←  1Chronicles (22/29)  →
1. Davida chun, "LALPA in le Israelhai ta dinga pumraw inthawina maicham chu hi hmuna ngei hin a um ding a nih" a ta.
2. Chuongchun, Davidan Israel rama hnam dang umhai chu a ko khawm a, LALPA in bawlna ding lung sertuah a sor tawl a.
3. A tuol inhuonna kotkhara hmang ding thirkil dam, a man nghetna ding kopza dam le hmangruo dang dang siemna dingin thir tam tak le dar tam tak, buk seng lo hiel chu a pek a.
4. Sidon le Tura mihaiin sidar thing tam tak an hung thon a, sidar thing a pek suok zat khom inchik seng lo a nih.
5. Davida chun, "Ka naupa Solomon hi a la naupang a, chinchang a la hriet tlawm a, LALPA in ding a bawl ding hlak chu hnam tin mithmua mawi ropui le hmingthang tak ding a ni si leiin chak ka lo buotsaipui lawk ding a nih" a ta, a thi hmain nasa takin a lo sek khawm hman a nih.
6. A naupa Solomon chu a ko a, LALPA Israelhai Pathien ta ding Tempul bawlpek dingin thu a pek a.
7. Davida chun Solomon kuomah, "Ka naupa, LALPA ka Pathien hminga ding in bawl ka lo lungril hlak a.
8. Nisienlakhom, LALPA thu ka kuomah a hung tlung a, 'Indonaah i thang rawn a, thisen tam tak i lo insuo ta a. Hi hnuoia hin ka mithmuah thisen i'n suo rawn ta leiin ka hminga ding in bawl thei naw ti nih.
9. Ngai ta, inremna dit mi naupa a hming Solomon peng ka ti che a, a hming hi 'muongna' ti a ni ang hrimin, a vel rama a hmelmahai po po lakah ralmuongna peng ka ta, ama inlal sungin inremna le muongna inleng a tih.
10. Ama chun ka hminga ding in chu bawl a tih. Ka naupa ning a ta, kei chu a pa ning ka tih. Israelhai chunga a ram lalthungpha chu kumkhuoa dingin suknghet ka tih' tiin
11. "Tuhin ka naupa, LALPA chu i kuomah um sien la, hmuingil pei la, LALPA i Pathienin a in bawl dinga a ti che hi hung bawl hlawtling ngei rawh.
12. Israelhai chunga roreltuah LALPAN a sie pha che leh varna le hriet thiemna pe sien la che, chuongchun LALPA i Pathien dan chu zawm thei i tih.
13. Israelhai ta dinga thuruothai le Danhai LALPAN Mosie a pek kha i zawm phot chun hmuingil pei i tih. Hrat tak le huoi takin um rawh; ti naw la, zam bok naw rawh.
14. "Inrim takin LALPA in bawlna dingin rangkachak kilogram maktaduoi thum le nuoi li le tangkaruo kilogram maktaduoi thum le nuoi li, dar le thir khom buk seng lo le thing le lung chakhai ka lo lak khawm ta a, sienkhom i la lak sa ngai a tih.
15. Sinthawtu tam tak, thing attu hai, lung sertu hai le mi themthiem, iengkima hmang thei i nei teu ta a,
16. rangkachak le tangkaruo, dar le thir ser thiem tak tak i nei teuh ta bok leiin bawl tan nghal el ta rawh, LALPA chu i kuomah um raw se" a ta.
17. Chuongchun, Davida chun Israel hnama lukhaituhai po po chu a naupa Solomon thangpui dingin thu a pek a.
18. "LALPA in Pathien chu in kuomah a um a ni naw am a ni? Sir tinah ralmuongna a pek cheu a ni naw am a ni? Hi rama mihai hi ka kutah a hung inhlan ta a, ram hi LALPA le a mipuihai thu hnuoia um a ni tah.
19. Chuongchun, LALPA in Pathien tieng nghain, lungril le thlarauin a rong bawl unla, LALPA Thuthlung Bawm le Pathien ta dinga hmangruo thienghlimhai chu LALPA hminga ding Tempul in bawla chun in lak lut vak theina dingin Tempul bawl chu tan ta ro" a ta.
←  1Chronicles (22/29)  →