| ← Numbers 28/36 → |
| رب موسا ائله دانيشيب اونا ددی: | .1 |
| "ائسرايئل اؤولادلارينا امر ادئب دِه: «دئقّت ادئن کي، منه اولان تقدئمي، تقدئم اولونان قوربانلاريم اوچون يمه‌يئمي، و منئم خوشوما گلن عطئرلي تقدئملري، موعيّن واختلاردا تقدئم اده‌سئنئز.» | .2 |
| اونلارا دِه: «ربّه وره‌جيئنئز اودلا تقدئم اولونان قوربان بودور: دائمي يانديرما قورباني اولاراق هر گون بئر-ائلّئک عيبسئز ائکي اِرکَک قوزو. | .3 |
| قوزولاردان بئرئني سحر، او بئرئني آمّا آخشامچاغي تقدئم ادئن. | .4 |
| هم ده تاخيل تقدئمي اولاراق دؤردده بئر هئن سيخيلميش ياغلا قاتيلميش اِفانين اوندا بئري نارين اون تقدئم ادئن. | .5 |
| بو، دائمي يانديرما قورباني، سئنا داغيندا بويورولان، ربّئن خوشونا گلن اودلا تقدئم اولونان عطئرلي قورباندير. | .6 |
| هر قوزو ائله بئرلئکده اولان مايع تقدئمي دؤردده بئر هئن اولاجاق. کفلندئرن ائچکئني ربّه موقدّس يرده تؤکون. | .7 |
| او بئري قوزونو آخشامچاغي تقدئم ادئن. سحرکي کئمي تاخيل تقدئمي و مايع تقدئمي ائله بئرلئکده اونو تقدئم ادئن. بو، اودلا تقدئم اولونان، ربّئن خوشونا گلن عطئرلي قورباندير. | .8 |
| سَبّت گونونده بئر-ائلّئک عيبسئز ائکي اِرکَک قوزو، و تاخيل تقدئمي اولاراق ياغلا قاتيلميش اوندا ائکي اِفا نارين اون و اونون مايع تقدئمئني تقدئم ادئن. | .9 |
| دائمي يانديرما قورباني و اونون مايع تقدئمئندن علاوه، هر سَبّتئن يانديرما قورباني اولان تقدئم بودور. | .10 |
| هر آيين باشيندا ربّه يانديرما قورباني اولاراق ائکي گاميش و بئر قوچ، بئر-ائلّئک عيبسئز يدّي اِرکَک قوزو تقدئم ادئن. | .11 |
| هر گاميش اوچون تاخيل تقدئمي اولاراق ياغلا قاتيلميش اوندا اوچ اِفا نارين اون و تک قوچ اوچون تاخيل تقدئمي اولاراق ياغلا قاتيلميش اوندا ائکي اِفا نارين اون؛ | .12 |
| هر قوزو اوچون تاخيل تقدئمي اولاراق ياغلا قاتيلميش اوندا بئر اِفا نارين اون تقدئم ادئن. بو يانديرما قورباني، اودلا تقدئم اولونان، ربّئن خوشونا گلن عطئرلي قورباندير. | .13 |
| اونلارين مايع تقدئملري، بئر گاميش اوچون ياريم هئن شراب، قوچ اوچون اوچده بئر هئن ، و بئر قوزو اوچون دؤرده بئر هئن. ائل بويو هر تزه آيدا ورئله‌جک يانديرما قورباني بودور. | .14 |
| دائمي يانديرما قورباني و اونون مايع تقدئمئندن علاوه ربّه گوناه تقدئمي اولاراق بئر اِرکَک کچي ده تقدئم ادئن. | .15 |
| بئرئنجي آيين اون دؤردونجو گونو ربّئن پاسخا بايرامي‌دير. | .16 |
| بو آيين اون بشئنجي گونو بايرام اولسون. يدّي گون ماياسيز چؤرک ييئلسئن. | .17 |
| بئرئنجي گون موقدّس ييغين کچئردئن؛ گونده‌لئک ائشلرئنئزي گؤرمه‌يئن. | .18 |
| ربّه اودلا تقدئم اولونان قوربان، يانديرما قورباني اولاراق ائکي گاميش، بئر قوچ و بئر-ائلّئک يدّي اِرکَک قوزو تقدئم ادئن؛ هاميسي عيبسئز اولسون. | .19 |
| هر گاميش اوچون تاخيل تقدئمي اولاراق ياغلا قاتيلميش اوندا اوچ اِفا نارين اون، قوچ اوچون اوندا ائکي، | .20 |
| يدّي قوزودان هر قوزو اوچون اوندا بئر اِفا تقدئم ادئن. | .21 |
| اؤزونوزو کفّاره اتمک اوچون گوناه قورباني اولاراق بئر اِرکَک کچي تقدئم ادئن. | .22 |
| هر سحر تقدئم اده‌جيئنئز دائمي يانديرما قوربانينا علاوه اولاراق، بونلاري دا تقدئم ادئن. | .23 |
| بلجه، هر گون ربّئن اودلا تقدئم اولونان قوربانين يمه‌يئني، اونون خوشونا گلن عطئرلي تقدئمي يدّي گون تقدئم ادئن. دائمي يانديرما قورباني ائله مايع تقدئمئنه علاوه اولاراق تقدئم ادئن. | .24 |
| يدّئنجی گون موقدّس ييغين کچئردئن، گونده‌لئک ائشلرئنئزي گؤرمه‌يئن. | .25 |
| نوبارين ييغيلما گونو هفته‌لر بايرامينيزدا ربّه تزه تاخيل تقدئمي گتئرنده موقدّس ييغين کچئردئن، گونده‌لئک ائشلرئنئزي گؤرمه‌يئن. | .26 |
| ربّئن خوشونا گلن عطئرلي تقدئمئني يانديرما قورباني اولاراق ائکي گاميش، بئر قوچ و بئر-ائلّئک يدّي اِرکَک قوزو تقدئم ادئن. | .27 |
| هر گاميش اوچون تاخيل تقدئمي اولاراق ياغلا قاتيلميش اوندا اوچ اِفا، تک قوچ اوچون اوندا ائکي اِفا، | .28 |
| يدّي قوزودان هر قوزو اوچون اوندا بئر اِفا نارين اون تقدئم ادئن. | .29 |
| اؤزونوزو کفّاره اتمک اوچون بئر اِرکَک کچي ده تقدئم ادئن. | .30 |
| دائمي يانديرما قورباني و اونون تاخيل تقدئمئندن علاوه، اونلاري اونلارين مايع تقدئملري ائله تقدئم ات. اونلار عيبسئز اولمالي‌دير. | .31 |
| ← Numbers 28/36 → |