chu thil hung tlung chu LALPAN Silo mi Ahija hmanga Nebat naupa Jeroboam kuoma a lo hril tah chu sukdikna dinga LALPA thilthaw a nih.
16. Lal chun an thu a ngaithlak nuom der nawh ti Israelhaiin an hriet hnung chun lal kuomah,"Davida lakah iem chanvo kan nei hrim a?Jessai naupa lakah rochan iem kan nei ve a? Aw Israelhai, in puon in tieng kir nawk ta ro.Aw Davida, i sungkuo chu nangin enkol ta rawh" an ta. Chuongchun, Israelhai chu in tieng an kir ta rip a.
17. Judai ram khuoa um Israelhai ruok chu Rehoboam inlalna hnuoiah an la um zing a.
18. Lal Rehoboam chun sinthawa sor luihai inrawitu Adoniram chu a tir a, Israelhai chun lungin an lo deng hlum a. Lal Rehoboam ruok chu a tawlailirah a lut hman hram a, Jerusalem tieng a tlan sie a.
19. Chuongchun, Israelhai chu Davida sungkuo lakah tu chen hin an hel tah a nih.
20. Israel mihai chun Jeroboam a hung kir nawk tah ti an hriet chun, an pungkhawmnaa hung dingin an ko a, Israelhai chunga lalah an siem a. Juda hnam chauh naw chu Davida sungkuo tienga thang an um ta nawh.
21. Rehoboamin Jerusalem a hung tlung chun Israel sungkuohai chu do a, Solomon naupa Rehoboam ta dinga la let nawk dingin Juda hnama mi le Benjamin hnama mihai laia mi huoisen thlang bik mi nuoi khat le sing riet a khawm a.
22. Amiruokchu Pathien mi Semai kuomah Pathien thu a hung tlung a,
23. "Judai ram lal Solomon naupa Rehoboam kuoma le Juda le Benjamin sungkuo po pohai kuoma le mi danghai kuoma khom,
24. LALPAN hieng ang hin a hril: Hang fe naw ro, Israel thla, in unauhai chu hang do der naw ro, mani in tieng fe vong ro. Hi thil hi keima thaw a nih' tiin hril tawl rawh" a ta. Chuongchun LALPA thu chu an awi a, LALPA ti ang chun an kir ta vong a.
25. Chuongchun, Jeroboam chun Efraim tlangrama Sekem khuo chu kulin a'n huon a, chu taka chun sawt naw te a um a. Chu taka inthok chun a suok nawk a, Peniel khuo chu kulin an huon nawk a.
26. Jeroboam chun a lungrilin, "Tuhin lalram hi Davida sungkuoa kir nawk el theia um a nih.
27. Hienghai hi inthawi dinga LALPA Tempula an hang fe pha chun an lalpa, Judai ram lal Rehoboam tieng an lungril thle nawk a ta, kei mi that an ta, lal Rehoboam tieng pakai nawk el an tih" tiin a'n ngaituo a.
28. Chuongchun, lal chun mi a rawn a, rangkachak bawngte lim pahni a siem a, an kuomah, "In ta dinga Jerusalema hang fe chu a hautak taluo. Aw Israelhai, en ta u, Aigupta rama inthoka thuoi suoktu cheu in pathienhai hi" a ta.
29. Pakhat chu Bethelah a sie a, a dang chu Dan-ah a sie bok a.
30. Chu chu thil suol inthawtirtu a hung ni ta a, mipuihai chun a pahnia be dingin Bethel le Dan chen chen khom an fe el ta si.
31. Jeroboam chun hmun sangah in dam a bawl a, Levi thlaa mi ni lo vantlang laia mi a nuom nuom thiempuah a siem a.
32. Judai rama kut an hmang hlak ang bokin a thla rietna, ni sawm le ni ngana chu Jeroboam chun kut niah a ruot a, maichama chun inthawina a'n hlan a. Chu chu Bethelah a thaw a, a bawngte lem siem kuoma chun inthawina a'n hlan a, hmun sanga ding thiempu a ruothai chu Bethela chun a sie bok a.
33. Amain a nuom anga a ruot thla ngei, thla rietna, ni sawm le ni nganaah Bethela maicham a siema chun a hang inthawi a. Chuong ang chun, Israel thlahai ta dinga kut ruotin, maichama chun thilpek a hang inhlan a nih.
←  1Kings (12/22)  →