←  1Chronicles (12/29)  →

---

1.

Kisa naupa Saula leia Ziglag khuoa Davida a raltlan lai chun Saula chipuihai laia mi ringum le huoisen iemani zat Davida thangpui dingin an hung a.

2.

Voi tieng le chang tieng inang charin thal an kap thiem a, virvom an deng thiem bok a.

3.

An hotu takhai chu Ahiezer le Joash an na, Gibea inthoka hung, Sema nauhai an nih. An sipaihai chu Azmavet nau pahni Jeziel le Pelet hai; Anathot mi Beraka le Jehu hai;

4.

Gibeon mi Ismaia, Pasaltha Sawmthum pawl laia an mi huoisen le thuoitu hai; Gedera mi Jeremia, Jahaziel, Johanan le Jozabad hai;

5.

Harup mi Eluzai, Jerimot, Bealia, Semaria le Sefatia hai;

6.

Kora pahnama mi Elkana, Isia, Azarel, Joezer le Jasobeam hai;

7.

Gedor mi Jeroham naupa Joela le Zebadia hai an nih.

8.

Gad mihai laia thenkhat chu thlaler kula Davida a um laiin ama tieng an hung pakai a. Anni chu mi huoisen, indo thiem, phaw le fei hmang thiem le sakeibaknei hmel ang put, tlanga sazuk tuoi anga zuonzang an nih.

9.

An hotu tak chu Ezer a na, a pahnina Obadia, a pathumna Eliab,

10.

a palina Mismana, a pangana Jeremia,

11.

a parukna Atai, a pasarina Eliel,

12.

a parietna Johanan, a pakuona Elzabad,

13.

a sawmna Jeremia le a sawmpakhatna Makbanai a nih.

14.

Chuong Gad mihai chu sipai hotu an na, anni laia hrat naw tak khomin mi za a hen a, a hrat tak chun mi sangkhat a hen a nih.

15.

Anni hi a nih thla khatnaa Jordan vadung kuong a liem zur zur lai khom pal kai a, ruom sak le thlanga chenghai hnot dartu chu.

16.

Benjaminhai le Judahai laia thenkhat chu kulah Davida kuomah an fe a.

17.

Davida chun anni chu a lo hmuok a, "A tha tienga mi thangpui dinga ka kuoma hung in ni chun lungril takin ka lawm lut cheu a, amiruokchu, in chungah ieng khom poi ka tawk naw sa khoma ka hmelmahai mi'n mantir tuma hung in ni chun, ei pi le puhai Pathien chun inchikin hrem cheu raw se" a ta.

18.

Chuongchun, 'Pasaltha Sawmthum' hai hotu Amisai chunga chun thlarau a hung tlung a, "I mihai kan nih, aw Davida!I tienga thang kan nih, aw Jesai naupa!Hlawtling la, hlawtling ngei rawh,A thangpuituhai che khom hlawtling sien,In Pathienin thangpui cheu raw se"a ta. Chuongchun, Davida chun anni chu a lawm lut a, sipai pawl hotuah a sie tawl a.

19.

Saula do dinga Filistinhai an inthok laiin Davida khom anni tieng a thang ve a, Manase-hai laia mi thenkhat chu Davida tieng an hung pakai bok a. (Amiruokchu, Davida le a mihai chun Filistinhai chu an thangpui ta nawh. Filistin hotuhai an inrawn hnung chun, "A pu Saula tieng pakai a ta, ei lu chan hlau rawi ei tih" an ti a, an hnar kir tah a nih.)

20.

Ziklag-a Davida a fe laia a kuom tienga Manase mi hung pakaihai chu Adnan, Jozabad, Jediael, Mikael, Jozabad, Elihu le Zilethai hai an na, sipai sangkhat chung peia hotu vong an nih.

21.

Rukrala che pawlin Davida an hung bei laia lo dopuitu mi huoisen an na, a sipai hotu vong an nih.

22.

Pathien sipaihai ang tluka ropui sipai an din chenin ni tinin Davida tienga thang ding mi an hung inpe a, sipai tam tak a nei ta a.

23.

LALPA thu anga Saula neka Davida chu lala siem dinga Hebron khuoa inralthuom sa ngot Davida kuoma hung zat chu:

24.

Juda thla, phaw le fei chawia indo dinga inralthuom mi sangruk le zariet;

25.

Simeon thlaa mi huoisen, indo dinga inralthuom mi sangsari le zakhat;

26.

Levi thlaa mi sangli le zaruk;

27.

Aron thlahai thuoitu Jehoiada le a rawihai mi sangthum le zasari;

28.

tlangval huoisen Zadok le a sungkuo laia mi, sipai hotu sawmhni le pahnih;

29.

Benjamin thla, Saula chipuihai mi sangthum (Benjamin hnama mi tam lem chu Saula tantu an la ni zing);

30.

Efraim thlaa mi, mi hrat le huoisen, an sungkuo laia mi hmingthang ngot singhni le zariet;

31.

Manase hnam zatve laia mi, lala Davida siem dinga an tir suok singkhat le sangriet;

32.

Isakar thlaa mi, thil chinchang hrie le Israelhaiin iem a na an thaw ding ti hre chieng, hotu zahni le an thu hnuoia um an sungkuohai po po leh;

33.

Zebulun thlahai, hriemhrei tinreng hmanga indo thiem, Davida laka ringum taka um, thangpui dinga inralring zing mi singnga;

34.

Naftalia thlaa mi ofisar sangkhat le phaw le fei chawi sipai singthum le sangsari;

35.

Dan thlaa mi, indo dinga inpei sa singhni sangriet le zaruk;

36.

Aser thlaa mi, indo thiem le indo dinga inralring zing singli;

37.

Jordan vadung sak tienga cheng Reuben hnam, Gad hnam le Manase hnam zatvea inthokin inralthuom sa nuoikhat le singhni an nih.

38.

Chuonghai po po chu raldo dinga mani nuom thua inpe, Davida chu Israel ram pumpuia lala siem ngei dinga Hebrona hung an nih. Chun, Israel hnam dang po po khom Davida chu lala siem dingin an khuongruol vong a.

39.

Davida kuoma chun ni thum faa dawnin an um a, chuonghai chu an unauhaiin an buotsaipek vong a nih.

40.

Chu bakah, an unau hmun hlaa inthoka hung Isakar hai, Zebulun hai le Naftalia hai chun sabengtung dam, sanghawngsei dam, sakor dam le bawngchal dam hung thuoiin fak ding tam tak bei dam, theichang per dam, grep ra em tawl dam, uoiin dam, hriek dam an hung phur a, that ding bawngchal le beram an hung kei teu bok a, Israel ram chu lawmnain a sip a.

---

←  1Chronicles (12/29)  →