1John (4/5)  

1. Dittakhai, thlarau nazong ring naw ro, zawlnei tehlem tam tak khawvelah an hung suok tah leiin thlarau chu Pathiena inthoka suok a ni le ni naw fie hlak ro;.
2. Hi hi Pathien Thlarau in hriet theina ding chu a nih: Isu Krista chu taksa ngeiin a hung ti tantu taphot Thlarau chang chu Pathiena inthoka suok a nih.
3. Isu Krista chu taksaah a hung inchang ti tan nawtu thlarau chang chu Pathiena inthoka suok a ni nawh. Chu chu Krista dodaltu thlarau, a hung ding ti in hriet lawk tah kha a ni a, tu khom hin khawvelah a um tah zing a nih.
4. Nau dittakhai, nangni ruok chu Pathiena inthoka suok in nih; nangnia um chu khawvela uma inthoka suok nekin a ropui lem leiin zawlnei tehlemhai chu in ngam tah.
5. Anni chu khawvela mi an ni a, khawvel thlir dan angin thu an hril a, chuleiin khawvelin an thu an ngaithlak hlak a nih.
6. Eini ruok chu Pathiena inthoka suok ei ni a, Pathien hretuhai chun ei thu an ngaithlak hlak; sienkhom Pathiena inthoka suokhai naw chun ei thu an ngaithlak nawh. Chuonga inthok chun Thlarau indik tak le thlarau tehlem ei hriet thei a nih.
7. Dittakhai, inhmangai tuo seng ei tiu; hmangaina chu Pathiena inthoka suok a ni si a. Tu khom hmangaina nei chu Pathiena pieng a nih; Pathien a hriet bok.
8. Hmangaina nei naw chun Pathien a hriet nawh, Pathien chu hmangaina a ni si a.
9. Pathienin a hmangaina ei kuoma a hung suklang dan chu hi hi a nih: ama zara hringna ei nei theina dinga a Naupa nei sun khawvela a hung tira hin.
10. Hi ngei hi a nih hmangaina chu: einin Pathien ei hmangai lei ni loin, aman a mi hmangai leia ei suol thawina thilhlana a Naupa a hung tir hi.
11. Dittakhai, Pathienin chuong lawma a mi hmangai chun, eini khom ei inhmangai tuo seng ding a nih.
12. Tu khomin Pathien an hmu ngai nawa chu, ei inhmangai tuo chun einiah Pathien a cheng zing a, a hmangaina chu einiah hin sukfamkimin a um a nih.
13. Amaah ei um le einiah Ama a um ti ei hrietna chu a Thlarau mi peka hin a nih.
14. Pain Naupa chu khawvel sandamtu dingin a hung tir ti ei hmu tah a, ei inhriettir ta bok a.
15. Tu khom Isu hi Pathien Naupa a nih ti tantu chu amaah Pathien a um zing a, ama khom Pathienah a um zing a nih.
16. Pathien mi hmangaina chu eini ngeiin ei hriet a, chutaka chun ei innghat a nih. Pathien chu hmangaina a nih. Hmangainaa um zingtu chu Pathienah a um zing a, Pathien khom amaah a um zing a nih.
17. Rorelna nia ti der loa ei um theina dingin einiah hmangaina chu sukfamkim a ni tah a; hi khawvela khom hin ama ang takin ei um hrim a nih.
18. Hmangainaa chun titna hrim a um naw a, hmangaina famkim chun titna po po a hnot hmang hlak. Titna le hremna hi an inzom leiin, tia umtu chu hmangainaah a la famkim naw a nih.
19. Aman a mi hmangai hmasak leiin eini khomin ei hmangai a nih.
20. Miin, "Pathien ka hmangai" ti sien, a unau theida si sien, ama chu mi khelhlip a nih. Unau a hmu zing hman hmangai si lo chun Pathien a hmu ngai lo chu iengtin am hmangai thei a ta?
21. Hi thupek hi a nih a mi pek chu: Pathien hmangaitu chun a unau khom a hmangai ding a nih, ti hi.

  1John (4/5)