← 1Corinthians (3/16) → |
1. | Unauhai, thlarau mihai kuoma ka hril angin in kuomah thu ka hril thei naw a; tisa mi, Kristaa nautehai kuoma hril angin ka hril hlak cheu a ni kha. |
2. | Bu changrum in la fak phak naw leiin nenetuiin ka chawm hlak cheu a; tu chen khom hin in la fak thei naw hi. |
3. | In la tisa mi em lei a nih. Nangni lai inthikna le inhalna a um zing sung chun tisa mi, khawvel mi taka la khawsa in nih tina a ni naw am a ni? |
4. | Nangni lai "Kei Paula pawl ka nih, kei Appolo pawl ka nih" ti dam in la um sung chun in la tisa mi hle tina a ni naw maw? |
5. | An leh Appolo chu iem a na? Paula khom chu iem a ni bik leh? In ring theina dinga rongbawltu chau an nih; chu khom chu Lalpan thaw ding chan a pek ang peia thok an nih. |
6. | Keiin ka phun a, Appoloin tuiin a chawm a, sienkhom Pathienin a'n thanglientir a nih. |
7. | A'n thangtirtu Pathien chauh naw chu a phuntu le a chawmtu chu ieng khom an ni nawh. |
8. | A phuntu le a chawmtu thil tum chu thuhmun a na, an sin inrim ang hu peiin lawmman hmu ve veng an tih. |
9. | Pathien ta dinga thaw tlang kan ni si a, nangni hi Pathien lohma le Pathien in bawl chu in nih. |
10. | Pathienin lunginsietna a mi pek ang peiin, in bawltu themthiem tak angin keiin a lungphum ka phum a, chu lungphum chunga chun mi dangin an hung bawl a; sienkhom an bawl dan thuah fimkhur seng raw hai se. |
11. | Lungphum rem ta sa naw chu tu khomin lungphum dang an phum thei nawh, chu lungphum chu Isu Krista a nih. |
12. | Chu chunga chun miin rangkachakin amanih, tangkaruoin amanih, lungmantamin amanih, thingin amanih, sawlhnain amanih, bupawlin amanih a bawl a ni chun, |
13. | mi tin sinthaw that le that naw dan chu la'n lang fieng a tih; Krista Ni-ah sukchieng a la ni ding a ni si a, meiin a'n lar ding a ni leiin. Mei chun mi tin sinthaw chu fie seng a tih. |
14. | Tu in bawl khom a kang naw chun, chu mi chun lawmman hmung a ta; |
15. | tu in bawl khom a kang chun chu mi chun chan a ta, ama tak ruok chu sanhim ni hram a tih, mei pal tlang ang elin. |
16. | Pathien chengna tempul in ni le Pathien Thlarau nangniah a cheng ti in hriet naw am a ni? |
17. | Mi tu khomin Pathien tempul chu a sukkhawlo chun Pathienin ama khom sukkhawlo veng a tih, Pathien chengna tempul chu a thienghlim si a; chu tempul chu nangni in nih. |
18. | Tu khomin mani inhlem naw ro. Nangni lai tu khomin hi khawvel ngaia var nia a'n hriet chun a hung var tak tak theina dingin invet hmasa phot raw se; |
19. | hi khawvel varna hi Pathien mita chu thil invetthlak a nih. "Ama chun mi varhai chu an var verveknain a awk hlak" ti ziek a ni si a. |
20. | "Lalpa chun mi varhai ngaituona chu iengma lo el a nih ti a hriet" ti a ni bok a. |
21. | Chuleiin, tu khomin mihriem chu uongpui ta naw raw hai se. Iengkim hi in ta vong a nih. |
22. | Paula amanih, Appolo amanih, Kifa amanih, khawvel amanih hringna amanih, thina amanih, tu hi amanih, la hung tlung ding amanih, a rengin in ta vong a nih. |
23. | Nangni hi Krista ta in na, Krista chu Pathien ta a nih. |
← 1Corinthians (3/16) → |