←  1Corinthians (10/16)  →
1. Unauhai, ei thlatuhai chunga thil tlunghai, sumin a thuoi dan le an renga tuipui an kan danhai kha, in hriet naw ka nuom nawh.
2. Mosie hnuoiah an rengin suma le tuipuia baptis an ni kha.
3. An rengin thlarau tieng bu thuhmun an fak a,
4. thlarau tieng tui thuhmun, anni somtu thlarau lungpuia inthoka tui chu an dawn seng kha; chu lungpui chu Krista hi a nih.
5. Chuong sa khom chun anni laia mi tam tak chungah Pathien a lungni ta naw a, thlalerah an ruong a'n dar phung el kha.
6. Thil suol thaw an chak anga ei chak ve nawna dingin khang thilhai kha eini mi kawkhmuna dinga tlung a lo nih.
7. Anni laia thenkhatin milem an biek ang khan be ve naw ro; Pathien Thu khomin, "Fa le dawn dingin mipui an inthung a, hlimhlop chen dingin an tho nawk" a lo ti kha.
8. Anni laia thenkhat inngaina suola an tluk ang khan tlu ve naw ro, ni khat sungin mi singhni le sangthum zetin an thi pha hiel a ni kha.
9. Anni laia thenkhatin Lalpa an fie ang khan fie ve naw ro, rulin a chuk hlum teuh a ni kha.
10. Anni laia thenkhat an chier ang khan chier ve naw ro, sukramtu vantirkoin a subohmang tawl a ni kha.
11. Hieng ang thil an lo tuokhai hi mi dang kawkhmuna ding a na; hun tawpa cheng einihai inveng theina dinga ziek a ni bok.
12. Chuongchun, ngir ngheta in inngai a ni khomin fimkhur ro, in tluk nawna dingin.
13. Fienai in tuok hlak hi mi tuor bak a ni chuong nawh. Pathien chu a ringum a, in tuor thei baka nasa fiena in tuok phal naw nih, in do zo theina dingin fiena in tuor pha leh tlan suokna lampui siempek lem a ti cheu.
14. Chuleiin, ka dittakhai, milem biek hi nghatsan ro.
15. Ningkhong hre chinhai hrilin ka hril cheu hi, ka hrilhai cheu hi chik takin ngaituo ro.
16. Malsawmna no la a, malsawmna ei hril hlak hi Krista thisen ei intawmpuina a ni nawm a ni? Bei ei khoi hlak hi Krista taksa ei intawmpuina a ni nawm a ni?
17. Bei chu tlang khat a ni angin eini hi tam tak ni inla khom taksa pumkhat ei nih, bei tlang khata mi ei chang seng si a.
18. Israelhai kha ngaituo ro: inthawina sa fatuhai chun maicham rongbawlna leh inzomna an nei naw am a ni?
19. Hi thua hin iem hril ka tum a na? Milem kuoma thil an inhlan chun hlutna a nei ti le milem khom chun tlaktlaina a nei ka tina a ni?
20. Ni teu lo e, ringnawtuhai inthawina chu Pathien kuomah ni loin ramhuoi kuomah a ni lem ti thu ka hril a nih. Nangni ruok chu ramhuoi leh inzawlna in nei ka dit nawh.
21. Lalpa no le ramhuoi no chel kop thei naw ti niu; Lalpa zanbu le ramhuoi zanbu kil kop thei bok naw ti niu.
22. Lalpa thikthu choktho ei tum am a ni? Ama nekin ei hrat lem am a ni?
23. "Iengkim thaw a thieng" an ti hlak a, sienkhom iengkim thaw hi a tha kher nawh. "Iengkim thaw a thieng" an ta, sienkhom iengkim thawin mi a siem tha kher nawh.
24. Tu khomin mani thatna ding nekin mi dang thatna ding zong lem raw se.
25. Sa dawra an zor a ni phot chun indon buoi loin fa el ro,
26. hnuoi le a sunga um po po hi Lalpa ta a ni si a.
27. Ringnawtuin bu fa dinga an fiel cheua in fe nuom si chun an pek taphot cheu chu indon buoi sese loin fa el ro.
28. Amiruokchu, tuin amani, "Hi chu inthawina thil a nih" tia an hril cheu ruok chun a hriltu cheu lei le sie le tha hrietna leiin fa naw ro.
29. Chu chun in sie le tha hrietna thu ka hril naw a, a hriltu cheu sie le tha hrietna thu ka hril lem a nih. An leh, ka zalenna chu mi dang ngaidanin a khuokhir ding am a ni?
30. Lawm taka ka fak a, Pathien kuomah lawmthu ka hrilna thuah ieng leiin am hrilsiet ka hlaw ding?
31. Chuongchun, in fak khomin in dawn khomin, iengkim in thaw taphot chu Pathien ropuina ding chauhin thaw vong ro.
32. Juda hai, Grik hai, Pathien kohran hai tu el khom tluk phana dingin um naw ro.
33. Kei khomin mani hlawkna nekin mi tam tak thatna ding ka zong lem a, sandam an ni theina dingin kong tinrengah mi tin suklawm ka tum hlak hi.
←  1Corinthians (10/16)  →