←  1Chronicles (27/29)  →

---

1.

Hi hi Israel mi, sungkuo tina lukhaitu, sipai sangkhat pei le zakhat peia kawmandar hai le an ofisar hai, lal Davida sipai divizona thang, kum tluona thla khat peia inthlakhai zat inchikna chu a nih. Sipai divizon khata um chu mi singhni le sangli an nih.

2.

Divizon pakhatna, a thla khatnaa hotu chu Zabdiel naupa Jashobeam a nih. A divizona um zat chu mi singhni le sangli an nih.

3.

Ama chu Perez thlaa mi a na, thla khatnaa sipai hotu po po chunga hotu lien tak a nih.

4.

Thla hninaa divizon hotu chu Aho mi Dodai a na, a hnuoia hotu chu Miklot a nih. A divizona um zat chu mi singhni le sangli an nih.

5.

Sipai divizon pathumna, a thla thumnaa kawmandar chu thiempu Jehoiada naupa Benaia a nih. Ama chu sipai lu tak a na, a divizona um zat chu mi singhni le sangli an nih.

6.

Hi Benaia hi a nih 'Pasaltha Sawmthum' laia mi huoisen, sawmthum chunga hotu nina cheltu kha. A divizon inrawitu chu a naupa Amizabad a nih.

7.

Divizon palina, a thla linaa hotu tak chu Joab unaupa Asahel a na, ama thlaktu chu a naupa Zebadia a nih. A divizona um zat chu mi singhni le sangli an nih.

8.

Divizon pangana, a thla nganaa an kawmandar chu Izra mi Samhut a nih. A divizona um zat chu mi singhni le sangli an nih.

9.

Divizon parukna, a thla ruknaa hotu chu Teko mi Ikes naupa Ira a nih. A divizona um zat chu mi singhni le sangli an nih.

10.

Divizon pasarina, a thla sarinaa hotu chu Efraim thla Pelon mi Helez a nih. A divizona um zat chu mi singhni le sangli an nih.

11.

Divizon parietna, a thla rietnaa hotu chu Zera thla, Husat mi Sibekai a nih. A divizona um zat chu mi singhni le sangli an nih.

12.

Divizon pakuona, a thla kuonaa hotu chu Benjamin thla Anathot mi Abiezer a nih. A divizona um zat chu mi singhni le sangli an nih.

13.

Divizon sawmna, a thla sawmnaa hotu chu Zera thla Netofat mi Maharai a nih. A divizona um zat chu mi singhni le sangli an nih.

14.

Divizon sawmpakhatna, a thla sawm le thla khatnaa hotu chu Efraim thla Pirathon mi Benaia a nih. A divizona um zat chu mi singhni le sangli an nih.

15.

Divizon sawmpahnina, a thla sawm le thla hninaa hotu chu Netofat mi, Otniel sungkuoa mi Heldai a nih. A divizona um zat chu mi singhni le sangli an nih.

16.

Israel hnam tin chunga an hotuhai chu: Reuben hnam hotu Zikri naupa Eliezar; Simeon hnam hotu Maaka naupa Sefatia;

17.

Levi hnam hotu Kemuel naupa Hasabia le Aron thlahai hotu Zadok;

18.

Juda hnam hotu Davida unaupa Elihu; Isakar hnam hotu Mikael naupa Omri;

19.

Zebulun hnam hotu Obadia naupa Ismaia; Naftalia hnam hotu Azriel naupa Jerimot;

20.

Efraim hnam hotu Azazia naupa Hosea; Manase hnam zatve hotu Pedaia naupa Joel;

21.

Gilead rama Manase hnam zatve hotu Zekaria naupa Ido; Benjamin hnam hotu Abner naupa Jasiel;

22.

Dan hnam hotu Jeroham naupa Azarel. Hienghai po hi Israel hnamhai chunga lukhaituhai chu an nih.

23.

Israel thlahai chu vana arasi anga tam an la ni dingzie LALPAN thu a tiem leiin, Davida chun kum sawmhni hnuoi tieng chu a tiem sa ve nawh.

24.

Zeruia naupa Joab chun a hang tiem tan a, sienkhom intiem lei chun Pathien lungsenna Israel chungah a hung tla a, a tiem zo hman ta naw a, lal Davida inlal lai chanchin zieknaa khom a zat ziek a ni bok nawh.

25.

Lal ina rosum le thil sie khawmna po po enkoltu chu Adiel naupa Azmavet a nih. Khawpui puo tieng biel hrang hrang le khawpui, khawte le ralvengbuka an sie khawmhai po po enkoltu chu Uzia naupa Jonathan a nih.

26.

Loa sinthawtuhai po po enkoltu chu Kelub naupa Ezri a nih.

27.

Grep huon po po enkoltu chu Ramat mi Simei a nih. Uoiin le a siena hmun po po enkoltu Sifmot mi Zabdi a nih.

28.

Thlang tieng tlang thuta oliv le theichang bilhai po po enkoltu chu Geder mi Baal-Hanan a nih. Oliv hriek siena po po enkoltu chu Joash a nih.

29.

Saron phaia ran tlatna hmun po po enkaitu chu Saron mi Sitrai a nih. Ruoma ranhai enkaitu chu Adlai naupa Safat a nih.

30.

Sanghawngsei po po enkoltu chu Ismael mi Obil a nih. Sabengtung po po enkoltu chu Meronot mi Jehdeia a nih.

31.

Beram ruol enkaitu chu Hagar mi Jaziz a nih. Chuonghai po po chu lal Davida in le lo enkoltuhai chu an nih.

32.

Davida pate, mi inril tak le lekha thiem tak Jonathan chu remruotpuitu a na, Hakmoni naupa Jehiel chu lal naupahai zirtirtu a nih.

33.

Ahitofel chu lal mi rawn a na, Ark mi Husai chu lal ruol tha a nih.

34.

Ahitofel chu Benaia naupa Jehoiada le Abiatharin an hung thlak a. Joab chu lal sipaihai kawmandar a nih.

---

←  1Chronicles (27/29)  →