←  Psalms 89/150   →
ربّئن محبّتئني همئشه اوخوياجاغام؛ آغزيملا سنئن وفادارليغيني بوتون نسئل‌لره بئلدئره‌جيم. .1
اعلان ادئرم کي، سنئن محبّتئن ابده کئمي قالير. گؤيلرده وفادارليغيني مؤحکم ادئرسن. .2
ددئن: "سچدئيئم آداملا عهد باغلاميشام، قولوم داوودا آند ائچمئشم: .3
سنئن نسلئني ابده کئمي دوردوراجاغام، تختئني بوتون نسئل‌لر اوچون قوراجاغام." سِلا .4
يارب، گؤيلر سنئن مؤجوزه‌لرئني حمد ادئر، وفادارليغيني موقدّسلر جاماعاتيندا ثنا ادئر. .5
گؤيده ربّه تاي اولان کئم وار؟! ائلاهي مؤوجودلار آراسيندا ربّه بنزر کئمدئر؟ .6
موقدّسلر مجلئسئنده چوخ هيبتلي بئر تاري‌دير، اطرافيندا اولانلارين هاميسيندان قورخولودور. .7
يارب، قوشونلارين تاريسي، سنئن کئمي قودرتلي اولان کئم وار، يارب؟! وفادارليغين سني اَحاطه ادئر. .8
قاباران دهنزه، سن حؤکمرانليق ادئرسن؛ شپه‌لر قالخيب داشاندا، سن اونلاري ياتيرديرسان. .9
رَحَبي اَزئب بئر جسده دؤنده‌ردئن؛ قووّتلي قولونلا دوشمنلرئني داغيتدين. .10
گؤيلر سنئندئر، ير ده سنئندئر؛ دونيا و اوندا اولانلارين هاميسي- سن اونلاري بئنا ادئبسن. .11
شئمال و جنوب- اونلاري سن ياراديبسان؛ تابور و خِرمون سنئن آديني ترنّوم ادئر. .12
سنئن گوجلو قولون وار؛ اَلئن قودرتلي‌دئر، صاغ اَلئن اوجادير. .13
سنئن تختئنئن اساسي صالحلئک و عدالتدئر؛ محبّت و وفا سنئن قاباغيندا يِرئيئر. .14
بختور او خالق کي، بايرامين شادليق سسئني بئلئر. يارب، اونلار سنئن اوزونون ائشيغيندا گزئرلر؛ .15
بوتون گون سنئن آدينلا سوئنئرلر، سنئن صالحلئيئنده عئزّتله‌نئرلر. .16
چونکي اونلارين شؤوکتلي قووّتي سنسن؛ سنئن لوطفونله گوجوموز آرتيلير. .17
چونکي قالخانيميز ربّئندئر، پادشاهيميز، ائسرايئلئن موقدّسئنئنن‌دئر. .18
کچمئشده موتّقئلرئنه رؤيا ائچئنده دانيشيب ددئن: "بئر ائگئده کؤمک اتمئشم، خالق آراسيندان سچئلمئش اولاني عئزّتلندئرمئشم. .19
قولوم داوودو تاپيب، اونو موقدّس ياغيملا مسح اتمئشم. .20
اَلئم دائم اونونلا قالاجاق، قولوم دا اونو قووّتلندئره‌جک. .21
دوشمن اونا قالئب گلمه‌يه‌جک، پئس آداملار اونو ذلئل اتمه‌يه‌جک. .22
قاباغيندا دوشمنلرئني قيراجاغام، اوندان نئفرت ادنلري ووراجاغام .23
وفادارليغيم و محبّتئم اونونلا قالاجاق، منئم آديمدا اونون گوجو آرتيلاجاق. .24
الئني دهنز اوستونه، صاغ الئني چايلار اوستونه قوياجاغام. .25
مني چاغيريب دئيه‌جک: سن منئم آتامسان، منئم تاريمسان، نئجاتيمين قاياسي‌سان. .26
من ده اونو ائلک اوغلوم اده‌جيم؛ ير اوزونون پادشاهلارينين لاپ اوجاسي! .27
محبّتئمي اونون اوچون ابده کئمي ساخلاياجاغام، عهدئم اونونلا ثابئت قالاجاقدير. .28
اونون نسلئني ابدي اده‌جيم، گؤيلر دوردوقجا، تختئني ساخلاياجاغام. .29
اگر اوغوللاري تعلئمئمي ترک ادئب، حؤکم اتدئيئم کئمي رفتار اتمسه‌لر، .30
اگر قانونلاريمي پوزوب، امرلرئمي ساخلاماسالار، .31
او زامان اونلاري عوصيانلاري اوچون دَيَنکله، فسادلاري اوچون ده بلالارلا تنبه اده‌جيم. .32
آمّا محبّتئمي اوندان کسمه‌يه‌جيم، وفادارليغيمي يالانا دؤندرمه‌يه‌جيم. .33
عهدئمي پوزماياجاغام، آغزيمدان چيخان سؤزو ديئشدئرمه‌يه‌جيم. .34
بئر دفه موقدّسلئيئم آدينا آند ائچمئشم: داوودا يالان دمه‌يه‌جيم. .35
اونون نسلي ابده کئمي، تختي حوضورومدا گونش کئمي دوراجاقدير. .36
آي کئمي ابده‌جک دوراجاق؛ گؤيلرده وفالي بئر شاهئد." .37
آمّا ائندي سن ردّ ادئب، اؤزوندن آتيبسان. مسح اتدئيئن پادشاها قضبله‌نئبسن. .38
قولونلا باغلاديغين عهدئني باطئل ادئب، اونون تاجيني تورپاقدا کئرله‌دئبسن. .39
بوتون دووارلاريني ييخيب، قالالاريني وئران ادئبسن. .40
يولدان کچن هر کس اونو سؤيور؛ قونشولارينا خجالت سببي اولوب. .41
دوشمنلرئنئن صاغ الئني اوجالديبسان؛ خصملرئنئن هاميسيني سِوئندئرئبسن. .42
قيلينجينين آغزيني کوت ادئبسن، اونا موحارئبه‌ده آرخا اولماييبسان. .43
اونون شؤوکتئني باشا گتئرئبسن، اونون تختئني يره چيرپيبسان. .44
جاوانليغينين گونلرئني قيسالاديبسان، اوستونو خجالتله اؤرتوبسن. سِلا .45
نه واختا کئمي، يارب؟ مگر اؤزونو ابده کئمي گئزلده‌جکسن؟ نه واختا قدر سنئن قضبئن اود کئمي آلوولاناجاق؟ .46
عؤمرومون نه قدر قيسا اولدوغونو بئر خاطيرلا- بوتون ائنسان اوغوللاريني نه عبث بئر شي اوچون ياراديبسان! .47
ياشايانلار آراسيندا کئم وار کي، اؤلوم اوزو گؤرمه‌سئن؟! اؤلولر دئيارينين قودرتئندن کئم جانيني قورتارا بئلر؟! سِلا .48
اي پروردئگار، سنئن او قدئمکي محبّتئن هارادادير، وفادارليغيندا داوودا آند ائچدئيئن محبّت؟ .49
قولونون خجالتئني خاطيرلا، اي پروردئگار؛ خاطيرلا کي، نجه چوخلو خالقلارين تحقئرئني باغريمدا داشي‌ييرام! .50
سنئن دوشمنلرئن اونونلا تحقئر ادئرلر، يارب؛ سنئن مسح اتدئيئنئن قدملرئني تحقئر اتدئلر. .51
رب ابده کئمي موبارک اولسون. آمئن، آمئن. .52
←  Psalms 89/150   →