←  1Corinthians (9/16)  →
1. Zalen ka ni naw maw? Tirko ka ni naw maw? Ei Lalpa Isu Krista hmu tah ka ni naw maw? Lalpaa ka sinthaw ra chu nangni hi in ni naw maw?
2. Mi danghai ta dingin tirko ka ni naw a lo ni khomin, nangni ta ding chun ka ni chieng khop el. Lalpaa tirko ka nizie namnghettu suoi chu nangni hi in ni si a.
3. Hi hi mi soiseltuhai ka donna hlak chu a nih.
4. Fak le dawn dong theina chanvo kan nei naw bik am a ni?
5. Tirko danghai, Lalpa unauhai le Kifa hai angin inzinnaah ringtu nuhmeihai kan thuoi ve thei naw bik am a ni?
6. Kei le Barnaba chauh hi kut sinthawa mani inchawm bik ding kan ni am a ni?
7. Mani inchawm fawma sipaia thang tu am an um hlak a? A ra fa si loin tuin am grep huon a siem hlak a? A nenetui dawn si loin tuin am ran a vai hlak?
8. Hieng ka hrilhai hi mihriem thlir dan mei mei am a ni? Dan thu khomin hieng hi a hril a ni naw maw?
9. Mosie Dana chun, "Bawngchalin bu a chil laiin a hmur khuop naw rawh" ti a nih. Pathienin bawngchal ta ding chauhin am a nih a ngaituo?
10. Keini ta ding tak lem hin a ni naw maw a lo hril? Ni e, keini ta dinga ziek a nih. Hnuoi inlettu chun beisei neiin inlet sien, bu chiltu khomin chan nei ve beiseiin chil raw se.
11. Nangni lai thlarau thlai chi kan tu a, in kuoma inthokin taksa tieng thila khom ra sik ding lo ni inlang, inthlahrungna ding ieng am a um a?
12. Mi dang hmanin in lakah chuong ang thil an phut ngam chun keini lem chun kan phut ngam nawk zuol naw di'm a ni? Sienkhom ieng khom kan phut ngai nawh. Phut nek hmanin, Krista Chanchin Tha daltu kan ni nawna dingin iengkim kan tuor hram hram lem hlak.
13. Tempula rongbawltuhai chun tempula mi thil an fak a, maichama inthawina inhlantuhai khomin an thil inhlana inthokin chan an nei ve ti in hriet naw'm a ni?
14. Chuong ang bokin, Chanchin Tha hi Chanchin Tha hriltuhai fak hmuna dinga Lalpan a ruot a nih.
15. Kei chun hieng hamthatnahai hi ka sor ve hrim hrim nawh. Hieng thil hi ka chunga in thaw beisei leia ka ziek a ni nawh. Ka uongpui hi ieng khom loa in mi ngaipek nek chun thi khom ka thlang lem.
16. Chanchin Tha ka hril leia uong ka ni nawh, hril lo thei lo ka nih. Chanchin Tha hi hril ta naw lang chu ka chung a va rik awm de aw!
17. Mani nuom thua hril ni lang, hlaw khom nei ka tih. Mani nuom thua hril ka ni si nawh, Chanchin Tha enkol sin chu inkoltira ka um lei a nih.
18. An leh ka lawmman chu iem ni tang a ta? Chanchin Tha hriltu ka ni leia ka phut thei phut loa a thlawna Chanchin Tha ka hril theina hi ka lawmman chu a nih.
19. Tu bawi ni naw lang khom a tam thei ang tak mi ka lak theina dingin mi tin bawiah ka'n siem hlak.
20. Judahai ka lak theina dingin Judahai lai Juda mi angin ka um a; Dan hnuoia um ni naw lang khom Dan hnuoia mihai ka lak theina dingin Dan hnuoia um angin ka khawsa hlak.
21. Dan nei nawhai ka lak theina dingin Dan nei lo angin ka um hlak, Pathien dan zawm naw ni si loin, Krista dan zawm tlat siin.
22. Mi hrat nawhai ka lak theina dingin anni lai hrat naw angin ka um hlak. Chuong ang chun ieng ti kong zawng amanih bekin mi thenkhat ka sandam theina dingin mi tin lai kong hrang hrangin ka khawsa hlak.
23. Chanchin Tha leiin chuong thilhai chu ka thaw hlak, a malsawmna ka dong theina dingin.
24. Intlansiekhai chu an tlan senga chu pakhat chauhin lawmman a dong hlak ti in hriet naw'm a ni? Chuong ang chun lawmman dong dingin tlan ro.
25. Intlansieka thanghai chu kong iengkimah inthununna khauh tak hnuoiah an inbuotsai hlak. Anni chun chawimawina lukhum se thei hmu dingin an bei a; eini ruok chun chatuon dai lallukhum hmu dingin ei bei a nih.
26. Chuleiin, pan chieng tak neiin ka tlan a, boruok hnektu ang mei meiin ka hnek ngai nawh;
27. ka taksa ka hnek chor chor a, ka bawiah ka siem a; chuong naw chun mihai kuoma Chanchin Tha hriltu ni ta siin lawmman dong phak loa hnawl ni hlauh rawi ka tih.
←  1Corinthians (9/16)  →