1Kings (11/22)  

1. Solomon chun Faraw naunu chauh naw khom nuhmei dang tam tak Moab mi dam, Amon mi dam, Edom mi dam, Sidon mi dam, Hit mi dam a hmangai a.
2. Chuong hnamhai chu an nih LALPAN Israelhai kuoma, "Anni leh innei pol naw ro, an pathien tieng innghattir ngei ngei an ti cheu" tia a lo hril chu. Chuong sa khom chun Solomon chun nghet takin a hmangai tawl tlat si a.
3. Lal naunu ringot khom nuhmei zasari a nei a, hmei zathum a nei bok a, a nuhmeihai chun a lungril an thuoi kawipek ta a.
4. A hung upat hnung chun Solomon lungril chu a nuhmeihaiin pathien dang tieng an inpettir a, a pa Davidan lungril po po LALPA Pathien tieng a pek ang khan a pek ve ta naw a.
5. Sidonhai biek pathiennu Astoret dam le Amonhai pathien tirdakum Moleki dam a zui ve el ta a.
6. Solomon chun LALPA mithmuin thil suol a lo thaw ta a, a pa Davidan LALPA a zui angin a zui pumhlum zo ta nawh.
7. Chuongchun, Jerusalem suo tieng muolah Solomon chun Moab-hai pathien tirdakum Kemos ta ding le Amon-hai pathien tirdakum Molek ta dingin hmun sangj a siem a.
8. Chuong ang bokin hnam dang mi a nuhmeihai ta ding sengin an pathienhai kuoma inthawina le rimtui inhlanna ding hmun sang a siempek bok a.
9. LALPA Israelhai Pathien, a kuoma voi hni zet hung inlar tah chu Solomonin a lungrila a nghatsan tak leiin a chungah LALPA a lungsen hle a.
10. Pathien danghai zui lo dingin khap sienkhom Solomon chun LALPA thupek chu a zawm si nawh.
11. Chuongchun LALPAN Solomon kuomah, "Hieng hi i khawsak dan a lo ni ta a, ka thuthlung le thuruothai zawm dinga thu ka pekhai che chu i zawm nuom si naw leiin i kuta inthokin i lalram hi lapek ka ti che a, i hnuoia mi pakhat kuomah peng ka tih.
12. Amiruokchu, i pa Davida zarin, chuong thil chu i dam lai em chun thaw naw ning, i naupa kuta inthokin la hmang lem ka tih.
13. I pa Davida zar le ka khawpui thlang Jerusalem zarin, a ram pumpui chu lapek vong loin hnam khat chu la pe hram ka tih" a ta.
14. Chuongchun, Edom mi Hadad, Edom lal sungkuoa inthoka hung suok chu Solomon hmelmaah LALPA chun a hung indin suok a.
15. Chu hma chun, Davidan Edom mihai a do laiin an mithihai phum dinga hang fe a sipai kawmandar Joab chun Edom mihai chu a that vong a,
16. Edom rama pasal po po an that vong hma khat chu Joab le Israel mihai chu thla ruk zet Edom ramah an inkul a nih.
17. Chu lai chun Hadad chu naupang te chauh a la ni a, a pa hnuoia sinthawtuhai leh Aigupta ramah an tlan a.
18. Midian rama inthokin an suok a, Paran-ah an fe a, Parana inthok chun mi thuoiin Aigupta an pan a, Aigupta lal Faraw chun in le ram pein, fak ding a lo ngaituopek a.
19. Hadad chun Faraw mit a tlung em leiin a nuhmei, lalnu Tapenes sangnu chu nuhmeiah a'n neitir a.
20. Tapenes sangnu chun naupa a hming Genubat a neipek a, Tapenes chun a enkol a, Faraw nauhai lai chun a khawsa ve ta a.
21. Lal Davida chu a thlatuhai lai a chawl tah ti le a sipai kawmandar Joab khom a thi tah ti Aigupta rama inthoka Hadad-in a lo hriet chun Faraw kuomah, "Ka rama ka kir nawk theina dingin ka suok mi phalpek rawh" a ta.
22. Faraw chun a kuomah, "Ka kuoma i um hin iem tlaksam i nei a, chuonga i ram tienga kir nawk i nuom el chu?" a ta. Hadad chun, "Tlaksam lem chu ieng khom ka nei nawh, sienkhom mi'n fetir hrim hrim raw khai" a ta.
