←  1Corinthians (4/16)  →
1. Keini hi mihaiin Krista rongbawltu le Pathien thuruk enkoltuah mi ngai raw hai se.
2. Chun, enkoltua ruothai chu an ringum phot ding a nih.
3. Nangni amanih, mihriem roreltuhaiin amanih in mi lo inkhina hi ieng rakah ka ngai nawh, keima ngei khom ka'n khi ngai bok nawh.
4. Ka sie le tha hrietnain inthiem nawna ieng khom ka nei naw a, sienkhom soisel bo ka nih tina chu a ni chuong nawh; a mi'n khitu chu Lalpa a ni lem.
5. Chuleiin, Lalpa hung hma, a hun ruot a tlung hma chun inkhi el naw ro. Ama chun thima thup rukhai le mihriem lungrila tum rukhai po po chu varah hung phor lang a ta, mi tinin mani phu tawk ang sengin Pathien inpak hlawng an tih.
6. Unauhai, "Thu zieka um bak chu thaw naw ro" ti kha in inchuk theina dingin kei le Appolo hi in enton dingin ka hung inlak a nih, tu khomin pakhat suong a, pakhat lem in hnuoisie nawna dingin.
7. Mi dang neka chunghnung bikin tuin am an en cheu a? In dong naw iem nei in nei a? In dong a ni si chun ieng dinga dong lo anga in uong am a na?
8. In burip tah ie maw! In hausa tah hi tie maw! Keini thang lo khomin in inlal ta khop el! Inlal tak tak chu ni unla kan va ti de, in zara hang inlal ve ding chu!
9. Keini tirkohai ruok hi chu thi dinga ruothai hnung dala Pathienin a nuhnung taka a mi sie amanih ka ti hiel hlak, a san chu khawvel le vantirkohai le mi po po ennuom kan inchang tah hi.
10. Keini chu Krista leiin mi invet kan na, nangni ruok chu Krista leiin mi var in nih. Keini kan hrat naw a, nangni in hrat thung a. Keini chu mi hmusit kan ni a, nangni chu mi ngaisang in nih.
11. Tu chen khom hin phingtam le dangcharin, silfen tiek inbelin, mi kut thak nulnaa thangin kan invakvai a.
12. Kuta inrim taka sinthawin fak kan zong a, miin tong sie an mi'n phur leh mal kan sawm thung a, an mi suknomna leh sel takin kan tuor a,
13. an mi biek sisaw leh zaidam takin kan don a. Tu chen khom hin hnuoi hmunhnok, khawvel hnawmtinphur ang chaua mi ngai kan nih.
14. Hieng thil hi sukzak ding cheua ka ziek a ni naw a, ka nau dittakhai anga zilna ding cheua ka ziek a nih.
15. Krista tienga keihruoitu ding cheu a sing telin nei inla khom, pa ruok chu tam tak in nei nawh: kei hi Kristaa in p�, Isu Chanchin Thaa hringtu cheu chu ka nih.
16. Chuleiin, mi enton dingin ka ngen cheu a nih.
17. Hi lei hin ka nau dittak, Lalpaa mi ringum Timothe chu in kuomah ka hung tir a nih; ama chun Kristaa ka nun dan ang char hmun tina kohranhai ka'n chuktir hlak chu, inhriettir nawk a ti cheu.
18. In kuoma kei hung nawk ta naw ding ang elin thenkhat chu in insukngeng hle a.
19. Lalpan rem a ti chun ka hung kan nawk vak ding cheu a na, chu huna chun hieng mi uongthuonghai hin iem an hril ti le ieng thilthawtheina am an nei ti la hung hmu suok ka tih.
20. Pathien ram chu thua a hrila hril ringota innghat a ni naw a, thilthawtheinaa innghat a ni lem.
21. A ieng am in thlang lem a? Hmol chawiin am ka hung inthok ding, an naw leh hmangaina le thuhnuoirolna lungril putin?
←  1Corinthians (4/16)  →