←  1Corinthians (14/16)  →
1. Hmangaina hi hnot pei unla, thlarau thilpekhai chu chak hle unla, abikin thuhril theina lem chu chak zuol ro.
2. Tong hriet loa thu hriltu chun a thlaraua thuruk Pathien kuoma a hril a ni leiin mi dang tu khomin an hriet thei nawh.
3. Thuhriltu ruok chun mihai sukhrat ding dam, chokphur ding dam le thlamuong ding damin an kuomah thu a hril lem hlak.
4. Tong hriet loa hriltu chun ama a'n dom sang a, thuhriltu ruok chun kohran a dom sang hlak.
5. Tong hriet lo nei vong inla ka ti hle a, thu hril theina lem chu nei vong inla ka ti nawkzuol. Kohran hlawkpui dinga hril fiepektu an um si naw chun tong hriet lo neihai nek chun thuhril theina neihai chu an tangkai lem.
6. Unauhai, tuhin in kuomah hungin tong hriet loin hung tong ta lang, in kuomah thu puong a, hrietna inba cheu a, thu hrila ka'n chuktir cheu amanih a ni si naw chun ieng tin am mi hlawkpui thei tang in ta?
7. Hringna nei lo thil inri thei tingtang keiin amanih theihle mut ta hai sien, a ri bi ding anga a'n ri suok si naw chun ieng hla am an tum ti tuin am hre thei a ta?
8. Tawtawrawt khom mumal uma an mut naw chun tu am ral do dingin insiem an ta?
9. Chuong ang bokin, tong hriet theia in hril a ni si naw chun tuin am in thu hril chu hre thei tang an ta? Boruoka tong mei mei ang chauh ning in tih.
10. Sel ruol loin khawvela hin tong chi hrang hrang a tam hle a, umzie nei lo pakhat khom a um nawh.
11. Amiruokchu a thu hril umzie ka hriet si naw chun kei chu a ta dingin ram dang mi ning ka ta, ama chu ka ta dingin ram dang mi ni bok a tih.
12. Chuong ang char chu nangni lai khom a ni ve. Thlarau thilpek dong in chak hle lai hin, kohran tungdingna dinga tha thlarau thilpek chu hlut tak ro.
13. Chuleiin, tong hriet lo neihai chun a hrilfie theina hni raw se.
14. Tong hriet loa ka tongtai chun ka thlarau chu a tongtai ngei a, ka ngaituona ruok chu ka hmang hlawk nawh.
15. Ieng tin am ni tang a ti le? Thlarauin tongtai ka ta, ngaituona hmangin tongtai bok ka tih; thlarauin inpakna hla sak ka ta, ngaituona hmangin sak bok ka tih.
16. I thlarauin Pathien inpakin lawmthu hril la, i thu ngaithlatuhai khan i hril umzie an hriet si naw chun ieng tin am 'Amen' ti thei an ta?
17. I lawmthu hril tongtai chu a tha hle khom a ni thei, mi dang ruok chu a sukhlawk chuong nawh.
18. Nangni neka tong hriet lo ka hmang rawn lem leiin Pathien chungah ka lawm hle a;
19. sienkhom kohran inkhawmah mi dang inchuktirna ding chun tong hriet loa thu mal singkhat hril nekin ngaituona hmanga an hriet thiem thei zawng thu mal panga chauh hril ka nuom lem.
20. Unauhai, naupang lungril puta thil in ngaituo hlak kha bansan ro; suol kongah nautesen ang ni unla, ngaituonaa ruok chu puitling takin um ro.
21. Dan thua khom,"Tong dang hmangtuhai hmangin,Ram dang mihai hmur hmangin,Hi mihai kuomah hin hril ka ta,Chuong sa khom chun mi ngaithla naw ni hai"j
22. Chuongchun, tong hriet lo hi ringnawtuhai ta dingin inchikna a na, ringtuhai ta ding chun a ni chuong nawh; chuong ang bokin thuhril hi ringtuhai ta dingin inchikna a na, ringnawtuhai ta ding ruok chun a ni nawh.
23. Kohran pumpui inkhawmah inrengin tong hriet loin thu hril ta mur mur unla, la hre ngai lo amanih le ringnawtu amanih hung lut hai sien, in invet ta'm a nih an ti naw ding maw?
24. Inrengin thu lo hril ni unla ruok chu, ringnawtu amanih la hre ngai lo amanih hung lut ve lungril chu in thu hril chun tawk a ta, in hril hron a nih ti hrieng a ta, a suolzie inhriet suoktir a ta,
25. chuongchun, a lungril rukhai chu phor langin, bokkhupin Pathien chawibiek a ta, "Nangni lai Pathien a lo um takzet a ni hi" ti lem a tih.
26. Unauhai, in inkhawm pha hla thlang nei dam, thucha hril nuom dam, puong ding nei dam, tong hriet loa thu hril nuom dam le hrilfie ding nei dam in um si chun ieng tin am ni tang a ta? Hieng po po hi kohran sukhratna dingin thaw ro.
27. Tong hriet loa thu in hrilin mi pahni, a tam tawpah pathum bakin hril naw un la, an dot peiin hril unla, pakhatin hrilfie pei raw se.
28. Hrilfietu an um naw chun inkhawmnaa chun to el sien, ama hriet chauhin Pathien kuomah hril lem raw se.
29. Thuhril khom mi pahni pathum chauhin hril sien, mi dangin chik takin lo ngaithla raw se.
30. Amiruokchu a ngaithlaa inthunghai lai thucha dong an um chun a hril hmasatu chu to phot raw se.
31. A'n dotin thu hril hlak unla, chuongchun mi tinin inchuk ding nei thei in ta, insukphur tlang thei in tih.
32. Thuhriltu thlarau chang chu a koltu thununna hnuoiah a um ding a nih.
33. Pathien chu buoina Pathien ni loin, remna Pathien a ni lem si a.
34. Kohran tina mi thienghlimhai thaw dan angin, kohran inkhawmah nuhmei chu to zingin um raw hai se, thu an hril ve phal a ni si nawh. Dan bua a hril angin, an intuklut lem ding a nih.
35. Thil hriet fie an nuom chun in tieng an pasalhai indon lem raw se; nuhmei ta dingin kohran inkhawma thu hril hi thil inzapuium a nih.
36. Pathien thu hi nangnia inthoka suok a ni? In kuoma chauh a tlung a ni?
37. Tu khom zawlnei amanih thlarau mi amanih nia inngai chun in kuoma ka lekha hung ziek hi Lalpa thupek a nih ti lo hre raw se.
38. Mena thlaktu chu ama khom mena thlakk ning a tih.
39. Chuleiin ka unauhai, thuhril hi chak hle unla, tong hriet loa thu hril khom khap naw ro.
40. Amiruokchu, iengkim hi fel tak le mumal nei thlapa thaw ding a nih.
←  1Corinthians (14/16)  →