←  1Corinthians (13/16)  →

---

1.

Mihriem tong le vantirko tonghaiin thu hril thei lang khom, hmangaina ka nei si naw chun dar ri amanih, darbenthek ri amanih ang chauh ning a tih.

2.

Thuhril theina thilpek neiin, thu inthup po po le hriet ding po po hre vong lang, tlang son theina khop hiel ringna nei lang khom, hmangaina ka nei si naw chun ieng khom ni naw ning.

3.

Ka nei po po pasiehai ta dingin pe vong lang, uongpui dingin ka taksa meiah inhlan lang khom, hmangaina ka nei si naw chun ka ta dingin ieng khom a tlaktlai nawh.

4.

Hmangaina chu a dawthei a, hmangaina chu a ngilnei. Hmangaina chun a thik naw a, mani inpak a thaw ngai nawh. Hmangaina chu a chapo naw a,

5.

mawi naw takin a chang ngai naw a, mani hma a siel naw a, a lung a sen mei mei nawh. Hmangaina chun mi thaw suol a'n chik zing naw a,

6.

suol a lawm naw a, thutak ruok chu a hlimpui hlak.

7.

Hmangaina chun a hliekhu tlat a, a ringzo tlat a, a beisei tlat a, iengkim a tuor muolsuo hlak.

8.

Hmangaina chu chatuon dai a nih. Thuhrilnahai ruok chu suktawp la ning a ta, tong hriet lohai khomin re hun la nei a ta, hrietnahai khom la tawp a tih.

9.

Tu hin a then chauh ei hriet a, a then chauh ei hril hri a.

10.

Famkimna a hung tlung pha chun famkim lona hi bo tang a tih.

11.

Ka naupang lai khan naupang tongin ka tong a, naupang lungril ka put a, naupang ngaituo dan angin thil ka ngaituo hlak; ka hung puitling hnung ruok hin chu naupang thaw dan chu ka bansan tah.

12.

Tu hin chu darthlalanga phe ruoia ei inhmu ang hin ei hmu hri a; chu pha ruok chun inhmatonin hmu tang ei tih. Tu hin chu a then chauh ei hriet hri a, chu pha ruok chun Pathienin a mi hriet chieng angin la hre chieng ei tih.

13.

Chuongchun, hieng thil pathum ringna, beiseina le hmangaina hai hi um zing a ta, chuhai po laia ropui tak chu hmangaina a nih.

---

←  1Corinthians (13/16)  →