| ← Psalms 44/150 → |
| اي تاري، قولاقلاريميزلا اشئتمئشئک، آتالاريميز اونلارين گونلرئنده، او قدئم گونلرده، اونلارا اتدئيئن ائشلري بئزه نقل ادئبلر. | .1 |
| نجه سن، الئنله مئلّتلري قوودون، آمّا آتالاريميزي يرلشدئردئن؛ نجه طايفالاري ذلئل اتدئن، لاکئن آتالاريميزا ووسعت وردئن. | .2 |
| چونکي اونلار اؤلکه‌يه قيلينجلاري ائله مالئک اولماديلار، اونلارا ظفر ورن، اونلارين اؤز قوللاري ديئلدي؛ سنئن صاغ الئن ائدي، سنئن قولون، سنئن جمالينين نورو، چونکي اونلاردان راضي ائدئن. | .3 |
| سن منئم پادشاهيمسان، اي تاري، يعقوبون نسلئنئن نئجاتينا امر ات. | .4 |
| سنئن کؤمه‌يئنله دوشمنلرئمئزي يره چيرپاجاغيق. سنئن آدينلا ضئدّئمئزه قالخانلاري پايمال اده‌جيئک. | .5 |
| چونکي من اوخ کامانيما توکّول اتمه‌رم، قيلينجيم دا منه نئجات ورمز. | .6 |
| آنجاق سن بئزه دوشمنلرئمئزدن نئجات ورئبسن، بئزدن نئفرت ادنلري سن اوتانديريبسان. | .7 |
| بوتون گون تارييا فخر اده‌جيئک، سنئن آدينا ابده کئمي حمد اوخوياجاغيق. سِلا | .8 |
| آمّا ائندي سن بئزي بوراخيبسان، بئزي روسواي ادئبسن، بئزئم قوشونوموزلا چيخميرسان. | .9 |
| دوشمن قاباغيندا بئزي گري دؤنده‌رئرسن، بئزدن نئفرت ادنلر بئزي غارت ادئبلر. | .10 |
| قويوبسان کي، بئزي قويونلار کئمي يسئنلر، مئلّتلر آراسيندا بئزي داغيديبسان. | .11 |
| خالقيني هچ زادا ساتيرسان، اونلارين قئيمتي سنه فايدالي اولمور. | .12 |
| قونشولاريميز يانيندا بئزي اوزو-قارا ادئرسن، اطرافيميزدا اولانلارا لاغ هدفي اولموشوق. | .13 |
| مئلّتلر آراسيندا مثل اولموشوق، بئزي طايفالارين گولوش هدفي ادئرسن. | .14 |
| روسوايچيليغيم بوتون گون قاباغيمدادير، اوزومون خجالتي مني اؤزونده بورويوب؛ | .15 |
| تحقئر و لعنت اده‌نئن سسلري اوزوندن، دوشمن و ائنتئقام آلان قاباغيندان. | .16 |
| بوتون بولار باشيميزا گلئب، لاکئن سني ياددان چيخارتماميشيق، سنئن عهدئنه خيانت اتمه‌مئشئک. | .17 |
| اوره‌يئمئز گري دؤنمه‌يئب، قدملرئمئز سنئن يولوندان آزماييب. | .18 |
| حال بو کي، سن بئزي چاقّاللار يرئنده ازئبسن، اؤلوم کؤلگه‌سي ائله بئزي بورويوبسن. | .19 |
| اگر تاريميزين آديني اونوتموش اولسايديق، اگر اللرئمئزي ياد بئر آللاها طرف اوزاتميش اولسايديق، | .20 |
| تاري بونو مگر کشف اتمزدي؟ چونکي او اوره‌يئن بوتون سئرّلرئني بئلَندئر. | .21 |
| بلي، سنئن خاطئرئنه بوتون گون اؤلدورولوروک، قصّابليق قويونلار کئمي ساييليريق. | .22 |
| اي پروردئگار، اويان! نه اوچون ياتيبسان؟ قالخ! بئزي ابده کئمي بوراخما. | .23 |
| نئيه اوزونو بئزدن گئزله‌دئرسن؟ بئزئم جفاميزي، بئزئم ذلئل اولدوغوموزو اونودورسان؟! | .24 |
| چونکي تورپاغا قدر اَيئلمئشئک، بدنئمئز يره ياپيشيب. | .25 |
| بئزئم ائمداديميزا قالخ، محبّتئنئن خاطئرئنه بئزي خئلاص ات. | .26 |
| ← Psalms 44/150 → |