1Corinthians (1/16)  →
1. Paula, Isu Krista tirko ni dinga Pathien ditzawng anga ko le ei unaupa Sosthen chun:
2. Korinth khuoa Pathien Kohran, Krista Isua sukthienghlim, mi thienghlim ni dinga ko le Lalpa Isu Krista, anni le keini Lalpa hming lamtuhai po po chibai kan buk cheu.
3. Pathien ei Pa le Lalpa Isu Kristaa inthoka lunginsietna le inremna chu in kuomah um raw se.
4. Pathienin Krista Isua lunginsietna a pek cheu leiin in ta dingin ka Pathien kuomah lawmthu ka hril rop hlak.
5. Amaa chun kong tinrengah, thuhrilna tieng le hrietna tinrengah, sukhausakin in um a,
6. in kuoma Krista thu kan hung hril khan nangniah zung a kei nghet tah a.
7. Chuleiin, ei Lalpa Krista hung inlang ding phur taka in nghak sung hin thlarau thilpek ieng khom in tlasam naw hi.
8. Ei Lalpa Isu Krista nia soisel boa in um theina dingin a tawp chenin sukhrat a ti cheu.
9. A Naupa, ei Lalpa Isu Krista le inpawlnaa ko luttu cheu Pathien chu a ringum a nih.
10. Unauhai, nangni lai inthena um loa, lungril le ngaituona hmun khat put dingin ei Lalpa Isu Krista hmingin ka ngen cheu a nih.
11. Ka unauhai, nangni lai insel inhalna a um ti Kloi sunghaiin an mi hril a.
12. Ka hril chu, 'Kei Paula pawl, kei Apollo pawl, kei Kifa pawl, kei Krista pawl' in inti thim them tawl hi a nih.
13. Krista chu thein a um am a ni?a In ta dingin Paula chu hemde a ni maw? Paula hmingin baptisma in chang am a ni?
14. Krispa le Gaia naw chu nangni lai tu khom ka baptis naw leiin ka lawm.
15. Chuong naw chun tuhaiin amanih ka hminga baptisma chang angin lo inhril pal rawi an tih.
16. Stefan sunghai khom ka baptis takluo kha. Chuonghai ti naw chu tu khom ka baptis ka hriet nawh.
17. Krista chun baptis dingin a mi tir naw a, Chanchin Tha hril dingin a mi tir lem a nih. Mihriem varna hmanga hril dingin a mi tir nawh, Krista kraws thilthawtheina chu ieng khom loa an ngai pal nawna dingin.
18. Kraws thu chu bohmang mekhai ta ding chun thu invetthlak a na, eini sandama um mekhai ta ding ruok chun Pathien thilthawtheina a nih.
19. Mi var varna chu sukbohmang ka ta,Mi thiem thiemna chu hnawl ka tih'b ti ziek a nih.
20. Khaw la'm in tu lai mi varhai, mi thiemhai le dawnrilhai chu an um a? Hi khawvel varna hi Pathienin invetthlakah a siem tah annawm a ni?
21. Pathien var dan le a lawmzawng chu, khawvelin a varna hmanga Pathien an hriet thei ta naw hnunga keini thu hril invetthlak hmanga a ringtuhai sandam hi a nih.
22. Judahai chun inchikna thilmak an phut kher hlak a, Grikhai hlak chun varna ngot an zong a,
23. keini ruok chun hemde Krista thu chu kan hril lem hlak a nih; chu chu Judahai ta dingin daltu a na, Jentelhai ta dingin thil invetthlak a ni bok.
24. Amiruokchu, Juda mi khom ni sien, Grik mi khom ni sien, Pathienin a kohai ta ding chun Krista chu Pathien thilthawtheina le Pathien varna a nih.
25. Pathien invetna chu mihriem varna nekin a var lem a, Pathien hrat nawna khom mihriem hratna nekin a hrat lem.
26. Unauhai, ko in ni laia in ngirhmun kha ngaituo ro, nangni laia mi tam tak hi mihriem inkhinaa chu mi var in ni naw a, mi thilthawthei tak khom in ni naw a, sungkuo thaa inthoka hung khom in ni bok nawh.
27. Nisienlakhom, Pathienin khawvel ngaia thil invetthlakhai chu mi varhai sulmuolphona dingin a thlang a; khawvel ngaia thil ongrophai chu thil hrathai sukmuolphotu dingin a thlang bok a.
28. Thil um ta sahai chu ieng khom loa a siemna dingin hi khawvela thil hnuoihnung le hmusitum le thil um lohai chenin a thlang bok a nih,
29. Pathien hmaah tu khom an uong thei nawna dingin.
30. Nangni ruok chu Ama zarin Krista Isua chun in um tah a, ama chu Pathiena inthoka ei varna, ei felna, ei thienghlimna le ei intlanna a hung ni tah.
31. Chuleiin, 'A uong nuom taphot chun Lalpa uongpui raw se' ti ziek khom a ni kha.
      1Corinthians (1/16)  →