←  1Corinthians (15/16)  →
1. Unauhai, in kuoma Chanchin Tha ka hung hril, in pom tah le innghatnaa in hmang tah kha ka hung inhriettir nawk cheu a nih.
2. Hi Chanchin Tha, ka hung hril cheu kha in pom nghet tlat chun sandamin um in ta, in pom zing naw chun in ringna chu a thlawn ning a tih.
3. Hieng hi thu poimaw tak ka dong ka hril sawng ta cheu kha a nih: Krista chu Pathien lekha thu ang peiin ei suolhai leiin a thi a,
4. phumin a um a, Pathien Lekha thu angin a ni thum ni-ah keitho a ni a,
5. Peter kuomah a'n lar a, sawm le pahnihai kuoma khom a'n lar a,
6. chu hnunga chun unau za nga neka tam hmaah a'n lar a, chuong laia a tam lem chu an la dam a, a then ruok chu an lo in tah.
7. Chu zoah Jakob kuomah a'n lar a, tirko po po kuomah a'n lar nawk bok a.
8. A tawp taka chun kei, a thla kim loa pieng ang el kuoma khom hin a hung inlar a.
9. Kei chu tirkohai laia chin tak ka ni a, Pathien kohranhai ka suknomnat leiin tirkoa inbuk tlak khom ka ni nawh.
10. Sienkhom, Pathien lunginsietna leiin ka ni ang hi ka hung ni a, ka chunga a lunginsietna chu a thlawn nawh. Tirko danghai nekin sin ka thaw nasa lem a; amiruokchu, keima thaw a ni naw a, ka kuoma um Pathien lunginsietna khan a thaw a ni lem.
11. Keiin amanih anniin amania thu kan hril hlak ngei kha a nih nangni khoma in lo ring tah hih.
12. Mithi laia inthoka Isu Krista keitho a ni thu kan hril hlak si chun ieng ti dana nangni laia thenkhatin mithi thonawkna a um nawh in ti am a na?
13. Mithi thonawkna a um si naw chun Krista khom kha keitho ni naw nih.
14. Krista kha keitho a ni si naw chun kan thu hung hril hi thu hmang lo ning a ta, in ringna khom hmangna bo ning a tih.
15. Chu chauh chu a ni nawh. Pathienin mithi laia inthoka Krista a keitho thu kan hril hlak a, mithi thonawkna a um si naw chun Krista khom keitho ni naw ni a, Pathien chungthua hrepuitu khelhlip ni bok kan tih.
16. Mithihai keitho an ni si naw chun Krista khom kha keitho ni naw nih.
17. Krista kha keitho a ni si naw chun, in ringna chu a thlawn el ning a ta; in suolnaah in la um zing ning a tih.
18. Chuong a ni chun Kristaa lo in tahai khom kha an bohmang tah ning a tih.
19. Kristaa beiseina ei nei hi tuta dam sunga ding chauh lo ni sien chu, mi po po laia mi lungsietum tak ning ei tih.
20. Nisienlakhom, Krista chu mithi laia inthokin keitho a ni takzet a, mithi thonawkhai hmathuoitu a nih.
21. Mihriem pakhat leiin thina a hung um a, mihriem pakhat lei bokin mithi thonawkna khom a um a nih.
22. Adamah mi po po an thi ang khan, Kristaah mi po po sukhring ning an tih.
23. Amiruokchu, mani hun sengah ning a tih. Thonawkna hmathuoitu Krista chu a tho hmasa a, a dotah, a hung nawk pha ama mihai chu tho an tih.
24. Chu zoah tawpna chu hung tlung a tih. Lalram hai, thuneina hai le thilthawtheina po pohai a sukbo hnungah Pa, Pathien kuomah ram chu inhlan a tih.
25. Pathienin a hmelmahai po po hne a, a ke hnuoiah a sie vong hma khat chu Krista chun ro a rel ding a ni si a.
26. Hmelma nuhnung tak sukboa um ding chu thina hi a nih.
27. Pathienin, "Iengkim a ke hnuoiah a sie"l ti a ni a. Hi taka "iengkim" tia hin Krista hnuoia iengkim sietu Pathien chu a thang ve nawh ti a'n lang chieng a.
28. A hnuoia iengkim sie a ni hnungah, ama, Naupa ngei chu, a hnuoia iengkim sietu Pathien hnuoiah sie ni tang a ta, Pathien chu iengkima chunghnung tak ni tang a tih.
29. An leh, thonawkna a um si naw chun, mithi puola baptismam inchangtuhai khan iem a na an thaw hrim? Mithihai keitho an ni si naw ding chun ieng leia mithi puola baptisma an inchang hlak am a na?
