←  1Chronicles (17/29)  →
1. A lal ina Davida a um hnung chun zawlnei Nathan kuomah, "Hi taka hin kei sidar thing inah ka um a, LALPA Thuthlung Bawm hlak chu puon in elah a um si a" a ta.
2. Nathan chun Davida kuomah, "I ngaituo dan ang tak chun thaw raw khai, LALPA chu i kuomah a um si a" a ta.
3. Chu zan chun Nathan kuomah LALPA thu a hung tlung a.
4. "Fe la, ka siehlaw Davida kuomah hieng ang hin hril rawh: 'LALPA chun hieng hin a hril: Nang chu ka umna ding in bawltu ding i ni nawh.
5. Aigupta rama inthoka Israelhai ka thuoi suoka inthok tu chen hin inah ka la um ngai naw a, puon in le biekbukah ka um pei lem hlak a.
6. Israel mihai thuoia ka fepui lai khom khan thuoitua ka ruot tu khom sidar thinga Tempul mi bawlpek dingin ka phut ngai nawh.
7. " 'Chuleiin, ka siehlaw Davida kuomah, 'Iengkim LALPAN hieng hin a tih: Beram tlatna hmuna beram i veng lai chu ka mi Israelhai chunga lal dingin ka lak suok che a.
8. I fena taphotah ka umpui che a, i hmelmahai po po khom i hmaah ka tukdol vong ta a, tu hin khawvela lal hmingthang takin ka siem ding che a nih.
9. Ka mi Israelhai ta dingin hmun peng ka ta, chu taka chun anni chu phun ka ta, anni puolin in nei tang an ta, sukbuoi ni ta naw ni hai. A tira inthoka mi rilohaiin an sawr de hlak ang khan sawr de ni ta naw ni hai.
10. Ka mi Israelhai chunga roreltu ka ruothai chun a tir phata inthokin an sawr de char char hlak a ni kha. Chun, i hmelmahai po po suktlawm bok ka tih. Chu bakah, LALPAN sungkuo indinpek a ti che ti ka hril che.
11. I nihai a kin phaa i thlatuhai kuoma i chawl pha khomin i thlahai ngei, i nauhai laia mi chu nangma thlaktu ding indinpek ka ti che a, a lalram chu suknghet ka tih.
12. Ama chun in mi bawlpek a ta, a lalthungpha chu kumkhuoin suknghet ka tih.
13. A pa ning ka ta, ama chu ka naupa ning a ta, ka hmangaina i hmaa inlal ka lakpek ang khan ama lakah ka hmangaina chu la hmang ngai hrim hrim naw ning.
14. Ka mihai le ka lalram enkoltu dingin kumkhuoin sieng ka ta, a lalthungpha chu kumkhuoin suknghet ka tih' a tih" tiin.
15. Chuong chun thu inhriettira a umhai chu Nathan chun Davida kuomah a hril vong a.
16. Chuongchun, lal Davida chu a lut a, LALPA hmaah a thung a, "Aw, LALPA Pathien, kei hi tu am ka ni a, ka sunghai khom ieng am an ni hrim a, hieng chen chen i mi thuoi el hi?
17. Aw Pathien, hi khom hi i mithmua chu huntawk i la ti naw ang elin, i siehlaw sungkuo la hung um dan pei ding chen khom i hril a. Aw LALPA Pathien, mihriem laia chawimawi hlaw tak angin i mi cheibawl el chu a na maw!
18. "I siehlaw i chawimawina bak hi ieng am Davida hin ngen ding dang ka la nei rop a? I siehlaw hi i hriet tlang vong si a.
19. Aw LALPA, i siehlaw thatna dingin i dit dan ang takin hieng thil ropui tak hi thawin, i thutiem ropui tak chu i hung inhriettir ta a.
20. Kan hriet phaka chu aw LALPA, nangma ang hi tu khom an um naw a, nangma naw chu Pathien hrim hrim an um nawh.
21. Aigupta rama inthoka hming ser khopa i'n tlan suok, thil ropui tak tak le rapum tak tak thawa an hmaa hnamhai i hnot suokpek i mi Israelhai anga an Pathien ngei inthok suoka a ta dinga a'n tlan suok hnam dang khawvela hin tu khom an um nawh.
22. I mi Israelhai chu i mihai ni kumkhuo dingin i siem ta a, aw LALPA an Pathien i hung ni tah ngei el.
23. "Chuongchun, tu hin aw LALPA, i siehlaw chungchang thu le a sunghai chungchang thu i hril chu kumkhuoa dingin suknghet la, i tiem tah ang khan hlen ngei rawh.
24. I suknghet chun kumkhuoin i hming chawimawiin um a ta, mihaiin 'Iengkim LALPA, Israel chunga Pathien hi Israelhai Pathien a lo ni takzet el' ting an tih. Chuongchun, i siehlaw Davida sungkuo chu i hmaah suknghetin um tang an tih.
25. "Aw nang ka Pathien, i siehlaw kuomah sungkuo i hung inngirpek ding thu i lo puong ta leiin i siehlaw hin i kuomah hieng thu hi ka hung hril ngam a nih.
26. Aw LALPA, nang chu Pathien i ni leiin hieng thil thahai hi thawpek dingin i siehlaw hi thu i tiem a nih.
27. I mithmu ngeia i siehlaw sunghai chu i hmaa kumkhuoa an um zing theina dingin lawm takin mal i lo sawm ta a; Aw LALPA, nangin mal i sawm tah chu kumkhuoin malsawmin um ngei a tih" tiin.
←  1Chronicles (17/29)  →