← Lamentations 5/5 |
זכר יהוה מה היה לנו הביט וראה את חרפתנו׃ | .1 |
נחלתנו נהפכה לזרים בתינו לנכרים׃ | .2 |
יתומים היינו אין אב אמתינו כאלמנות׃ | .3 |
מימינו בכסף שתינו עצינו במחיר יבאו׃ | .4 |
על צוארנו נרדפנו יגענו לא הונח לנו׃ | .5 |
מצרים נתנו יד אשור לשבע לחם׃ | .6 |
אבתינו חטאו אינם אנחנו עונתיהם סבלנו׃ | .7 |
עבדים משלו בנו פרק אין מידם׃ | .8 |
בנפשנו נביא לחמנו מפני חרב המדבר׃ | .9 |
עורנו כתנור נכמרו מפני זלעפות רעב׃ | .10 |
נשים בציון ענו בתלת בערי יהודה׃ | .11 |
שרים בידם נתלו פני זקנים לא נהדרו׃ | .12 |
בחורים טחון נשאו ונערים בעץ כשלו׃ | .13 |
זקנים משער שבתו בחורים מנגינתם׃ | .14 |
שבת משוש לבנו נהפך לאבל מחלנו׃ | .15 |
נפלה עטרת ראשנו אוי נא לנו כי חטאנו׃ | .16 |
על זה היה דוה לבנו על אלה חשכו עינינו׃ | .17 |
על הר ציון ששמם שועלים הלכו בו׃ | .18 |
אתה יהוה לעולם תשב כסאך לדר ודור׃ | .19 |
למה לנצח תשכחנו תעזבנו לארך ימים׃ | .20 |
השיבנו יהוה אליך ונשוב חדש ימינו כקדם׃ | .21 |
כי אם מאס מאסתנו קצפת עלינו עד מאד׃ | .22 |
← Lamentations 5/5 |