30. Ieng leiin am keini khomin darkar tin kan hringna kan thap am a na?
31. Unauhai, ei Lalpa Isu Kristaah ka suong em cheu leiin ni tina thina ka hmasuon hlak thu ka hril cheu a ni hi.
32. Mihriem beiseina mei mei chauh hmangin, Efesi khuoa hin sahrang insuolpui ni ta lang, ka ta dingin iem a tangkai a? Mithihai keitho an ni si naw ding chun,'Fain dawn ei tiu khai,Zingah ei thi el ding a ni si a'nan ti ang hin ti ve inla tie!
33. Thuoi hmangin um naw ro, "Ruol suolin nungchang tha an sukkhawlo hlak"o ti a ni kha.
34. Har fim unla, suol thaw ta naw ro. Thenkhat chun Pathien hrietna hrim in nei nawh; chu chu in inzakna dinga ka hril a nih.
35. Ieng tin am mithihai chu keitho ning an ta? Ieng taksa am put an ta? tiin in indon a ni thei.
36. Chu chu zawna invetthlak tak a nih. Hnuoia thlai chi in tu hi a thi zet naw chun a to ngai nawh.
37. Bu chi amanih thil dang chi amanih in tu hin a kung la hung um ding chu in tu naw a, a chi mal chauh a la nih.
38. Nisienlakhom, Pathienin a nuom dan angin a kung a hung siem a, thlai chi hrang hrangin kung chi hrang hrang an nei hlak.
39. Taksa po po hi a'n ang vong nawh: mihriem taksa a dang a, ran taksa a dang a, vate taksa a dang a, nga taksa a dang.
40. Van taksa a um a, hnuoi taksa a um a, van taksa ropui dan le hnuoi taksa ropui dan khom a'n ang nawh.
41. Nisa hin ama ropuina a nei a, thlain ama ropuina hran a nei a, arasihai khomin ropuina an nei a, arasi hrang hrang ropuina khom a'n ang nawh.
42. Mithi thonawkna khom chuong ang bok chu ning a tih. Taksa chu hmon theia tuin a um a, hmon thei loa keithoin a um a;
43. chawimawi loa tuin a um a, ropui taka keithoin a um a; hrat naw taka phumin a um a, thilthawtheia keithoin um a tih.
44. Ei phum kha mihriem taksa a ni a, keithoa um chu thlarau tieng taksa a nih. Mihriem tieng taksa a um chun thlarau tieng taksa khom um a tih.
45. Pathien Lekha thu chun, "Mihriem hmasa tak Adam chu mi hring a hung ni tah a" a ta; Adam nuhnung tak chu hringna petu Thlarau a nih.
46. Thlarau tieng um hmasa loin taksa tieng a um hmasa a, chu hnungah thlarau tieng a um chauh a nih.
47. Mihriem hmasa chu pila siem, hnuoi mi a na, mihriem pahnina chu van mi a nih.
48. Hnuoia mihriemhai chu hnuoia mi ang an na, vana mihai ruok chu vana mi ang an nih.
49. Hnuoia mi angna ei put ang hin vana mi angna khom la put ngei ei tih.
50. Unauhai, taksa le thisen hin Pathien ram a hluo thei naw a, hmon thei hin hmon thei lo chu hluo bok naw nih ti ka hril a nih.
51. Thuruk ka hril cheu hi, ngaithla ngun ro. Ei rengin ei in vong naw ding a na, sienkhom tawtawrawt nuhnung tak a'n ri pha chun thawk le khat, mit khap kar loin sukdanglam ni vong ei tih.
52. Tawtawrawt a hung inrik pha chun mithihai chu hmon thei loa keitho ning an ta, eini khom sukdanglam ning ei tih.
53. Hmon thei hi hmon thei loah inchang a ta, thi thei hi thi thei loah inchang a tih.
54. Chuong anga hmon thei hi hmon thei loa a'n chang huna chun hi Pathien Lekha thu,"Thina chu hnenain a lem zo tah,p
55. Aw thina, khaw lam i hnena chu?Aw thina, khaw lam i tur chu?"q ti hi la hung tlung kim a tih.
56. Thina tur chu suol hi a na, suol thilthawtheina chu Dan hi a nih.
57. Sienkhom, ei Lalpa Isu Krista zara hnena mi petu Pathien kuoma chun lawmthu um raw se.
58. Chuleiin, ka unau dittakhai, sukchang ruol loin ngir nghet unla, Lalpaa chun in sin inrimna a thlawn naw dingzie hre zingin, Lalpa rongbawlna sina chun inpe fai thak ro.
←  1Corinthians (15/16)  →