| ← 1Corinthians (5/16) → |
| 1. | Ringnawhai lai hmana thil um ngai lo inditna porche nangni lai a um thu le pa pakhatin a pa thaikeme a zalpui ti thu dam an hril thang a. |
| 2. | Chu chu poiti ta nekin in la uongpui ta deu deu a ni awm a! Chuong ang mi chu nangni pawl laia inthoka hnot suok ding a ni naw am a ni? |
| 3. | Taksain nangni lai um naw lang khom thlarauah ka um a, chuong ang thawtu chungchang chu nangni laia um angin Lalpa Isu hmingin ka lo rel fel der tah. |
| 4. | In inkhawm pha leh kei khom nangni lai thlaraua hung thang ve anga mi ngaiin, Lalpa Isu thuneina hmangin, |
| 5. | Lalpa Ni-a a thlarau sandama a um theina dingin, chu pa taksa chu sukbohmang dingin Setan kuomah pe suok ro. |
| 6. | In uong dan hi a tha nawh. Chol tlawmtein bei tlang hlum a chie tho vong hlak ti in hriet naw maw? |
| 7. | Chol thang lo bei in ni ang hrimin bei hlum tharlam hlak in hung ni theina dingin chol hlui chu zen fai ro. Krista, ei Fekan kutna ding Beramte chu inhlanin a um ta si a. |
| 8. | Suolna le ritlona chol hluia inchie tho bei ni loin, chol thang lo, thienghlimna le thutaka inchie tho beiin kut hmang lem ei tiu. |
| 9. | Ka lekhathona khan inngai hmanghai leh inpol sop lo dingin ka hril ta cheu kha. |
| 10. | Chu chun hi khawvel mi, inngai hmang hai, duam hai, hlem hmang hai le milem be hai hi pawlser ro ka tina a ni der nawh. In pawlser ding a ni chun khawvel hi in suoksan hlol ngai a tih. |
| 11. | Ringtu unau inti si, sienkhom inngai hmang, mi duam, milem betu, mi dem hmang, zu rui hmang le mi hlem hmanghai leh inpol sop lo ding le anni lai a fak khom fa lo dingin ka ti lem cheu a ni kha. |
| 12. | Kohran puo tienga umhai chungthu chu keia rel ding am a ni? A sunga umhai thu chauh ei rel ding an naw maw? |
| 13. | Puo tieng mihai chungthu chu Pathienin rel a tih. Chuong ang mi suol chu nangni laia inthokin hnot suok ro. |
| ← 1Corinthians (5/16) → |