| ← Proverbs 25/31 → |
| بولار دا سوليمانين مثللري‌دئر کي، يهودا پادشاهي خئزقيانين آداملاري بئر يره ييغيب يازديلار: | .1 |
| بئر ائشي گئزلتمک تارينين عئزّتئدئر، لاکئن ائشي آراشديرماق پادشاهلارين عئزّتئدئر. | .2 |
| نجه گؤيو اوجاليغيندا، يري ده درئنلئيئنده، اله ده پادشاهلارين اوره‌يئني آراشديرماق اولماز. | .3 |
| گوموشدن چوروفو آيير، زرگره بئر قاب چيخار. | .4 |
| شرور آدامي پادشاهين يانيندان آيير، اونون تختي صالحلئکده برقرار اولار. | .5 |
| پادشاهين حوضوروندا اؤزونو اوجالتما، بؤيوک آداملارين يرئنده ده دورما: | .6 |
| چونکي "بويور يوخاري" دعوتئني آلماق، بئر اصئلزاده حوضوروندا آشاغي اندئرئلمَکدن داها ياخشي‌دير. | .7 |
| عجله ائله داعوايا آتيلما، سورا قونشون سني اوتانديرسا، نه ادرسن؟ | .8 |
| داعواني قونشونلا اؤزون حل ات اؤزگه بئر آدامين سئرّئني آچما. | .9 |
| مبادا هر اِشئدن سنه خور باخسين، و اعتئبارين آرادان گتسئن. | .10 |
| يرئنده ديئلمئش سؤز، گوموش اويمالار ائچئنده قيزيل آلمالار کئمي‌دئر. | .11 |
| سؤزه باخان قولاغا حئکمتلي دانلاق، قيزيل حالقاسي، خالئص قيزيل کوپّه‌سي کئمي‌دئر. | .12 |
| بئچئن واختيندا قار کئمي سرئنلئک نجه‌دئر، اعتئبارلي الچي ده اونو گؤنده‌رنلر اوچون بله‌دئر، چونکي او، آغالارينين جانيني تزه‌له‌يئر. | .13 |
| ورمه‌دئيي بخشئشلرئندن فخر ادن آدام، ياغيشسيز بولودا و کولَيه بنزه‌يئر. | .14 |
| اوزون صبئرله بئر حؤکمداري دا قانديرماق اولار، شئرئن دئل سوموکلري بله، سينديرار. | .15 |
| بال تاپسان، اوندان احتئياجين قدر يه، اگر آج‌گؤزلوکله يئيه‌سن، قوسارسان. | .16 |
| قوشونون اوئنه آز-آز گت، يوخسا بِزَر، سندن نئفرت ادر. | .17 |
| قونشوسونون ضئدّئنه يالانچي شاهئدلئک ادن، توپّوز، قيلينج و ائتي اوخا بَنزه‌يئر. | .18 |
| دار گونده خائن آداما اعتئماد اتمک، چوروموش دئشه، بورولموش بئر آياغا بنزه‌يئر. | .19 |
| اوره‌يي قم دولو آداما نغمه‌لر اوخويان، سويوق گونده پالتاريني چيخاردان کئمي‌دئر، شورا اوستونه تؤکولموش سئرکه کئمي‌دئر. | .20 |
| اگر دوشمنئن آجدير، اونا چؤرک ور يسئن؛ اگر سوسوزدور، سو ور ائچسئن؛ | .21 |
| بله اتمکله سانکي باشينا کؤز کؤمور تؤکورسن، بونون عوضئني ربدن آلارسان. | .22 |
| شئمال يلي ياغيش دوغورار، قيبت ادن دئل ده قضبلي اوز! | .23 |
| دامين کونجونده اوتورماق، داعواچي بئر آروادلا بؤيوک بئر اِوده ساکئن اولماقدان داها ياخشي‌دير. | .24 |
| سوسوز جانا سويوق سو نجه‌دئر، اوزاق مملکتدن گلن خوش خبر ده بله‌دئر. | .25 |
| پئس آدامين قاباغيندا صالح آدامين باش ايمه‌سي، بولانديريلميش چشمه و نجئسلنمئش قويو کئمي‌دئر. | .26 |
| چوخ بال يمک ياخشي ديئل؛ اله ده اؤز عئزّتئني آختارماق، آداما عئزّت ديئل. | .27 |
| نفسئنه حاکئم اولمايان بئر آدام، داغيلميش، حاصارسيز بئر شهر کئمي‌دئر. | .28 |
| ← Proverbs 25/31 → |