1Kings (1/22)  →
1. Lal Davida a hung upat hnung le tar tieng chun puon an inthuo teu khomin a pang a lum thei chuong der naw a.
2. A siehlawhai chun, "Lal enkoltu ding le dontu ding nunghak thienglam zongpek ei tiu khai. Ama'n zalpui sien la, ei pu pang chu hung lum el a tih" an ta.
3. Chuongchun, Israel ram sung po poa chun nunghak hmel tha an zong a, Sunam mi nunghak hmel tha deu el Abishag an hmu a, lal kuomah an hung thuoi a.
4. Nunghak hmel tha tak el a na, lal chu a enkol a, a um ngha a, sienkhom lal chun a pawl nawh.
5. Chun, Hagit laka Davida naupa Adonija chun, "Kei hi lala um ding tak chu ka nih" a ta, a hmang dingin tawlailir le sakorhai a buotsai a, a hmaa tlantu ding mi sawmnga a ruot bok a.
6. A pa chun, "Ieng leia hieng thil hi i thaw am a na?" tiin a lo inrol chuong nawh. Ama chu Absalom sang, a dottu char, tlangval hmel tha tak a nih.
7. Adonija chun Zeruia naupa Joab le thiempu Abiathar hai chu a rawn a, ama tieng an thang a.
8. Sienkhom thiempu Zadok hai, Jehoiada naupa Benaia hai, zawlnei Nathan hai, Simei hai, Rei hai le Davida vengtu mi huoisenhai ruok chun Adonija chu an zui nuom ve nawh.
9. Adonija chun beram le bawng, a ran chawm thauhai chu En Rogel bula um Zohelet lungpuia chun a that a, inthawina a'n hlan a, chu taka chun lal nau, a unauhai po po le Judai rama lal khawnbawlhai po po chu a fiel khawm a,
10. sienkhom zawlnei Nathan hai, Benaia hai, lal vengtu mi huoisenhai le a unaupa Solomon hai ruok chu a fiel ve nawh.
11. Chun, zawlnei Nathan chun Solomon nu Bathseba kuomah, "Ei pu Davida hriet loin Hagit naupa Adonija chu lalin a um tah ti i lo hriet ve am?
12. Tu hin nangma him dan ding le i naupa Solomon him thei dan ding chu hril ka ti che.
13. Lal kuomah lut la, a kuomah, 'Aw lalpa, ka pu, i naupa Solomon hi i hnunga lal hung ni ngei ding le i lalthungpha hung hluo ngei dingin i bawinu kuomah inkham meuin thu i tiem tah a ni naw am a ni? Iem a ta tu hin Adonija chu lalah a um el ta hi?' va ti rawh.
14. Lal i biek lai zingin kei khom hung lut veng ka ta, i thu hril chu hung namnghet ka tih" a ta.
15. Bathseba chu lal pindana chun a va lut a, lal chu a lo tar kuong el ta a, Sunam nunghak Abishag chun a rong a lo bawl a.
16. Bathseba chun dingthathuonin lal chu chibai a buk a, lal chun, "Ieng am i dit a?" a ta.
17. Ama chun, "Ka lalpa, nangma ngeiin i siehlaw kuoma hin LALPA i Pathien salin, 'I naupa Solomon chu ka hnungah lal hung ning a ta, ka lalthungpha hung hluong a tih' tiin inkham meuin thu i tiem a.
18. Ngai ta, tu hlak hin Adonija chu lalah a hung um ta a, chu chu ka pu, ka lalpa hin i la hriet si nawh.
19. Ran tam tak, bawng le beram thau tak tak inhlanin, lal naupahai po po le thiempu Abiathar le i sipai kawmandar Joab hai a fiel a, i siehlaw Solomon ruok chu a fiel sa ve nawh.
20. Ka pu, ka lalpa hnunga hin lalthungphaah tu am hung inthung a ta ti i puong hun ding chu Israelhaiin an nghak thup el a nih.
21. Chuong naw chun hieng hi hung ning a ta, ka lalpa hi a pi le puhai kuoma a chawl ve pha chun, kei le ka naupa Solomon hi thil suol thawtuah an mi ngai el ding a nih" a ta.
22. Chuonga lal a biek lai zing chun zawlnei Nathan chu a hung lut a.
23. "En ta, zawlnei Nathan khom a hung ve ie" tiin lal chu an hril a. Lal kuom a va tlung chun lal hmaah hnuoi sikin a bokkhup a.
24. Nathan chun, "Aw lalpa, ka pu, 'Ka hnungah Adonija hi lalin thung a tih i ti am a ni?
25. Voisun hin a fe thlak a, ran thau thau, beram le bawng tuoi a that teu a, lal naupahai po po, sipai lalhai le thiempu Abiathar hai a fiel a, fain an dawn tlang a, 'Pathienin Adonija huolhim raw se' tiin an khek ruol a nih.
26. Amiruokchu, i siehlaw ngei ngei kei le thiempu Zadok hai, Jehoiada naupa Benaia hai le i siehlaw Solomon hai ruok chu a mi fiel ve nawh.
27. Hi hi lalpa ka pu thua a thaw a ni si chun lalpa ka pu hin a hnunga lalthungphaa thung ding chu a tu tak hi'm a na ti i siehlawhai hi a lo hril ve naw a ni maw?" a ta.
