←  Revelation 11/22   →
سونرا منه ال آغاجينا بنزه‌ين بئر آرشين ورئلدي و بئري منه ددي: «دور، تارينين معبدئني، قوربانگاهي و اونون ائچئنده پرستئش ادنلري اؤلچ. .1
لاکئن معبدئن اشئيئنده اولان صحني بوراخ و اونو اؤلچمه، چونکي او، آيري مئلّتلره ورئلئب و اونلار موقدّس شهري قيرخ ائکي آي پايمال اده‌جکلر. .2
و من ائکي شاهئدئمه ائقتئدار وره​جه‌يم، اونلار دا چولا بورونموش مئن ائکي يوز آلتميش گون نبئلئک اده​جکلر.» .3
بونلار ير اوزونون ربّي حوضوروندا دوران او ائکي زيتون آغاجي و او ائکي چيراقدانديرلار. .4
و اگر کئمسه اونلارا زئيان يتئرمک ائسته‌سه، اونلارين آغزيندان اود چيخيب، دوشمنلرئني اودار. بلجه اگر کئمسه اونلارا زئيان يتئرمک ائسته‌سه، بو جور اؤلمه‌لئدئر. .5
بونلارين قودرتي وار کي، گؤيو باغلاسينلار، اله کي، اونلارين نبئلئک ادن گونلرئنده ياغيش ياغماسين. اونلارين سولار اوستونه قودرتي وار کي، اونلاري قانا دؤندورسونلر و نه قدر ده کي، ائسته‌يئرلر، يري هر بلا ائله وورسونلار. .6
اونلار، شهادتلرئني باشا چاتديراندان سونرا، دئبسئز قويودان چيخان جاناوار اونلارلا موحارئبه باشلاياجاق و قالئب گلئب، اونلاري اؤلدوره​جک. .7
اونلارين جسدلري، مجازي دئلده سودوم و مئصئر چاغيريلان او بؤيوک شهرئن خئيابانلاريندا سرئله​جک کي، اورادا اونلارين ربّي ده چارميخا چکئلدي. .8
خالقلاردان، قبئله​لردن، دئللردن و مئلّتلردن اولان آداملار اوچ گون ياريم اونلارين اؤلو بدنلرئنه باخاجاقلار و ائجازه ورمه‌يه​جکلر کي، اؤلو بدنلري قبئره قويولسون. .9
ير اوزونده ساکئن اولانلار، اونلارين بو حالينا سوئنئب شادليق اده​جکلر و بئر​بئرلرئنه هدئيه​لر گؤندره​جکلر، چونکي بو ائکي پيغمبر ير اوزونده ساکئن اولانلارا عذاب چکدئردئلر. .10
لاکئن اوچ گون ياريمدان سونرا، تاريدان گلن حيات نفسي اونلارين ائچئنه گئرئب، آياقلاري اوستونده دوردولار و اونلاري گؤرنلري بؤيوک بئر دهشت بورودو. .11
و گؤيدن اوجا بئر سس اشئتدئلر کي، اونلارا ديئردي: «بورايا چيخين!» او واخت اونلار، گؤيه، بولودلار ائچئنه قالخديلار و دوشمنلري اونلاري گؤردولر. .12
او ساعات بؤيوک بئر زلزله باش وردي و شهرئن اوندا بئري ييخيلدي؛ او زلزله​ده يدّي مئن نفر اؤلدولر، قالانلاري دا دهشته دوشوب، گؤيون تاريسينا عئزّت وردئلر. .13
ائکئنجي واي کچدي. باخ، اوچونجو واي تزلئکله گلئر. .14
او زامان يدّئنجي ملک چالدي و گؤيده اوجا سسلر اشئدئلدي کي، ديئردئلر: «دونيانين پادشاهليغي، ربّئمئزئن و اونون مسئحئنئن اولوب، و او، ابددن ابده​جک سلطنت اده​جک.» .15
تارينين حوضوروندا تختلرئنده اوتوران ائيئرمي دؤرد آغساقّال، اوزلري اوستونده يره دوشدولر و تارييا پرستئش ادئب، .16
ديئردئلر: «اي ربّئمئز تاري، هر شيه قادئر اولان، وار اولان و وار اولموش، سنه شوکورلر ادئرئک. چونکي بؤيوک قودرتئني آليب، سلطنت اتمه‌يه باشلاييبسان. .17
مئلّتلر قضبلنمئشدئلر، و سنئن قضبئن گلدي. او زامان يتئشدي کي، اؤلولر موحاکئمه اولسونلار، اؤزلرئني سنه قول اتمئش پيغمبرلره، موقدّسلره، سنئن آديندان قورخانلارا، کئچئکلره و بؤيوکلره پاداش ورئلسئن و ير محو اولونسون.» .18
تارينين گؤيده اولان معبدي آچيلدي و عهدئنئن سانديغي اونون معبدئنده ظاهئر اولدو؛ شئمشکلر، گورولتولر سسي، بئر زلزله، و بؤيوک بئر دولو طوفاني باش وردي. .19
←  Revelation 11/22   →