| ← Numbers 34/36 → |
| سونرا رب موسا ائله دانيشيب ددي: | .1 |
| "ائسرايئل اؤولادلارينا امر ات و اونلارا دِه: «کَنَعان اؤلکه‌سئنه گئره‌جَيئنئز، ائرث اولاراق سئزه دوشه‌جک تورپاق، يعني کَنَعان تورپاغي سرحدلرئنه گؤره بودور: | .2 |
| جنوب طرفئنئز سئن صحراسيندان اِدوم سرحدي بويونجا اوزاناجاق. جنوب سرحدئنئز شرقه طرف دوز دهنزئنئن اوجوندان باشلاياجاق. | .3 |
| سرحدئنئز جنوبدان عَقره‌بّئم گردنه‌سئنه طرف دؤنوب، سئن صحراسينا کچه‌جک و اورادان قِدِش‌بَرنِعه‌نئن جنوبونا قدر اوزاناجاق. اورادان خَصَره‌دّارا اوزانيب، عَصمونا کچه‌جک. | .4 |
| سرحد عَصموندان مئصئر دره‌سئنه قدر گده‌جک و اونون اوجو دهنزئن يانيندا اولاجاق. | .5 |
| قرب سرحدئنئز بؤيوک دهنزي و اونون کناري اولاجاق، قرب سرحدئنئز بله اولاجاق. | .6 |
| شئمال سرحدئنئز بو اولاجاق: بؤيوک دهنزدن هور داغينا قدر سرحد نئشاني قوياجاقسينيز. | .7 |
| هور داغيندان دا لِبو‌خَمات گردنه‌سئنه قدر نئشان قوياجاقسينيز. سرحدئن اوجو صِدادا اولاجاق. | .8 |
| سرحد زئفرونا قدر اوزاناجاق و اونون آخيري خَصَر‌عِيناندا اولاجاق. بو، شئمال سرحدئنئز اولاجاق. | .9 |
| شرق سرحدئنئزه خَصَر عِيناندان شِفاما قدر نئشان قوياجاقسينيز. | .10 |
| سرحد شِفامدان عَيئنئن شرق طرفئنده اولان رئبلايا اِنه‌جک؛ و اورادان کئنّرِت دهنزئنئن شرق کنارينداکي ياماجا چاتاجاق. | .11 |
| سونرا سرحد اوردون چايي بويونجا اِنه‌جک و اونون اوجو دوز دهنزئنئن يانيندا اولاجاق. هر طرفدن اؤلکه‌نئزئن سرحدلري بونلار اولاجاق.»" | .12 |
| بلجه موسا ائسرايئل اؤولادلارينا امر ادئب ددي: "بو او تورپاقدير کي، سئز اونو پوشکله بؤلمه‌لي‌سئنئز. ربّئن امري ائله اونو دوقّوز ياريم قبئله آراسيندا بؤلمه‌لي‌سئنئز. | .13 |
| چونکي رِعوبئن اؤولادلارينين قبئله‌سي، جاد اؤولادلارينين قبئله‌سي، و مِنَسّه قبئله‌سئنئن او بئري ياريسي اؤز ائرثئني آليبلار. | .14 |
| بو ائکي ياريم قبئله اَرئحانين موقابئلئنده، اوردون چايينين شرق طرفئنده ائرثلرئني آليبلار." | .15 |
| سونرا رب موسا ائله دانيشيب ددي: | .16 |
| "بودور او آداملارين آدلاري کي، تورپاقلاري سئزه ائرث بؤله‌جکلر: کاهئن اِلعازار و نون اوغلو يوشَع. | .17 |
| تورپاقلاري بؤلمَک اوچون هر قبئله‌دن بئر نفر رهبر گؤتورون. | .18 |
| بو آداملار بونلاردير: يهودا قبئله‌سئندن يِفونّه اوغلو کالئب؛ | .19 |
| شَمعون اؤولادلارينين قبئله‌سئندن عَمّئهود اوغلو شَموئل؛ | .20 |
| بِنيامئن قبئله‌سئندن کئسلون اوغلو اِلئداد؛ | .21 |
| دان اؤولادلارينين قبئله‌سئندن رهبر اولان يوگلي اوغلو بوقي؛ | .22 |
| يوسئف اوغوللاريندان: مِنَسّه اؤولادلارينين قبئله‌سئندن رهبر اولان اِفود اوغلو خَنّي‌اِل؛ | .23 |
| اِفرايئم اؤولادلارينين قبئله‌سئندن رهبر اولان شئفطان اوغلو قِمواِل؛ | .24 |
| زِبولون اؤولادلارينين قبئله‌سئندن رهبر اولان پَرناک اوغلو اِلئصافان؛ | .25 |
| يئسّاکار اؤولادلارينين قبئله‌سئندن رهبر اولان عَزّان اوغلو پَلطي‌اِل؛ | .26 |
| آشِر اؤولادلارينين قبئله‌سئندن رهبر اولان شِلومي اوغلو اَخئهود؛ | .27 |
| نَفتالي اؤولادلارينين قبئله‌سئندن رهبر اولان عَمّئهود اوغلو پِده‌‌هِل.» | .28 |
| بونلار ربّئن امر اتدئيي آداملاردير کي، کَنَعان تورپاغيندا ائسرايئل اؤولادلارينا تورپاقلاري ائرث بؤله‌جک ائدئلر. | .29 |
| ← Numbers 34/36 → |