←  1Chronicles (15/29)  →

---

1.

Davida khawpuia Davidan ama in ding a bawl zo chun Pathien Bawm umna ding hmun a buotsai a, chu taka chun puon in a kei a.

2.

Chun, David chun, "Pathien Bawm hi Levihai chauh naw chun tu khomin an zawn ding a ni nawh; Pathien Bawm hi kumkhuoa zawntu le a rongbawltu dinga LALPA thlang an ni si a" a ta.

3.

Chuongchun, LALPA Bawm siena ding hmun a buotsaia Bawm chu zawn tung dingin Davida chun Israel mihai po po chu Jerusalemah a ko khawm a.

4.

Aron thlahai le Levi thlaa mi a ko khawmhai chu:

5.

Kohat thlaa inthokin an thuoitu Uriel le a sungkuo mi za le sawmhni;

6.

Merari thlaa inthokin an thuoitu Asaia le a sungkuo mi zahni le sawmhnih;

7.

Gerson thlaa inthokin an thuoitu Joel le a sungkuo mi za le sawmthum;

8.

Elizafan thlaa inthokin an thuoitu Semaia le a sungkuo mi zahni;

9.

Hebron thlaa inthokin an thuoitu Eliel le a sungkuo mi sawmriet;

10.

Uziel thlaa inthokin an thuoitu Aminadab le a sungkuo mi za le sawmpahni an nih.

11.

Chun, Davida chun thiempu Zadok le Abiathar hai le Levi chia mi Uriel, Asaia, Joel, Semaia, Eliel le Aminadab hai chu a ko a.

12.

An kuoma chun, "Nangni hi Levi hnama lukhaituhai in na, Israelhai Pathien, LALPA Bawm chu a hmun ka buotsaia chun in zawn tung theina dingin, nangni le in unauhai leh insukthienghlim ro.

13.

A tir khom khan nangnin in zawn naw leiin eini chungah LALPA lung a sen a ni kha, amain thaw dan ding a ti ang tak chu ei lo indon bok si naw a" a ta.

14.

Chuongchun, Israelhai Pathien, LALPA Bawm chu zawn tung dingin thiempuhai le Levihai chu an inser thienghlim a.

15.

LALPA thu anga Mosien thu a pek dan ang takin, thiempuhai chun Pathien Bawm chu liengkoah a zawnfung chu putin an zawn a.

16.

Chun, hla sak mi, rimawi tum thiem mi, perkhuong hai, tingtang hai, darbenthek hai leh hlim taka hla remtu ding an unauhai laia mi ruot dingin Levi hotuhai chu Davidan a hril a.

17.

Chuongchun, Levihai chun Joel naupa Heman hai, a unauhai laia mi Berekia naupa Asaf hai, an unau Merari naupahai laia mi Kusai naupa Ethan hai chu an ruot a.

18.

Anni le saktu dingin Zekaria, Jaaziel, Semiramot, Jehiel, Uni, Eliab, Benaia, Maaseia, Matithia, Elifelehu, Mikneia, kotkhar vengtu Obed-Edom le Jeiel hai chu an ruot bok a.

19.

Rimawi tumtu Heman, Asaf le Ethan hai chu darbenthek tumtu dingin an ruot;

20.

Zekaria, Aziel, Semiramot, Jehiel, Uni, Eliab, Maaseia le Benaia hai chu perkhuong ki insang chi tumtu dingin an ruot a,

21.

Matithia, Elifelehu, Miknei, Obed-Edom, Jeiel le Azazia hai chu tingtang ri inhnuoi chi tumtu ding le hma thuoitu ding an nih.

22.

Levihai lukhaitu tak Kenania chu hla sak thiem le hla saktuhai inrawitu a nih.

23.

Berekia le Elkana hai chu Bawm siena kotkhar vengtua ruot an nih.

24.

Thiempu Sebania, Josafat, Nethanel, Amasai, Zekaria, Benaia le Eliezar hai chu Pathien Bawm hmaa tawtawrawt muttu ding an nih. Obed-Edom le Jehia hai chu Bawm siena kotkhar vengtu dinga ruot sa an nih.

25.

Chuongchun, Davida le Israel upahai le sipai sangkhat pei kawmandar hai chu Obed-Edom ina um LALPA Bawm chu zuk la tung dingin hlim takin an fe a.

26.

LALPA Thuthlung Bawm zawntu Levihai chu Pathienin a thangpui leiin, bawngchal pasari le beramchal pasariin an inthawi a.

27.

Davida le Bawm zawntu Levihai le hla saktuhai le zaipawl thuoitu Kenania hai chu puon zai inhmiin an inthuom a. Davida chun thiempu zakuo efod chu a hak sa bok a.

28.

Chuongchun, beram ki le tawtawrawt bi nei mut ruoi ruoiin, darbenthek ben a, perkhuong le tingtang tumin, Israel mi po po chu hlim takin an khek a, LALPA Thuthlung Bawm chu an zawn tung ta a.

29.

Chun, hieng hi a na, LALPA Thuthlung Bawmin Davida khawpui a lut lai chun Saula naunu Mikal chun tukvera inthokin a lo thlir a, lawma lal Davida lam le inchawm a hei hmu chun a lungrilin a lo inzapui hle a.

---

←  1Chronicles (15/29)  →