← 1Chronicles (18/29) → |
1. | Chuong lai chun Davidan Filistinhai a bei a, a hne a, Gath le a se vel khuohai chu Filistinhai kuta inthokin a lakpek a. |
2. | Davida chun Moab-hai khom a hne a, a thu hnuoiah a sie a, sie an hung chawi hlak a. |
3. | Chu bakah, Zoba lal Hadadezer chun Hamat-a inthoka Eufretis vadung hrul hmar tieng chen nei tuma a bei leiin Davida chun a run a. |
4. | A tawlailir sangkhat, tawlailir khaltu mi sangsari le sipai singhni a manpek a. Sakor zakhat ti chauh naw chu an zaper tha a satpek vong a. |
5. | Zoba lal Hadadezer san dinga Damaskaa inthoka hung Aram sipaihai chu Davidan singhni le sanghni a lo that a. |
6. | Aramhai khawpui Damaskaa chun optu sipai a sie a, Aramhai chu a lalna hnuoiah an lut a, sie an hung chawi a. Davida chu a fena taphotah LALPAN hnena a'n changtir pei a. |
7. | Davida chun Hadadezer ofisarhai rangkachak phaw po po chu a lak khawm a, Jerusalemah a hung chawi a. |
8. | Chun, Hadadezer khuo Teba le Kun-a inthokin Davida chun dar tam tak a hung hawn bok a, chuonga inthok chun a nih a hnungin Solomonin dar tuizeng dam, dar ban pahni dam le bur le bel tam tak a siem chu. |
9. | Hamat lal Tou-in Davidan Zoba lal Hadadezer sipai po po a hne tah ti a lo hriet a. |
10. | Ama le khoma lo indo tah hlak Hadadezer a hne lei chun chibai buk le lawmpui dingin Tou chun a naupa Hadoram chu tangkaruo bel dam, rangkachak bel dam le dar bel dam inchawitir teuin Davida kuomah a tir a. |
11. | Chuong thilpekhai chu hnam dang lal a hne tah Edom hai, Moab hai, Amon hai, Filistin hai le Amalek haia inthoka a rallakhai a'n hlan hlak ang bokin LALPA kuomah a'n hlan a. |
12. | Zeruia naupa Abisai chun Chi Ruomah Edom mi singkhat le sangriet a that a. |
13. | Edom rama chun optu sipai a sie a, Edom mi po po chu Davida thu hnuoiah an hung um ta a. Davida chu a fena taphotah LALPAN hnena a'n changtir pei a. |
14. | Davida chu Israel ram po poa lal a hung ni ta a, mipuihai chungah ro indik tak le fel takin a rel a. |
15. | Zeruia naupa Joab chu sipai lu tak a na; Alihud naupa Jehosafat chu chanchin ziektu a na; |
16. | Ahitub naupa Zadok le Abiathar naupa Ahimelek hai chu thiempu an na; Savsa (Seraia) chu ziektu a na; |
17. | Jehoiada naupa Benaia chu Keret mihai le Pelet mihai hotu a na; Davida naupahai chu lal kuoma thurawn petu an nih. |
← 1Chronicles (18/29) → |