23. Chun, Eliada naupa Rezon, a pu Zoba lal Hadadezer kuoma inthoka tlan hmang chu Pathienin Solomon hmelmaah a hung indin bok a.
24. Davidan Zoba sipaihai a that lai khan ama chun mi a khawm a, chuong helpawlhai thuoitua chun a thang a, Damaska khuoah an fe a, an hne a, ama chu lalin a um a.
25. Hadad-in buoina a siem bakah Solomon dam sung po po chun Rezon chu Israelhai hmelma a ni zing a, Aram-ah lalin a um a, Israelhai a theida hle a.
26. Chun, Nebat naupa Jeroboam khom Solomon lakah a hel a. Ama chu Efraim mi, Zeredaa inthoka hung, Solomon thoktu laia pakhat a na, a nu Zarua chu hmeithai a nih.
27. Solomon laka a hel dan chanchin khom hieng ang hin a nih: Solomon chun lal in innghatna thut zawl do nghettu ding a siem bakah a pa Davida khawpuia kul inhuonna bang se lai po po chu a thol tha a.
28. Jeroboam chu mi huoisen hmingthang a na, tlangval taima tak a nih ti Solomonin a hmu chun Josefa sungkuoa sinthawa sor luihai po po chunga hotuah a sie a.
29. Chuong hun lai chun Jeroboam chu Jerusalema inthokin a suok a, Silo khuoa zawlnei Ahija, silfen thara inthuom chun lam lakah a lo hmu a, an pahni chauin ram hnuoia chun an um a.
30. Ahija chun a hak lai silfen thar hlok chu phel sawm le phel hniin a pot thler a.
31. Ama chun Jeroboam kuomah, "Phel sawm hi la rawh. LALPA Israelhai Pathien chun hieng hin a hril: 'Ngai rawh, lalram hi Solomon kuta inthokin ka lak hmang ding a na, hnam sawm chu ka pek ding che a nih.
32. Amiruokchu, ka siehlaw Davida le Israel thla po pohai khawpui laia ka khawpui thlang bik Jerusalem zarin hnam khat chu la chang a tih.
33. Ama chun a mi nghatsan a, Sidonhai pathiennu Astoret dam, Moab-hai pathien Kemos dam, Amon thlahai pathien Molek dam a biek a, a pa Davida anga khawsa loin, ka lampui a hraw naw a, ka mithmuah thil indik lo a thaw a, ka thupekhai le ka danhai a zawm bok nawh.
34. Sienkhom, a pa Davida, ka siehlaw le ka thlang, ka thupekhai le thuruothai zawmtu zarin a ram pumpui ruok chu Solomon kuta inthokin lakpek nawng ka ta, a dam sung bek chu lalah inumtir ka tih.
35. A naupa kuta inthokin lalram chu lapek ka ta, hnam sawmhai chu ka pek ding che a nih.
36. Amiruokchu, ka hming umna dinga ka thlang Jerusalema hin ka siehlaw Davida thlahaiin roreltu an nei zing theina dingin a naupa kuomah hnam khat chu la pe hram ka tih.
37. Nang ruok hi chu ka ruot che a, i nuom dan ang takin ro rel i ta, Israelhai chungah lal ning i tih.
38. Thu ka pekhai che po po anga thaw a, ka lampui hraw a, ka siehlaw Davidan a thaw anga ka thuruothai le thupekhai kengkaw a, ka mithmuah thil indik i thaw phot chun i kuomah um ka ta, Davida ka'n din nghet ang bok khan i sungkuo indin nghet ka ta, Israelhai hi peng ka ti che.
39. Hi lei hin Davida thlahai chu suktlawm ka ta, sienkhom kumkhuo chun ni naw nih' a tih" tiin.
40. Chuongchun, Solomon chun Jeroboam chu that a tum a, sienkhom Aigupta lal Sisak kuomah a tlan a, chu taka chun Solomon thi hma khat chu a um ta zing a.
41. Solomon inlal sunga thil tlunghai, a thilthaw po po le a varna thuhai chu Solomon chanchin inziekna buah a chuong.
42. Solomon chun Jerusalema inthokin Israelhai chungah kum sawmli ro a rel a.
43. Chuongchun, Solomon chu a thlatuhai kuomah a chawl a, a pa Davida khawpuia chun an phum a, a naupa Rehoboam chun lalna chu a hung hluo ta a.

  1Kings (11/22)