Revelation 1/22   →

---

عئسا مسئحئن وحيي. تاري بونو اونا وردي کي، تزلئکله باش ورمه‌سي واجئب اولان شيلري اؤزلرئني اونا قول اتمئشلره گؤرسدسئن. او دا اؤز مله‌يي واسئطه​سئله بونو اؤز قولو يوحنّايا بيان اتدي.

.1

او دا تارينين کلامينا و عئسا مسئحئن شهادتئنه، يعني گؤردوکلرئنئن هاميسينا شهادت وردي.

.2

خوش او آداملارين حالينا کي، بو نبئلئيئن کلاميني اوخويورلار، اشئدئرلر، و اوندا يازيلان شيلره عمل ادئرلر، چونکي واخت ياخيندير.

.3

يوحنّادان آسئيا ايالتئنده اولان يدّي کئلئسايا: وار اولان، وار اولموش و گله​جک اولاندان و اونون تختئنئن حوضوروندا اولان يدّي روحدان سئزه فيض و باريش اولسون.

.4

هم ده امئن شاهئد، اؤلولردن ائلک دوغولان و ير اوزونون پادشاهلارينين ريئسي عئسا مسئحدن کي، بئزي سِوئر و اؤز قاني واسئطه​سئله بئزي گوناهدان آزاد اتدي

.5

و بئزي بئر پادشاهليق و اونون آتا تاريسي اوئنه کاهئنلر تعيئن ادئب. اونا ازلدن ابده​جک شؤوکت و قودرت اولسون. آمئن.

.6

باخين، او، بولودلارلا گلئر، و هر گؤز اونو گؤره​جک، حتّا اونون بدنئني دِشَنلر بله؛ دونيانين بوتون قبئله​لري اونون اوچون ياس توتاجاقلار. بلي، بله اولاجاق. آمئن.

.7

رب تاري ديئر: "منم «الف» و «ي»؛ وار اولان، وار اولموش و گله​جک اولان، او قادئري-موطلق."

.8

من، يوحنّا، قارداشينيز و عئسادا اولان سيخينتييا، ملکوتا، و صبره سئزئنله برابر شرئک اولان، تارينين کلامي و عئسانين شهادتي اوچون پطموس ديئلن جزئره‌ده ائدئم.

.9

ربّئن گونونده روحدا ائدئم، و آرخامدا شيپور سسئنه اوخشار بؤيوک بئر سس اشئتدئم کي،

.10

ديئر: "گؤردويونو بئر کئتابا ياز و يدّي کئلئسايا گؤندَر: افسوسا، اسمئرنايا، پرقاموما، تئياتئرايا، ساردئسه، فئلادلفئيايا و لاودئکئيه‌يه."

.11

او زامان دؤندوم کي، منئمله دانيشان سسي گؤروم. دؤندوکده يدّي قيزيل چيراقدان گؤردوم

.12

و چيراقدانلارين آراسيندا ائنسان اوغلونا بنزه‌ين بئرئسئني گؤردوم کي، آياقلاريناجاق يتئشن اوزون بئر شئنل گيمئش، سئنه‌سئنه ده قيزيل قورشاق تاخميشدي.

.13

اونون باشي و ساچلاري يون و قار کئمي آغ ائدي، گؤزلري ده بئر اود آلووسو کئمي ائدي.

.14

آياقلاري کوره​ده يانان پارلاق بورونج کئمي ائدي، سسي ده بئر چوخ سولارين گورولتوسونه بنزه‌يئردي.

.15

صاغ الئنده يدّي اولدوز ساخلاميشدي، آغزيندان دا ائکي آغيزلي بئر ائتي قيلينج چيخيردي. اوزو بوتون قودرتئنده پارلايان گون کئمي ائدي.

.16

اونو گؤردوکده اؤلو کئمي آياقلارينا دوشدوم. و او، صاغ اَلئني منئم اوستومه قويوب ددي: "قورخما! منم، بئرئنجي و آخيرينجي اولان،

.17

همئشه دئري اولان. اؤلموشدوم، و باخ، همئشه​لئک دئري‌يَم و اؤلوم و اؤلولر دئيارينين آچارلاري منده​دئر.

.18

بونا گؤره گؤردوکلرئني، ائندي اولان شيلري و بونلاردان سونرا باش وره​جک شيلري ياز.

.19

صاغ َالئمده گؤردويون يدّي اولدوز و يدّي قيزيل چيراقدانين سئرّي باره​ده: يدّي اولدوز، يدّي کئلئسالارين ملکلري‌دئر. يدّي چيراقدان دا يدّي کئلئسالاردير.

.20

---

Revelation 1/22   →