28. Chu phing leh lal Davida chun, "Bathseba kha hung ko lut ro" a ta. Chuongchun, a hung lut a, lal hmaa chun a ngir a.
29. Lal chun, "Buoina po poa inthoka ka hringna san suoktu LALPA hringna salin ka hril a,
30. LALPA Israelhai Pathien hming sala, 'I naupa Solomon hi ka hnungah lal la ni ngei a ta, ka hmunah lalthungphaa hin la'n thung a tih' tia thu ka'n kham ang khan voisun ngei hin ka hlen suok ding a nih" a ta.
31. Bathseba chun hnuoi sika bokkhupin lal chu chibai a buk a, "Ka pu le ka lal Davida hi kumkhuoin dam zing raw se" a ta.
32. Lal Davida chun, "Thiempu Zadok le zawlnei Nathan le Jehoiada naupa Benaia hai kha hung ko lut ro" a ta, a hmaa chun an hung a.
33. Lal chun an kuomah, "In pu khawnbawlhai thuoi unla, ka naupa Solomon hi ka sabengtung chunga ngei inchuongtir unla, Gihon-ah zu fepui ro.
34. Chu taka chun thiempu Zadok le zawlnei Nathan haiin Israelhai lal dingin hriek nal hai sien la; chun, tawtawrawt mut unla, 'Lal Solomon dam sawt raw se' tiin khek ro.
35. Ama chu hung zui tung inla, ka lalthungphaa hin inthungtir unla, ka aiin ro rel raw se. Israelhai le Judahai chunga roreltu dingin ka ruot a nih" a ta.
36. Jehoiada naupa Benaia chun, "Amen! Ka pu, ka lalpa thu chu LALPA a Pathien khomin pom ngei raw se.
37. LALPA chu ka pu, ka lalpa kuomah a um hlak ang bokin Solomon kuoma khom um sien la, ka pu, lal Davida lalthungpha neka ropui lemin a lalthungpha chu siem raw se" a ta.
38. Chuongchun, thiempu Zadok hai, zawlnei Nathan hai, Jehoiada naupa Benaia hai, Keret mihai le Pelet mihai chu an zu fe a, Solomon chu Davida sabengtung chungah an inchuongtir a, Gihon-a chun an thuoi a.
39. Thiempu Zadok chun hriek siena fungki chu hmun thienghlima puon ina inthok chun a lak suok a, Solomon chu hriek a nal a. Chun, tawtawrawt an mut a, mi po po chun, "Lal Solomon dam sawt raw se" tiin an khek a.
40. Mipuihai chun ama chu an zui tung a, nasa taka lawmin theihlehai an mut a, an ri chun hnuoi a nghor nghing a.
41. Adonija le a mi fielhaiin ruoi an kil zo tawm chun ri an hriet a. Joab-in tawtawrawt ri a hriet chun, "Khawpui sunga ri so veng vung chu iem an ta leh?" a ta.
42. A hril lai zingin thiempu Abiathar naupa Jonathan chu a hung tlung a. Adonija chun, "E khai, hung lut rawh. Nang ang mi fel chun chanchin lawmum hung hawn ngei i tih" a ta.
43. Jonathan chun, "Ka hawn naw top el. Ei pu, lal Davidan lalah Solomon a sie tah annawm.
44. Solomon zui dingin thiempu Zadok hai, zawlnei Nathan hai, Jehoiada naupa Benaia hai, Keret mihai leh Pelet mihai chu a tir a, lal sabengtung chungah an inchuongtir a,
45. thiempu Zadok le zawlnei Nathanin Gihon hmunah lal dingin hriek an nal a, chu taka inthok chun hlim takin an hung kir a, an hlim ri chun khawpui a thangkhawk a, chu ri chu a nih in ri hriet chu.
46. Chun, Solomon chu tu hin a ram lalthungphaah a thung ta bok.
47. Lal khawnbawlhai chun Davida chu an hung lawmpui a, 'I Pathienin i hming nekin Solomon hming chu suktha lem sien la, i lalthungpha nekin a lalthungpha chu ropui lemin siem raw se' an ti a. Ei pu lal Davida khomin a khumah kunin Pathien a chawibiek a,
48. LALPA, Israelhai Pathien, ka lalthungphaa inthung ding mi ka hmu phak ngeia voisuna hung ruottu chu inpakin um raw se' a ti a nih" a ta.
49. Chu thu chu an hrietin Adonija mi fielhai po po chu an ti ta hle a, an tho a, an zam dar ta vong a.
50. Adonija chun Solomon a ti leiin a tho a, maicham ki a va chel a.
51. Chun, lal Solomon kuomah, "Adonija chu a ti taluo a, 'Lal Solomon chun a siehlaw hi kawlhnama sukhlum lo dingin inkham meuin voisun hin thu tiem raw se' tiin maicham ki a chel el a nih" tiin an va hril a.
52. Solomon chun, "Mi ringum a nih ti a'n langtir phot chun a sam zai khat khom hnuoiah tla naw nih; amiruokchu, a suol ti hriet suok a ni ruok chun thing a tih" a ta.
53. Chuongchun, Solomon chun mi a tir a, maichama inthokin an hung thuoi thlak a, lal Solomon chu chibai a buk a, Solomon chun, "I in tieng inlawi ta rawh" a ta.
      1Kings (1/22)  →