←  1Chronicles (11/29)  →
1. Israel pahnam po po chu Hebron-ah Davida kuomah an hung a, a kuomah "Ngai ta, i taksa le thisen inzompui kan ni hi.
2. Kha hmaa kan chunga Saula inlal lai khom khan kan ral beinaa Israelhai thuoitu tak chu nangma i ni hlak a. LALPA chun i kuomah, 'Ka mi Israelhai thuoi i ta, an lalah i um ding a nih' a ti che a ni kha" an ta.
3. Israel upahai po po chu Hebron-ah Davida kuomah an hung a, LALPA hmaah anni chu thu a lo thlungpui a, LALPAN Samuel hmanga a lo tiem tah angin Davida chu Israel lal dingin Hebrona chun hriek an nal a.
4. Israelhai po po chu thuoiin Jebuhai khawpui Jerusalem bei dingin Davida chu a suok a.
5. Jebuhai chun, "Hi taka hin hung lut thei teu naw nih" an ti a. Amiruokchu, Davida chun Zion kul chu a lak a, chu kul umna muol chu 'Davida Khawpui' ti a hung ni ta a.
6. Davida chun, "Jebuhai bei dinga hma thuoitu chu kawmandar lu takah ruot ka tih" a ta. Zeruia naupa Joab chu a hang fe hmasa tak a, kawmandar lu takah a sie ta a.
7. Davida chun kulah umhmun a khuor phot a, chu lei chun Davida Khawpui tiin an ko a nih.
8. Suo tieng muola kul thut ding hnuoi an sung zawla inthoka intanin kul vel tuok chu Davidan a siem tha a, Joab-in khawpui sung chu a siem tha a.
9. Iengkim LALPA chun a umpui leiin Davida chu a hung ropui ta deu deu a.
10. Hienghai hi Davida sipai huoisen, Israelhai po po leh thang tlanga, LALPAN a lo tiem tah anga a ram pum huopa a lalna indinpuitu,
11. a kuoma um mi hrat khawkhenghai chu an nih: Hakmon mi Jasobeam chu sipai hotu lien pathumhai laia a lu tak, tum khata inbeinaa fei ringota mi zathum thattu a nih.
12. A dottu chu Aho mi, Dodai naupa Eleazar, hotu lien pathumhai laia pakhat chu a nih.
13. Indo dinga Pas Damim-a Filistinhai an inhawr khaw tumin Davida a zui a. Chu hmun chu barli bil a na, Israelhai chu an tlanse el ta a.
14. Ama le a rawihai chun lo lai thanghmun an khaw a, an veng tlat a, Filistinhai chu an lo that pei a, LALPAN hnena ropui tak a pek a.
15. Mi huoisen sawmthum thlang suok laia pathumhai chu Davida kuomah Adulam pukah an fe a, Filistin mihai chu Refa-hai umna ruomah an lo inkul a.
16. Chuong lai chun Davida chu kulah a um a, Filistin sipai pawl khat chu Bethlehemah an inkul a.
17. Davida chun tui a chak em em a, "Bethlehema tuikul tui, kul kotkhar bula um kha mi chawipek thei um hlauh hai sien chu maw!" a ti vong vong a.
18. Mi huoisen pathumin Filistinhai chu an tawn tlang a, kul kotkhar bula um Bethlehem tuikula tui chu an hang chawi a, Davida kuomah an fepui a. Sienkhom Davida chun dawn loin LALPA ta dingin a bun thlak ta lem a.
19. "Aw LALPA, hi hi chu thaw naw top ka tih; thi huoma fehai thisen chu ka dawn ding am a ni?" a ta. An hringna meu thapa an hung chawi a ni leiin Davida chun a dawn naw a nih. Chuong ang chu mi ropui pathumhai huoisen dan chu a nih.
20. Joab unaupa Abisai chu 'Pasaltha Sawmthum'a an tihai laia hotu tak a nih. Ama chun feiin mi zathum a bei a, a sun hlum vong a, hming that a hlaw hle a.
21. Chuongchun, a let hnia kaisangna dongin 'Pasaltha Sawmthum' an ti laia hotu tak a hung ni ta a, sienkhom 'Pasaltha Pathum' an tihai lai ruok chu a thang sa ve nawh.
22. Kebzel khaw pasaltha Jehoiada naupa Benaia chu mi huoisen tak a na, thil nasa tak tak a thaw a. Moab mi huoisen pahni a that zoin a fe thlak a, vur tlak hun lai hin khurah sakeibaknei a zu that nawk a.
23. Chun, Aigupta mi lien tak el, a dung meter hni le centimeter thuma insang chu a that bok a. Aigupta pa chun fei, a ngul khom puon khawngna themtlang tiet hi a chawi a, Benaia chun hmol chauh chawiin a zu pan a, a fei chu a lakpek a, ama fei ngei chun Aigupta mi lien chu a sun hlum a.
24. Chuong ang thil chu 'Pasaltha Sawmthum' laia mi Jehoiada naupa Benaia chun a thaw leiin a hming a tha hle a.
25. Sienkhom 'Pasaltha Pathumhai' lai ruok chu a thang phak nawh. Davida chun ama vengtuhai laia hotuah a sie a.
26. Mi huoisen hmingthang danghai chu Asahel, Joab unaupa; Dodo naupa, Bethlehema mi Elhanan;
27. Haror mi Samot; Pelon mi Helez;
28. Tekoa mi Ikes naupa Ira; Anathot mi Abiezer;
29. Husait mi Sibekai; Aho mi Ilai;
30. Netofat mi Maharai le Baana naupa Heled;
31. Benjamin hnama mi Gibea inthoka hung, Ribai naupa Ithai; Pirathon mi Benaia;
32. Gaash ruom khokroka mi Hurai; Arbat mi Abiel;
33. Baharum mi Azmavet; Salbon mi Eliaba;
34. Gizon mi Hasem naupahai le Harar mi Sagee naupa Jonathan;
35. Harar mi Sachar naupa Ahiam; Ur naupa Elifal;
36. Mekerat mi Hefer; Pelon mi Ahija;
37. Karmel mi Hezro; Ezbai naupa Naarai;
38. Nathan unaupa Joel; Hagri naupa Mibar;
39. Amon mi Zelek; Berot mi Naharai, Zeruia naupa Joab ralthuom chawitu;
40. Jatir mi Ira le Gareb;
41. Hit mi Uria; Ahlai naupa Zabad;
42. Siza naupa Adina, Reuben hnam laia hotu le rawi mi sawmthum nei;
43. Maaka naupa Hanan; Mithan naupa Jehosafat;
44. Astera mi Uzia; Aroer khaw mi Hotham nauhai Sama le Jeiel;
45. Tiz khaw mi Simri nauhai Jediael le Joha;
46. Mahava mi Eliel; Elnam nauhai Jeribai le Josavia; Moab mi Itma;
47. Zoba mi Eliel, Obed le Jasiel hai an nih.
←  1Chronicles (11/29)  →