←  1John (5/5)    
1. Tu khom Isu hi Krista a nih ti ring taphot chu Pathiena pieng a ni a, tu khom a hringtu hmangaitu chun a hring nau khom a hmangai hlak.
2. Pathien nauhai ei hmangai ti ei hrietna chu, Pathien ei hmangai a, a thupekhai ei zawm hi a nih.
3. Pathien ei hmangai vena chu hi hi a nih: a thupekhai ei zawm hi; a thupekhai chu a khir si nawh.
4. Pathiena pieng taphot chun khawvel hi a ngam hlak. Khawvel hnea ngamna chu ei ringna hi a nih.
5. Isu hi Pathien Naupa a nih ti ringtu chauh naw chun tuin am khawvel a ngam hlak a?
6. Isu Krista hi a nih tui le thisena hung chu, tuia chauh ni loin tui le thlarauah a ni lem. A hrepuitu chu Thlarau a nih; Thlarau chu thutak a ni si a.
7. Hrepuitu pathum an um,
8. Thlarau le tui le thisen; chu pathumhai chu an inthuruol a nih.
9. Mihriem hrietpuina hman ei pom chun Pathien hrietpuina chu a ropui lem si a; Pathien hrietpuina chu, a Naupa chanchin a hung hriettir takna hi a nih.
10. Pathien Naupa ringtu chun amaah hi hrietna hi a nei a; Pathien ring nawtu chun Pathienin a Naupa chanchin an hriettir chu a ring naw leiin ama chu khelhlipah a siem a nih.
11. Hi hi a thu inhriettir chu a nih- Pathien chun chatuon hringna a mi pek a, chu hringna chu a Naupaah a um, ti hi.
12. Naupa neitu taphotin hringna a nei a, Naupa nei nawtu chun hringna a nei nawh.
13. Chatuon hringna in nei ti in hriet theina dingin nangni Pathien Naupa hming ringtuhai kuomah hieng thu hi ka ziek a nih.
14. Ama ditzawng anga ei hni taphot chu a ngaithlak hlak a, chu chu a hmaa ei tlangnel ngamna san chu a nih.
15. Ei hni taphot a ngaithlak ti ei hriet leiin, ei hni ang chu a mi pek hlak ti khom ei hriet.
16. Tu khomin thina khop ni lo suol a unauin a thaw hmu sien, tongtaiin hnipek a ta, Pathienin hringna peng a tih. Hi hi thina intlung thei khop suol ni lo thawtuhai ta ding a nih. Thina intlun thei khop suol a um a, chuong ang mi ta ding chun hnipek ro ka ti nawh.
17. Thil indik lo thaw hrim hrim hi suol a ni vong a, amiruokchu suol taphot hi thina khop suol a ni nawh.
18. Tu khom Pathiena pieng chun thil suol a thaw zui zing nawh ti ei hriet; Pathiena a piengna khan a veng him a, misuol chun a tawk thei nawh.
19. Khawvel pumpui hi Misuolpa thuhnuoia um ni sien khom, Pathien nauhai ei nih ti ei hriet.
20. Pathien Naupa chu a hung a, Pathien tak chu hre thei dingin hriet thiemna a mi pek ti ei hriet bok. Chu Pathien indik taka chun ei um- a Naupa Isu Kristaa chun. Ama chu Pathien indik tak, chatuon hringna chu a nih.
21. Nauhai, milem laka chun inthier fihlim ro.
←  1John (5/5)