←  1Chronicles (29/29)    
1. Chun, lal Davidan mipui po po kuomah, "Pathien thlang suok ka naupa Solomon hi a la naupangin a tonhriet a la tlawm a. A thaw ding hi mihriem chengna in ding ni loin Pathien ta dinga in a ni leiin a ropui si a.
2. Ka theitawpin ka Pathien tempul bawlna dingin chak ka lo lak khawm a, rangkachak hmangna dingah rangkachak, tangkaruo hmangna dingah tangkaruo, dar hmangna dingah dar, thir hmangna dingah thir, thing hmangna dingah thing hmang dinghai khom ka lo buotsai ta a. Chun, a cheinaa zep ding onik lung hai, lunghlu dumpawl chi dam, lungmawi rong chi hrang hrang dam, lunghlu chi hrang hrang le sailungvar hai tam tak ka lak khawm ta bok a.
3. Chu chau khom chu ni loin, ka Pathien Tempul hi ka'n voipui em leiin, tuta ka buotsai ta sahai hi tiem loin, keima sum, rangkachak le tangkaruohai khom ka Pathien Tempula dingin ka pek a.
4. Chuonghai chu a bang inluonnaa hmang ding dam,
5. a hmangna kong hrang hranga kut themthiemhai hmang dingin Ofiraa inthoka rangkachak hlir ka phur suok kilogram nuoi khat le tangkaruo hlir kilogram nuoi hni le singli vel a nih. Tu hin, LALPA ta dinga phal taka pe ve nuom mi dang ei um am?" a ta.
6. Chuongchun, sungkuoa lukhaitu hai, Israel hnam tina hotu hai, sipai sangkhat pei le zakhat pei chunga kawmandar hai le lal hnuoia thoktuhai chun phal takin an hung pek a.
7. Pathien Tempul bawlna dinga an pek po chu rangkachak kilogram nuoi khat le sing sari neka tam, tangkaruo kilogram nuoi thum le sing li neka tam, dar kilogram nuoi ruk le sing hni neka tam, thir kilogram maktaduoi thum le nuoi li neka tam a nih.
8. Lunghlu neihai chun LALPA tempula thilhlu sie khawmna enkoltu Gerson mi Jehiel kutah an pek a.
9. Lungril hmun khat puta lawm taka LALPA an pek leiin mipuihai chu an hlim em em a; lal Davida khom nasa takin a hlim a.
10. Mipui hung inkhawm po po hmaa chun Davida'n LALPA a'n pak a:"Aw LALPA, kan pu Israel Pathien,Chatuona inthok chatuon chenin,Chawimawina chang kumkhuo rawh.
11. Ropuina le thilthawtheina hai,Chawimawina, lalna le mawina hai,Hnuoi le vana thil iengkim hai,Nangma ta vong a nih, LALPA.Ram chu LALPA i ta a na,Iengkim chunga leng i ni si a.
12. Hausakna le chawimawinahai,Nangmaa inthoka hung vong a na,Iengkim chunga roreltu i nih.Hratna le thilthawtheinahai,Chawisang le sukhrat theina po po,Nangma kuta um vong a nih.
13. Chuleiin tu hin kan Pathien,I kuomah lawmthu hung hrilin,I hming ropui kan inpak.
14. "Nisienlakhom, kei le ka mihai telulin hieng khopa tam i kuoma thilhlan phal taka kan hung pek thei hi kan theina leia kan hung pek ni loin, iengkim hi nangmaa inthoka kan dong vong a na, i kuta inthoka kan donghai chu kan hung pek nawk el lem che a nih.
15. I mithmuah ram dang mi le mikhuol el kan ni a, kan pi le puhai khom an ni tho kha. Hnuoia kan ni tin nun hi hlim ang chauh a na, beisei ding hrim a um nawh.
16. Aw LALPA kan Pathien, i hming thienghlim ta dinga Tempul bawlna dinga kan hung pekhai po po hi nangma kuta inthoka hung vong a na, i ta vong a nih.
17. Aw ka Pathien, nang chun lungril i fie hlak a, indikna i lawm ti ka hriet. Hieng thilhai po po hi phal takin ka hung pek a, ka pekna san khom a'n dik a nih. Hi taka um i mipuihaiin phal taka an pek ka hmu hin ka lawm takzet a nih.
18. Aw LALPA, kan thlatu Abraham le Isak le Israel Pathien, phal taka pek nuomna hi kumkhuoin i mihai lungrilah inneitir la, nangma tan zing dingin an lungrilhai vongpek rawh.
19. Ka naupa Solomon hin i thupek hai, i thu inhriettir hai le i dan hai po po zawm a, ka lo buotsai lawk tah i in ropui bawl dingin inpekzona lungril inneitir rawh" a ta.
20. Chu zoah Davida chun pungkhawm po po kuomah, "LALPA in Pathien chu inpak ro" a ta. Chuongchun, mipui po po chun LALPA, an pi le puhai Pathien chu an inpak a, an kun a, LALPA le lal hmaa chun an bokkhup a.
21. A zinga chun LALPA kuoma inthawina le pumraw thilhlana dingin bawngchal sangkhat le beramchal sangkhat le beramte sangkhat le dawn ding thilhlanhai leh Israelhai po po ta dingin inthawina tam tak an inhlan a.
22. Chu ni chun LALPA hmaah hlim taka fain an dawn tlang a. Davida naupa Solomon chu lalah an namnghet nawk a, roreltu dingin LALPA hmaah hriek an nal a, Zadok chu thiempu dingin hriek an nal bok a.
23. Chuongchun, Solomon chu LALPA lalthungphaa chun a pa Davida hmunah lalin a thung a, hmuingil takin a um a, Israelhai po poin a thu an zawm a.
24. Hotu po po le mi huoisen le hrat khawkhenghai le Davida naupahai po po chun lal Solomon hnuoia kun dingin thu an intiemkam a.
25. Israel mihai po po hmuah LALPAN Solomon chu a chawisang a, Israel rama a hmaa lalhai laia tu khom la chang phak ngai lo lal nina ropui tak chu a'n changtir a.
26. Jesai naupa Davida chu Israelhai po po chunga lal a nih.
27. Israelhai chungah kum sawmli lalin a um a, Hebron khuoah kum sarih, Jerusalemah kum sawmthum le kum thum a'n lal a nih.
28. Upa tak, tar kuna nun hmangin, hausaknaa vur le chawimawi hlawin a thi a, a naupa Solomon chun a lalna chu a hung hluo ta a.
29. Davida inlal lai chanchin, a bula inthoka a tawp chenin, zawlnei Samuel lekhabua hai, zawlnei Nathan lekhabua hai, zawlnei Gad lekhabua hai a chuong a;
30. chu bakah a'n lal laia chanchin le a thilthawtheizie po po le ama le Israelhai le a ram chunga thil tlunghai chu kimchang takin an ziek bok a nih.
←  1Chronicles (29/29)