| ← Psalms 63/150 → |
| اي تاري، سن منئم تاريمسان، اورکدن سني آختاريرام، جانيم سنئن اوچون سوسوزدور، ووجودوم سنئن اوچون ائنتئظار چکئر، قورو و جان‌سيخيجي بئر دئياردا، او دئياردا کي، سودان بئر اثر يوخدور. | .1 |
| سنئن موقدّس يرئنده سنه باخميشديم کي، قودرت و عئزّتئني گؤروم. | .2 |
| دوداقلاريم سنه حمد اده‌جک، چونکي سنئن محبّتئن حياتدان ياخشي‌دير. | .3 |
| نه‌قدر جان بدنئمده وار، سنه حمد اوخوياجاغام، اَللرئمي قالديريب سنئن آديني چاغيراجاغام، | .4 |
| جانيم دويوب، گؤزل بئر يمکله دويان کئمي؛ شن دوداقلارلا آغزيم حمد اوخويور؛ | .5 |
| ياتديغيم يرده سني خاطيرلاياندا، گجه‌نئن نؤوبه‌‌لرئنده سني دوشوننده! | .6 |
| قانادلارينين کؤلگه‌سي آلتيندا شادليقدان اوخوياجاغام، چونکي منئم کؤمه‌يئم سن‌سن. | .7 |
| جانيم سنه باغلي‌دير، سنئن صاغ اَلئن مني ساخلايير. | .8 |
| لاکئن جانيمي هلاک اتمه‌يه چاليشانلار محو اولاجاقلار، يرئن لاپ دئب يرلرئنه باتاجاقلار، | .9 |
| قيلينج آغزينا ورئله‌جکلر، چاقّاللارين يئيه‌جيي اولاجاقلار. | .10 |
| آمّا پادشاه تاريدا سوئنه‌جک، تارينين آدينا آند ائچن هر کس شادلاناجاق؛ حال بو کي، يالانچيلارين آغزي باغلاناجاقدير. | .11 |
| ← Psalms 63/150 → |