| ← Psalms 91/150 → |
| اوجالاردا اولانين پناهي آلتيندا اوتوران، هر شيه قادئر اولانين کؤلگه‌سئنده ياشايار. | .1 |
| ربّئم حاقّيندا دانيشيرام: "او منئم سيغيناق يرئم‌دئر، او منئم قالام‌دئر، منئم تاريم، او کي، اونا توکّول ادئرم." | .2 |
| يقئن کي، او سني اووچونون توروندان قورتارار، اؤلوملو طاعوندان! | .3 |
| سني پرلرئنئن آلتيندا اؤرتر؛ اونون قانادلاري آلتينا سيغينارسان، اونون اعتئبارلي اولدوغو سنئن قالخانين‌دير، سنئن سئپرئن‌دئر. | .4 |
| نه گجه‌نئن قورخوسوندان قورخاجاقسان، نه ده گوندوزده اوچان اوخدان، | .5 |
| نه قارانليقدا گَزَن طاعوندان، نه ده گون اورتادا هر شيي وئران ادن قيرغيندان. | .6 |
| يانيندا مئن نفر، صاغيندا اون‌مئن نفر قيريلسا بله، سنه خطر دَيمز. | .7 |
| آنجاق گؤزلرئنله باخارسان، پئس آداملارين جزاسيني گؤررسن. | .8 |
| چونکي ديئبسن: "رب منئم پناهيم‌دئر." چونکي اوجالاردا اولاني اؤزون اوچون مسکن ادئبسن، | .9 |
| موصئبت سنه توخونا بئلمز، فلاکت سنئن چاديرينا ياخينلاشماز. | .10 |
| چونکي سنئن اوچون ملکلرئنه فرمان وره‌جک کي، بوتون يوللاريندا سني قوروسونلار. | .11 |
| اونلار سني اللري اوسته ساخلايارلار کي، آياقلارين بئر داشا ديمه‌سئن. | .12 |
| آصلانا، ساغير ائلان اوستونه آياق باسارسان، شئر بالاسيني، اژداهاني آياغين آلتيندا اَزَرسن. | .13 |
| "چونکي مني سوئر اونو قورتاراجاغام، چونکي منئم آديمي چاغيرير، اونا باشي‌اوجاليق وره‌جيم. | .14 |
| او مني چاغيراندا، من اونا جاواب وره‌جيم، زحمتده اونونلا اولاجاغام، اونو قورتاريب احتئراميني آرتيراجاغام. | .15 |
| اونو اوزون بئر عؤمورله دويوراجاغام، نئجاتيمي اونا گؤرسده‌جيم." | .16 |
| ← Psalms 91/150 → |