1Corinthians (8/16)  

1. Milem biekna sa fak chungchang thua khan, "ei rengin hrietna ei kol seng" in ti kha a'n dik. Sienkhom chuong ang hrietna chun mi a sukchapo hlak a, hmangaina ruok chun mi a siem tha hlak.
2. Tu khom thil hrie nia inngai chun a hriet ding ang takin a la hriet tawk naw a nih.
3. Miin Pathien a hmangai ruok chun ama chu Pathien mi hriet a nih.
4. Chuongchun, milem bieknaa an sa inhlan fak thua chun, khawvela hin milem hi ieng khom a ni nawzie le Pathien pakhat chauh naw chu a dang hrim hrim an um nawh ti ei hriet.
5. Van amanih, hnuoi amaniah pathien anga ngai tam tak an um thei a, chuong angin pathien tam tak le lalpa tam tak khom an um hrim a.
6. Nisienlakhom, eini ta ding ruok chun Pathien pakhat chauh, P� chu a um a, thil iengkim ama leiin a um a, eini khom ama ta dinga um ei nih; chun, Lalpa pakhat chauh, Krista Isu chu, a um bok a; thil iengkim hi ama hmanga siem a na, eini khom ama leia um ei nih.h
7. Nisienlakhom, hi hi mi po poin an hriet vong nawh. Thenkhat chu milem be thang an ni leiin, sa an fak pha leh milem kuoma inthawina sa anga ngaiin an fak hlak a, an sie le tha hrietna a hrat si naw leiin inthieng naw angin an inngai hlak.
8. Ieng khom ni sien, ei thil fak hin Pathien a mi'n hnaitir naw a, fa naw inla khom a mi'n hlattir naw a, fa inla khom a mi'n hnaitir chuong bok nawh.
9. Amiruokchu, fimkhur ro, in zalenna chu ringnaa hrat nawhai tlukna lo ni pal hlauh rawi a tih.
10. Nang, chu hrietna nei ta sa chun milem biekna ina bu i fak lai chu sie le tha hrietnaa hrat loin hmu sien, milem kuoma thil inhlanhai a fak ngam pha ve el naw ding maw?
11. Chuong a ni si chun i unau, mi hrat naw, a thi aia Krista thi chu, i hrietthiemna chun a suksiet a nih.
12. Chuong anga i unau chunga thil suol thaw a, a sie le tha hrietna hrat naw tak i sukhliem chun Krista chungah thil suol i thaw a nih.
13. Chuleiin, ka thil fakin suolah ka unau a'n tluktir si chun, ka unau ka sukthluk nawna dingin sa hrim hrim nghei der tang ka tih.

  1Corinthians (8/16)