←  1Chronicles (28/29)  →
1. Davida chun Israel hotu po po-hnam tina upa hai, lal rongbawltu sipai divizon tina kawmandar hai, sipai sangkhat pei le zakhat pei chunga kawmandar hai, lal le a sungkuohai in le lo le ran ruolhai enkoltu hai, lal ina thoktu po po hai, mi lien le indonaa mi huoisen le hrat khawkhenghai po po chu Jerusalemah a ko khawm a.
2. Lal Davida chu a ngir a, "Ka unauhai le ka mihai, ka thu hi lo ngaithla ro. Kei chun LALPA Thuthlungna Bawm siena le ei Pathien ke innghatna ding in bawl ka lo lungril hlak a, in bawlna ding chak khom ka lak ta a.
3. Nisienlakhom, Pathienin ka kuomah, 'Nang chu indo mi, thisen insuo mi i ni leiin ka hminga ding in chu bawl naw ti nih' a ti a.
4. "Amiruokchu, LALPA, Israel Pathienin ka pa sungkuo po po laia inthokin Israel lala kumkhuoa um dingin a mi lo thlang ta a. Juda hnam chu lukhaitu dingin a thlang a. Chun, Juda hnam lai khom ka pa sungkuo, ka pa naupahai laia inthokin Israelhai po po lalah a mi lo thlang suok ta bik a.
5. LALPAN naupa tam tak a mi peka chu ka naupahai po po laia inthokin Israel lala LALPA ram lalthungphaa inthung dingin ka naupa Solomon hi a lo thlang bok a.
6. Chuongchun, ka kuomah, "I naupa Solomonin ka in le ka tuolzawlhai chu indin a tih. Ka naupa dingin ka thlang ta a, chuongchun a pa ning ka tih.
7. Tuta in zawm zing anga ka thupekhai le ka rorelhai a zawm zing phot chun, a ram chu kumkhuoa dingin suknghet ka tih' a ti a.
8. "Chuongchun, LALPA mihai, Israelhai po po mithmuah le ei Pathien hrieta hin LALPA in Pathien thupek po po chu zawm ding le ngaiven dingin ka'n fui cheu a nih. Chuonga in thaw chun hi ram tha tak hi hluo zing in ta, in hnunga in thlahai pei kuomah kumkhuoin in rochung sawngtir pei in tih.
9. "Chun, nang ka naupa Solomon, i pa Pathien hi hre la, lungril tha famkim putin phur takin a rong bawl hlak rawh. LALPA chun lungril a en hlak a, lungrila suongtuona po po khom a hriet vong a. Ama i zong chun hmung i ta, i nghatsan ruok chun kumkhuoin pei thlang a ti che.
10. Inngaituo raw khai; hmun thienghlim ding in bawl dingin LALPAN a ruot ta che a ni hi. Hrat takin um la, bawl ta raw leh" a ta.
11. Chuongchun Davida chun a naupa Solomon chu biek in hulhliep lem hai, a in lem hai, sum sie khawmna in lem hai, pindan chunghnung lem hai, a sung pindan lem hai, zangaina thungpha lem hai,
12. a lungrila a suongtuona ang po po, LALPA in inhuonna tuolzawl lem hai, a vela pindan lem po po hai, Pathien ina sum sie khawmna ding in lem hai, thil ser thieng tah hai sie khawmna ding in lem hai chu a pek a.
13. Chun, thiempuhai le Levihai a pawl pawla an umna ding lem hai, LALPA ina rong an bawlna hmun ding lem hai, LALPA ina rongbawlnaa hmang ding bur le bel lem hai,
14. rongbawlna kong hrang hranga hmang ding bur le bel chi tin, rangkachak le tangkaruo bur le bel le a siemnaa rangkachak le tangkaruo hmang zat ding hai,
15. a hmangna ding dungzui ang peia rangkachak le tangkaruo khawnvar siena ding lem le a khawnvarhai siemnaa rangkachak le tangkaruo hmang zat ding hai,
16. hlanbei siena ding dawkan lem hai, pakhat pei siemna dinga rangkachak le tangkaruo hmang zat ding hai,
17. sa thurna ding rangkachak hlira siem thirkut hai, thil thena thlengkum hai, notung hai, rangkachak hlira siem thleng hai, tangkaruo hlira siem thleng le berbu hai siemnaa hmang zat ding hai;
18. rangkachak hlira siem, rimtui rawna maicham ding dam, rangkachak cherubhaiin LALPA Thuthlungna Bawm chunga thla zara an veng lai lem le a chuongna ding tawlailir siem dan ding lem hai khom a pek bok a.
19. Davida chun, "Hieng thil po po, ka chunga LALPA kut innghatin a ziekhai chu ka kol vong a, a ruohmanghai a kip a kawia hriet thiemna khom a mi pek bok a nih" a ta.
20. Chun, Davidan a naupa Solomon kuomah, "Hrat tak le huoisen takin um la, in chu bawl ta rawh. Ti naw la, zam bok naw rawh. LALPA Pathien, ka Pathien chun umpui a ti che. LALPA chun Tempul i bawl zo hma khat inthla naw ni che a, nghatsan ngai bok naw ni che.
21. Tempula thiempuhai le Levihai sinthaw ding seng khom ruot fel vong a ni ta a, ieng sina khom kong tinrenga kut themthiem thangpuitu ding che um zing an ta, hotuhai le mipui po po khomin i thupek taphot chu zawm pei an tih" a ta.
←  1Chronicles (28/29)  →