| ← 1Chronicles (20/29) → |
| 1. | Thal lai, lalhai indo dinga an suok lai chun Joab-in a sipaihai a thuoi a, Amonhai ram chu a suksiet a, Raba-ah a fe a, a'n huol a, Davida ruok chu Jerusalemah a um a. Joab chun Rabat chu a bei a, a suksiet vong a. |
| 2. | Davida chun an rangkachak lallukhum kilogram sawmthum le palia rik, lunghlua chei chu a lak a, chu chu Davida an inkhumtir a, khawpuia inthok chun rallak sum tam tak a lak bok a. |
| 3. | A khaw mihai chu a man a, thing attua dam, lei inlettua dam le thing phurtua dam a sor a. Chuong ang chun Amon thlahai khuo po poah Davida chun a thaw a. Chu zoah Davida le a sipaihai chu Jerusalem tieng an kir nawk ta a. |
| 4. | Chuong hun lai chun Filistinhai leh Gezer-ah an indo nawk a. Chu tum chun Husat mi Sibekai chun mi lien Rafahai thla laia mi Sipai (Safa) chu a that a, Filistinhai chu an tukdol ta a. |
| 5. | Chuong laia an indonaa bok chun Jair naupa Elhanan chun Git mi Goliat unaupa Lami, a fei ngul khom puonkhawngna themtleng tiet zet chu a that bok a. |
| 6. | Chun, Gath hmuna an indonaa chun Rafahai thlaa mi bok, pa lien tak el, kut khing hni ve vea kutpar paruk ve ve le ke khing hnia kepar paruk ve ve, arengin sawmhni le pali nei, a um a. |
| 7. | Ama chun Israelhai a deusaw a, Simea naupa Jonathan, Davida unaupa chun a that a. |
| 8. | Chuonghai chu Gath-a Rafa thlahai an na, Davida le a mihai kutah an thi ta vong a nih. |
| ← 1Chronicles (20/29) → |