←  1Chronicles (16/29)  →
1. Pathien Bawm chu an hung lak a, a siena ding puon in Davidan a zar sunga chun an sie a, pumraw thilhlan le inremna thilhlanhai chu Pathien kuomah an inhlan a.
2. Davidan pumraw thilhlan le inremna thilhlanhai a'n hlan zo chun LALPA hmingin mipuihai chu mal a sawm a.
3. Chu zoah Israelhai chu a nuhmei a pasalin bei tlang khat, sa tlang khat le grep em tawl bawr khat pei a pek seng a.
4. LALPA Bawm hmaah rong bawl a, LALPA Israel Pathien be a, a kuomah lawmthu hril a, inpaktu dingin Levihai laia thenkhat chu a ruot a.
5. An hotu tak chu Asaf a na, a dottu chu Zekaria a na, a danghai chu perkhuong le tingtang tumtu Jeiel, Semiramot, Jehiel, Matithia, Eliab, Benaia, Obed-Edom le Jeiel hai an nih. Asaf chu darbenthek bentu a na,
6. thiempu Benaia le Jahaziel hai chu Pathien Thuthlung Bawm hmaa a'n khat tawka tawtawrawt mut hlaktu dinga ruot an nih.
7. Chuongchun, chu ni chun Asaf le a rawihai chu LALPA kuoma lawmthu hrilna hla sak dingin Davida chun a hmang tan tawl ta a:
8. LALPA kuomah lawmthu hrilin,A hming chu lam hlak unla,A thilthaw tinrenghai chu,Hnam tinreng lai hril dar ro.
9. Zai hla saka inpakin,A thilthaw ropuihai hril ro.
10. A hming thienghlim suong unla,LALPA zongtu lungril chu,Nasa takin hlim raw se.
11. LALPA chu zong rop unla,A hratna chu hni unla,Ama chu pan rop hlak ro.
12. Thil ropui a thawhai chu,Theinghil loin hre zing ro,Thilmak a thawhai po po,A rorelhai po po khom.
13. A bawi Abraham suonhai,A thlang bik Jakob thlahai,
14. Ama chu LALPA Pathien,Leihnuoi hmun kil tinrenga,Roreltu a ni si a.
15. A thuthlunghai hrim hrim chu,Kumkhuoin a hriet zing a,Suon sang tam tak ta dinga,A thupekhai a hriet zing,
16. Abraham kuoma a thlung,Isak kuoma a tiem chu.
17. Chuong chu Jakob thlahai din,Dan hmangin a namnghet a,Israelhai ta dingin,Chatuon thuthlunga siemin,
18. "In chan le rochung dingin,Kanan ram peng ka ti cheu"Tiin a lo tiem nghet a.
19. Mi tlawm te, ieng tham ni lo,Mikhuol el an ni lai khan,
20. Hnam tin laia vakvaiin,Ram tinah an indar a.
21. Sienkhom hnam dang tu khomin,An neksawr a phal naw a,Anni leiin lalhai chu,Halin a zil tawl lem hlak:
22. "Ka hriek nalhai tawk naw ro,Ka zawlneihai poi reng reng,In tawk ding an nawh" tiin.
23. Hnuoia cheng mi tinrenghai,LALPA kuomah hla sakin,A sandamna thu hrilin,Sunni tinin puong dar ro.
24. A ropuizie thu hrilin,Hnam tin lai puong dar unla,A thilmak thawhai khom chuMi tinreng lai hril dar ro.
25. LALPA chu a ropui a,Inpak tlak takzet a na,Pathien dang po po nekin,Ama ti tak ding a nih.
26. Hnam dang pathienhai ruok chu,Milem mei mei vong an na,LALPA chu van siemtu a nih.
27. Ropuina le chawimawinan,Ama chu a'n huol vel a,Thilthawtheina le lawmnan,A Hmun Thienghlim chu a sip.
28. Hnam tin chi tina mihai,Ropuina le hratna hi,LALPA zar a nih hrein,Chawimawina ama pe ro.
29. A hming ropuizie phuin,Chawimawina LALPA pein,A thienghlimna zam velah,In thilpekhai hung chawiin,LALPA chu hung chawibiek ro.
30. Leihnuoia cheng po pohai,A hmaa chun inthin ro!Hnuoi hi inhning lo dingin,Aman a rem nghet a nih.
31. Vanhai, hlim zai vawr unla,Hnuoiin lawm hla rem raw se;"LALPA chun ro a rel ie"Ti raw hai se, hnam tin lai.
32. Tuifinriet le a sunga Umhai khek dur dur raw se.Ram le a sunga umhai,Hlimin lawm seng raw hai se.
33. Ramngaw thinghai chen khomin,Lawm hla sakin khek raw se.Hnuoi chungah ro rel dingin,LALPA a hung mek a nih.
34. LALPA chu a tha em a,A kuomah lawmthu hril ro,Ngil a nei kumkhawtluongin.
35. "Aw LALPA kan Sandamtu,Hnam danghai lak a'nthokin,Nangman mi hung san suokin,Mi hung thuoi khawm tawl nawk rawh,I hming thienghlim inpak a,Kan chawimawi theina ding che'n"Tiin nangni khek suok ro.
36. LALPA, Israel Pathien chu,Chatuona inthok chatuon chenin,Inpakin um pei raw se"tiin. Chuongchun, mi po chun "Amen, LALPA chu inpakin um raw se" an lo ti a.
37. Chuongchun, Davida chun Asaf le a rawihai chu ni tina a tul le mamaw ang peia LALPA Thuthlung Bawm hmaa rongbawl zing dingin a sie a.
38. An rongbawlpui dingin Jeduthan naupa Obed-Edom le a rawihai mi sawmruk le pariet chu a sie bok a. Jeduthan le Hosa chu kotkhar vengtu an nih.
39. Thiempu Zadok le a thiempu chanpuihai chu Gibeon hmun sanga LALPA biekbuka rongbawl dingin Davida chun a sie a.
40. Anni chu LALPAN Israelhai kuoma Dan a pek ang thlapa zing tieng le zan tienga LALPA biekbuka pumraw inthawina maichama pumraw thilhlan inhlan rop dinga ruot an nih.
41. Kumkhawtluonga LALPA hmangaina inpaktu dinga anni ruola an siehai chu Heman le Jeduthan le hming meu lama an thlang suokhai chu an nih.
42. Heman le Jeduthan hai chu tawtawrawt muttu le darbenthek bentu anni bakah inpakna hla thienghlim an sak changa rimawi tumtu an nih. Jeduthan naupahai chu kotkhar vengtu an nih.
43. Chuongchun, mi tin mani in tieng seng an kir nawk a; Davida khom a sunghai malsawm dingin a'n lawi ve ta a.
←  1Chronicles (16/29)  →