←  1Chronicles (26/29)  →
1. Kotkhar vengtu pawlhai chu: Kora thlahaia inthoka mi chu Asaf naupahai laia pakhat Kore naupa Meselemia a nih.
2. Meselemia naupahai chu a upa tak Zekaria, a dottu Jediael, a pathumna Zebadia, a palina Jatniel,
3. a pangana Elam, a parukna Jehohanan le a pasarina Eliehoenai an nih.
4. Obed-Edom naupahai chu a upa tak Semaia, a dottu Jehozabad, a pathumna Joah, a palina Sakar, a pangana Nethanel,
5. a parukna Amiel, a pasarina Isakar le a parietna Peulethai an nih. Ama chu Pathienin mal a sawm a nih.
6. A naupa Semaia naupahai khom mi thei tak vong le anni sungkuoa lukhaitu an nih.
7. Semaia naupahai chu Otni, Refael, Obed le Elzabad an na; a unauhai Elihu le Semakia khom mi thei tak an nih.
8. Chuonghai chu Obed-Edom thla, a naupahai le unauhai, rongbawlna konga mi hrat le thei tak tak, an rengin mi sawmruk le pahni an nih.
9. Meselemia khomin naupa le unau sawm le pariet, mi thei tak tak vong a nei a.
10. Merari thlaa mi Hosa naupahai chu Simri (a upa tak a ni nawa chu a pain naulutir nina a pek a nih),
11. a dottu Hilkia, a pathumna Tabalia, a palina Zekaria hai an na, a naupahai le unauhai chu an rengin sawmpathum an nih.
12. Chuong ang chu an lukhaituhai hmanga an unau danghaiin an thaw hlak ang boka LALPA tempula kotkhar veng sin chu thaw dinga vengtu pawl an siemhai chu an nih.
13. A chin a lien, an sungkuo zir ang peiin kotkhar tina diuti ding chu thum an vawr a.
14. Thum an vawr chun suo tieng kotkhar chu Meselemia chanah a tlu a. A naupa, roreltu var tak Zekaria dingin thum an vawr nawk a, hmar tieng kotkhar chu a chang a.
15. Sim tieng kotkhar chu Obed-Edom chanah a tlu a, thil sie khawmna in kot chu a nauhai chanah a tlu bok a.
16. Thlang tieng kot le a chung tienga Saleket kotkhar veng chu Supim le Hosa chanah a tlu bok a. Vengtuhai veng sung ding le an inthlak hun ding chu an ruot vong a.
17. Suo tieng kotah ni tin Levihai paruk, hmar tieng pali, sim tieng pali, thil sie khawmna kudamah pahni ve ve, an diuti a.
18. Thlang tieng in inhuon sunga dingin a lutnaah mi pali, a huon sungah mi pahni an diuti bok a.
19. Chuong ang chu a nih kotkhar vengtu pawla Kora thlahai le Merari thlahai an inthe dan chu.
20. Chun, Pathien ina rosum siekhawmna le Pathien kuoma thil inhlanhai siekhawmna in chu an unau Levihai bokin an veng a.
21. Chuonghai chu Ladan thlahai, Ladan sungkuoa lukhaituhai, Gerson mi tia hriet Jehieli le a naupahai Zetham le Joel hai an nih.
22. LALPA tempula sum sie khawmna in vongtu an nih.
23. Aram mihai, Izar mihai, Hebron mihai le Uziel mi haia inthokin:
24. Mosie naupa Gersom naupa Subael chu sum tieng enkoltu lu tak a nih.
25. Chun, Gersom unaupa Eliezar naupa chu Rehabia a na, chu naupa chu Jesaia a na, chu naupa chu Joram a na, chu naupa chu Zikri a na, Zikri naupa chu Selomit a nih.
26. Selomit le a unauhai chu lal Davida le an sungkuoa lukhaitu sipai sangkhat chunga le zakhat chunga kawmandar hai le kawmandar hrang hrang haiin rallak sum hmun thienghlima an hung inhlan po po siekhawmna in enkoltu le vongtu an nih.
27. Rallak sum thenkhat chu LALPA in siemna dinga an inhlan a nih.
28. Zawlnei Samuel hai, Kisa naupa Saula hai, Nera naupa Abner hai, Zeruia naupa Joab hai le mi dang dangin an inhlan ta po po enkoltu le vongtu chu Selomit le a unauhai an nih.
29. Izar mi Kenania le a naupahai chu tempul puo tieng sina inhmang, Israel ram sunga hotu le roreltuhai an nih.
30. Hebron mi Hasabia le a unauhai, mi huoisen sangkhat le zasarihai chu Jordan vadung thlang tieng ram optuah an sie a, sakhuo tieng thu le vantlang thil ngaituo hlaktu dinga ruot an nih.
31. An sungkuo chanchina a'n ziek danin, Hebron mihai thuoitu tak chu Jeria a nih. Davida inlala inthoka kum sawmlinaah Hebron thlahai chanchin an sui suok a, Gilead biel Jazera khuoah mi hrat le huoisen an lo um teu el a.
32. Jeria chun unau, sungkuo tina lukhaitu mi singhni le sangsari zet a lo nei a, chuonghai chu Jordan vadung sak tieng Reuben hai, Gad hai le sak tienga Manase hnam zatve hai ram sunga sakhuo tieng thil le tuolsung tieng thu reltu dingin Davida'n a ruot a.
←  1Chronicles (26/29)  →