←  1Corinthians (16/16)    
1. Mi thienghlimhai ta dinga thawlawm thaw thua chun, Galati kohranhai ka hril ang khan thaw ve ro.
2. Pathienni zatin nangni lai tu khomin malsawmna in dong dan ang peiin sie khawl ro, ka hung phaa dawl a ngai nawna dingin.
3. Ka hung pha leh in thilpekhai chu Jerusalema fepui dingin mi in ring zawnghai chu ka lekha inchawitirin tir ka tih.
4. Ka fe ve a tul a ni lem chun ka ruolin hung veng an ta.
5. Makedonia ram ka sir hnungin in kuomah hung ka tih; Makedonia ram fang a tul tlat si a.
6. In kuomah sawt fe ka cham el thei, thlasik sung po khom a ni el thei a; kan zin nawk peina dinga khom in mi thangpui ding annawm.
7. Tuta tum chu fe malama hung sir vuoi cheu ringot ka nuom naw a, Lalpan rem a ti chun iemani chen in kuoma cham ka beisei a nih.
8. Efesi-a hin Pentikos ni chen cham ka tih.
9. Hlawk taka rong bawl theina lampui ka ta dingin a'n hong a, dodaltu ruok chu an tam em em.
10. Timothe a hung chun nangni lai inphalam der lo dingin lo inumtir ro, keima ang boka Lalpa rongbawltu a ni kha.
11. Chuleiin, tu khomin lo ngainep naw ro. Ka kuoma a hung kir vak theina dingin thlamuong takin hung inthla ro; unau danghai ruola a hung tlung ka beisei.
12. Unaupa Appolo ruok chu unau danghai ruola in kuoma hung dingin ka ngen rak a, sienkhom tu hri hin chu a nuom tlat naw a, hun remchangah la hung ngei a tih.
13. Inring zingin um ro; ringnaah ngir nghet unla; huoi tak le hrat takin um ro.
14. In thaw taphot chu hmangainain thaw pei ro.
15. Stefan hai sung kha Akai biela ringtu hmasa an na, mi thienghlimhai rongbawlna sinah an inpek zo ti in hriet a;
16. chuong ang mihai le an thawpui le rongbawlpuihai thu chu zawm pei ro.
17. Chun, Stefan hai, Forchunata hai, Akaika hai an hung hin an mi suklawm hle a; anni hin in um naw inlang lo khopin an mi siem a,
18. in lungril an sukhar ang bok khan ka thlarau khom an sukhar ve a nih. Hieng ang mi hi ngaisang ro.
19. Asia rama kohranhai hin chibai an buk cheu. Akuila le Prisila le an ina kohran inkhawmhai hin Lalpa hmingin chibai vochuom an buk cheu.
20. Unau dang po po khomin chibai an buk cheu a; fawp thienghlimin in chibai tuo ro.
21. Hi chibai bukna lekha hi kei Paula hin kut ngeia ka hung ziek a ni hi.
22. Tu khom Lalpa hmangai nawtu chu tongsephurin um raw se. Lalpa chu a hung ie!r
23. Ei Lalpa Isu lunginsietna chu in kuomah um raw se.
24. Krista Isua ka hmangaina cheu chu in renga kuomah um raw se.
←  1Corinthians (16/16)