←  1Chronicles (21/29)  →
1. Setanin Israelhai chu a bei a, Israelhai chu tiem dingin Davida lungril a chok tho a.
2. Chuongchun, Davida chun Joab kuomah, "Fe unla, Dan-a inthoka Beersheba chen inkara Israel mi, ral do thei chin ieng zat am an um ti ka hriet theina dingin va tiem vong la, hung ripawt nawk rawh" a ta.
3. Joab chun lal kuomah, "LALPA i Pathien chun i mipuihai a let zain sukpung raw se. Ka pu le ka lal, chuonghai po po chu i khuo le tui an ni vong naw am a ni? Ieng leia ka pu, lal hin hieng thil hi a thaw chak am a na? Ieng leiin am Israelhai chungah thiemnaw changna chu a hung intlungtir ding a na?" a ta.
4. Joab le sipai kawmandarhai thu nekin lal thu chu a hrat lem si leiin Israelhai tiem dingin lal chu a suoksan a, Israel ram po po a fang a, Jerusalemah a hung kir nawk a.
5. Joab chun Israel mi ral do thei, kawlhnam chawi chin zat a ripawt chu maktaduoi khat le nuoi khat le Judai rama mi, kawlhnam chawi chin mi nuoili le singsari an nih.
6. Levihai le Benjaminhai ruok chu a tiem sa ve nawh, lal thupek chu Joab theida zawng tak a ni si a.
7. A thilthaw chu Pathien mithmuah thil suol a ni leiin Israel mihai a hrem a.
8. Davida chun Pathien kuomah, "Thil suol nasa tak ka lo thaw a nih. Sienkhom i siehlaw thiemnaw changna hi ngaidam hram rawh. Thil invetthlak tak ka lo thaw si a" a ta.
9. LALPA chun Davida zawlnei Gad kuomah,
10. "Fe la, hieng ang hin Davida hril rawh: 'Hi hi LALPA thu chu a nih: thil kong thum thlang ding ka pek che laia mi hi i chunga tlung dinga i nuom tak pakhat thlang rawh' a tih" tiin.
11. Chuongchun, Gad chu Davida kuomah a fe a, "LALPAN hieng hin a hril:
12. I rama hin kum saric tam intlaktir am, thla thum sung i hmelmahaiin chem tum le an hnot lenga um am, an naw leh i rama ni thum sung LALPA kawlhnam, hripui inlengtir a, vantirkoin Israel ram hmun tin a suosam, a ieng am i thlang a? Tu hin inngaituo la, a mi tirtu kuoma ka hril ding thu tlukna siem la, chu chu mi hril rawh" a ta.
13. Davida chun Gad kuomah, "Ka bei a va hang dong ngei de! LALPA kutah tlu lut phot el ka tih, zangaina a hau hle si a. Mihriem kuta chu mi pe lut naw hram rawh" a ta.
14. Chuongchun, Israel mihai chungah LALPAN hripui a'n lengtir a, Israel mi singsari an thi a.
15. Chun, vantirkoin sukse dinga Jerusalem tieng ban a phar lai chun, an siet tuok ding laka chun LALPA lung a na leiin kut a'n hnukkirtir a, mipuihai hremtu vantirko kuoma chun, "A hun tah! I kut kei kir ta rawh" a ta. Chu lai chun LALPA vantirko chu Jebu mi Arauna hrizawla ngir a nih.
16. Davida chu a hang ngha a, hnuoi le van inkara vantirko ngir, a kuta kawlhnam chawi a, Jerusalem chunga inlet zing chu a hmu a. Chu phing leh saiip sila ngir Davida le a upahai chu hnuoi sikin an bokkhup a.
17. Davida chun LALPA kuomah, "Ral do thei chin mi tiem dinga thupetu chu keima hi ka ni naw am a ni? Kei hi thilsuol thawa poi tawktu chu ka ni a, mi danghai hi chu beram ang mei mei an nih. Ieng am anni hin suol thaw an nei hrim a? Aw LALPA ka Pathien, i kut chu kei le ka sunghai chunga hin thlak lem la, hripui hi i mihai chungah inlengtir zing ta naw raw khai" a ta.
18. Chuongchun, LALPA vantirko chun zawlnei Gad chu Davida kuomah a tir a, "Fe tung la, Jebu mi Arauna hrizawlah LALPA ta dingin maicham hang siem rawh" tiin a hang hril a.
19. LALPA hminga Gad-in thu a pek chu zawmin, Davida chu a fe tung a.
20. Chun, Arauna-in bu a chil lai chun a hang ngha a, LALPA vantirko a hmu a, a bula um a nauhai pali chu an inbi a.
21. Davida chun a va pan a, Arauna chun a hei hmu phing leh hrizawla inthok chun a hung suok a, a hmaah hnuoi sika bokkhupin lal chu chibai a buk a.
22. Davida chun a kuomah, "Mipui chunga hripui inleng hi a re theina dingin i hrizawla hin LALPA ta dingin maicham siem ka tih, a man tlingin min chawktir raw khai" a ta.
23. Arauna chun Davida kuomah, "Ka pu, ka lal chun awm a ti ang ang chu la raw se. En ta, pumraw thilhlana ding bawngchal le thing hmang ding hrizawl hmangruohai le bu le bal thilhlana hmang ding huit khom peng ka ti che. Hieng po po hi keiman tum vong ka tih" a ta.
24. Sienkhom lal chun Arauna kuomah, "Ni lo e, a man indik tak peng ka ti che. LALPA ta dinga thilhlan dingin i ta a thlawnin la nawng ka tih; a man pe loin pumraw thilhlan khom inhlan bok naw ning" a ta.
25. Chuongchun, hrizawl hmun inchawkna dingin Davida chun Arauna chu rangkachak tangkaruo shekel zarukd a pek a.
26. Davida chun maicham a siem a, pumraw thilhlan le inremna thilhlan hai chu inhlanin LALPA chu a ko a, LALPA chun vana inthokin a hung don a, mei a zuk tir a, maichama pumraw thilhlan chu a kang hmang ta a.
27. LALPA chun vantirko chu thu a pek a, a kawlhnam chu a paiah a thun nawk ta a.
28. Jebu mi Arauna hrizawla chun LALPAN a hung don ngei a nih ti Davida'n a hmu chun inthawinahai a'n hlan a.
29. Chuong lai chun thlalera Mosien LALPA biekbuk le pumraw inhlanna maicham a siem chu Gibeon khuo hmun sanga la um a nih.
30. Sienkhom LALPA vantirko kawlhnam tuor a'n lau leiin Pathien rawn dingin chu hmuna chun Davida a fe ngam naw a nih.
←  1Chronicles (21/29)  →