←  1John (2/5)  →
1. Ka nau dittakhai, suol in thaw nawna dingin hieng thu hi ka ziek a nih. Tu khomin suol a thaw ruok chun Pa kuoma hrilpuitu Mi fel, Isu Krista chu ei nei.
2. Ama chu ei suol thawina dinga thilhlan a nih; eini suol chauh ni loin, khawvel pumpui suol ta ding khomin a nih.
3. A thupekhai ei zawm chun ama ei hriet ti a chieng.
4. A thupekhai zawm si loa "Ama ka hriet" titu chu mi khelhlip a ni a, thutak amaah a um nawh.
5. Tu khomin a thu a zawm chun Pathienin a hmangaina chu amaah sukfamkimin a um takzet a nih. Chu chu amaah ei um zing ti ei hriet chiengna a nih.
6. "Amaah ka um zing" titu chun Krista nun lampui a hraw ve ngei ding a nih.
7. Dittakhai, thupek thar in kuomah ka ziek naw a; thupek hlui, atira inthoka in nei tah kha a nih ka ziek lem. Thupek hlui chu in hriet tah sa vong a nih.
8. Sienkhom, in kuoma thupek ka ziek hi kong khata chu a thar a nina a um; chu chu ama le nangniah a'n dikzie a'n lang a, thim chu a'n kieng mek a, var tak tak chu a hung eng der tah a nih.
9. Tu khom vara um inti a, mani unau theida si chu tu chen khom hin thimah a la um zing a nih.
10. Mani unau hmangaitu chu varah a um zing a, ama ta dingin ieng khom insui thlukna ding a um nawh.
11. Mani unau theidatu ruok chu thimah a um a, thimah a'n vak a, thimin a mit a sukdel leiin a fena chin khom a hriet nawh.
12. Nauhai, ama hming leia in suolhai ngaidam a ni tak leiin ka ziek a nih.
13. P�hai, a tira inthoka um zing chu in hriet tah leiin in kuomah ka ziek a nih. Tlangvalhai, mi suol chu in ngam tak leiin in kuomah ka ziek a nih. Naupanghai, P� chu in hriet tah leiin in kuomah ka ziek a nih.
14. P�hai, a tira inthoka um chu in hriet tah leiin ka ziek a nih. Tlangvalhai, in hrat a, Pathien thu nangniah a um leia mi suol chu in ngam tak leiin, in kuomah ka ziek a nih.
15. Khawvel le a sunga umhai hi hmangai naw ro. Tu khomin khawvel hi a hmangai chun Pa chu a hmangai naw a nih.
16. Khawvela thil um po po-tisa chakna hai, mit chakna hai, mani thil nei le thil thaw uongpuina- hai hi Paa inthoka suok a ni naw a, khawvela inthoka suok a ni lem
17. Khawvel hi a chakna pumin a bohmang mek a, Pathien ditzawng thawtu ruok chu kumkhuoin hring zing a tih.
18. Nau dittakhai, hun nuhnung tak a ni tah a, Krista dodaltu an hung suok ding ti in hriet tah ang khan, tu hin Krista dodaltu tam tak an hung suok tah a; chu lei chun hun nuhnung a ni tah ti ei hriet.
19. Anni chu eini laia inthokin an suok a, ei mi le sa tak tak an ni naw hrim a, ni hai sien chu eini lai um zing an tih. An mi suoksan khan eini mi le sahai an lo ni vong tak tak nawzie a suklang.
20. Nangni ruok chu Mi Thienghlim chun hriek a nal tah cheu leiin in rengin thutak chu in hriet.
21. Thutak chu in hriet naw leia ziek ka ni naw a, in hriet lei le thutaka inthokin khel a suok ngai naw leia ziek ka ni lem.
22. Isu chu Krista a nih ti pom nawtu neka khelhlip tu am a um a? P� le Naupa pom nawtu chu Krista dod�ltu a nih.
23. Tu khom Naupa pom nawtu chun Pa khom a pom naw a; Naupa pomtu ruok chun Pa khom a pom a nih.
24. Nangni ruok chun a tira inthoka in hriet kha nangniah vong zing ro; chuonga in um zing chun Paah le Naupaah chun um zing in tih.
25. Hi hi a nih a thutiem, ama ngeiin ei kuoma a tiem kha: chatuon hringna chu.
26. Nangni thuoi hmang tumtuhai chungthu ka ziek a ni hih.
27. Nangni chu hriek nal sa in ni tah a, chu chu nangniah a um zing a, tu dang inchuktir khom in ngai nawh. A hriek nalna cheu chun thil tinreng a'n chuktir lem cheu a, chu chu a'n dik a, khel a ni nawh. Chuongchun, a zirtir cheu ang tak khan amaah um zing ro.
28. Tuhin Nau dittakhai, ama a hung inlang phaa lung ngam tak le inzak loa ei um theina dingin, amaah um zing ro.
29. Ama chu mi indik tak a nih ti in hriet chun indik taka thawtu taphot chu a nauhai an nih ti hrieng in tih.
←  1John (2/5)  →