| ← Psalms 62/150 → |
| جانيم سس‌سئز آنجاق تاريني گؤزله‌يئر، چونکي خئلاصيم اوندان گلئر. | .1 |
| منئم قايام، منئم خئلاصيم آنجاق اودور، او منئم قالام‌دئر؛ يرئمدن تَرپنمه‌يه‌جيم. | .2 |
| نه واختا کئمي بئر آدامي اؤلدورمک اوچون، اونا هوجوم گتئره‌جکسئنئز؛ اونا کي، اَيئلمئش بئر دووار کئمي‌دئر، يرئندن جايميش بئر چپر کئمي‌دئر؟ | .3 |
| آنجاق بونو دوشونورلر کي، نجه اونو اؤز شرفئندن آشاغي سالسينلار. يالانلاردان کف ادئرلر؛ آغيزلاري ائله برکت ورئرلر، لاکئن اورکلرئنده لعنت ادئرلر. سِلا | .4 |
| اي جانيم، سس‌سئز آنجاق تاريني گؤزله، چونکي اومئدئم اوندان گلئر. | .5 |
| منئم قايام، منئم خئلاصيم آنجاق اودور، او منئم قالام‌دئر، يرئمدن ترپنمه‌يه‌جيم. | .6 |
| خئلاصيم و عئزّتئم تاريدادير؛ قووّتلي قايام و پناهيم تاريدادير. | .7 |
| سئز، اي خالق، هر زامان اونا توکّول ادئن؛ اوره‌يئنئزي اونون حوضوروندا تؤکون، چونکي تاري بئزه سيغيناق يِردئر. سِلا. | .8 |
| دوغرودان دا کي، عوام خالق بئر بوخاردير؛ بَي‌زاده‌لر بئر يالان. اگر اونلاري تره‌زئيه قوياسان، اونلارين هاميسي بئرلئکده بوخاردان دا يونگولدور. | .9 |
| قدّارليغا توکّول اتمه، تالان مالينا دا بوشونا اومئد باغلاما؛ مال-دؤولت آرتسا دا، اونا اورک باغلاما. | .10 |
| تاري بئر دفه دانيشيب، من بونو ائکي دفه اشئتمئشم کي: قودرت تارينين‌دير. | .11 |
| محبّت ده سنئن‌دئر، اي پروردئگار؛ چونکي سن هرکسه ائشئنه گؤره عوض ورئرسن. | .12 |
| ← Psalms 62/150 → |