1Chronicles (23/29)  

1. Davida chu sawt tak a dam a, a hung upat hle hnung chun a naupa Solomon chu Israelhai lalah a siem a.
2. Israel thlahai lukhaitu po po le thiempuhai le Levi thlahai chu a ko khawm a.
3. Kum sawmthum le a chung tieng Levi thlaa mi pasal an tiem po po chu singthum le sangriet an nih.
4. Chuong laia mi singhni le sangli chu LALPA in bawltuhai inrawitu ding an na, sangrukhai chu hotu le roreltu ding an nih.
5. Mi sangli chu kotkhar vengtu ding an na, sangli dang chu LALPA inpakna dinga lalin rimawi hmangruo a pekhai tumtu ding an nih.
6. Davida chun Levihai chu Gerson pawl, Kohat pawl le Merari pawlin a the tawl a.
7. Gerson naupahai chu Ladan le Simei an nih.
8. Ladan naupahai chu Jehiel, Zetham le Joel an nih.
9. Simei naupahai chu Selemot, Haziel le Haran an nih. Chuonghai chu Ladan sungkuoa lukhaituhai an nih.
10. Chun, Simei naupahai chu Jahat, Ziza (Zina), Jeus le Beria an nih. Chuong mi palihai chu Simei naupahai an nih.
11. Jahat chu a upa tak a na, Ziza chu a pahnina a na, Jeus le Beria hai chun nau an hau naw leiin sin insem pha leh sung khat angin an tiem hlak.
12. Kohat naupahai chu Amram, Izar, Hebron le Uziel, an rengin pali an nih.
13. Amram naupahai chu Aron le Mosie an nih. Aron le a thlahai chu LALPA bieknaa rimtui rawtu, in thawina thilhlanhai inhlana hmangruo thienghlim enkoltu le LALPA hminga mipuihai ta dinga malsawm hriltu dinga ser hrang an nih.
14. Pathien mi Mosie thlahai chu Levi chihai laia zel sa an nih.
15. Mosie chun naupa Gersom le Eliezar a nei a.
16. Gersom naupahai laia upa tak chu Subael a nih.
17. Eliezar thlahai laia upa tak chu Rehabia a nih. Eliezer chun naupa dang a nei naw a, sienkhom Rehabia chun naupa tam tak a nei.
18. Izar naupahai laia upa tak chu Selomot a nih.
19. Hebron naupahai laia upa tak chu Jeria, a dottu Amaria, a pathumna Jahaziel le a palina Jekameam an nih.
20. Uziel naupahai chu a upa lem Mika a na, a naupang lem Isia a nih.
21. Merari naupahai chu Mahli le Musi an nih. Mahli naupahai chu Eleazar le Kisa an nih.
22. Eleazar chun naupa nei loin naunu chauh a nei a, an laichin Kisa naupain nuhmeiah a nei a.
23. Musi naupahai chu Mahli, Eder le Jerimot, an rengin pathum an nih.
24. Chuonghai po chu Levi thla, an sungkuo hming inziek dan anga sungkuo lukhaitu, LALPA ina rongbawla thang, kum sawmhni chin chung tieng an tiem pohai chu an nih.
25. Davida ngeiin, "LALPA Israel Pathien chun a mihai muongna pe a, ama chu kumkhuoa Jerusalema cheng dinga a hung tah leiin,
26. Levihai khomin biekbuk zawna, bur le belhai an som pei ngai ta naw nih" a lo ti hrim a.
27. Davida thupek nuhnung tak ang dungzuiin Levi chia mihai chu kum sawmhni an tlingin rongbawla ko thei dingin an hming ziek vong a nih.
28. Levihai sinthaw chu Pathien Tempula rongbawl, Aron nauhai thangpui dam, Tempul tuolzawl le pindan sunga thil serhai po po vong thienghlim le LALPA ina rongbawlna dang hrim hrima inhmang a nih.
29. Bei sie ding dam, bu le bal inhlana hmang ding beiphit indip tak buotsai dam, chol thang lo bei per amanih, bela ur amanih zeu amanih dam, indik thlapa thil buk le inkhi dam a nih.
30. Chun, tuk tin le zan tieng zata LALPA kuoma lawmthu hril le ama inpak dam,
31. chawlnia dam, thla thara dam, hunbi nei kut hrang hranga an thaw dinga ruot ang peia LALPA kuoma pumraw thilhlan inhlan rop dam,
32. Intuokna Puon in enkol dam, Hmun Thienghlima biekbuk enkol dam, LALPA ina rongbawl, an unau Aron naupahaiin thaw ding an ruot ang pei thaw dam chu an sin a nih.

  1Chronicles (23/29)